Алдағы 5 жылда Шымкент қаласында жаңа перзетхана бой көтереді. Қаланың бас дәрігері сын сағатында жағымды жаңалықтармен де бөлісті.
Бұл туралы Шымкент қаласының әкімі М.Әйтеновтің төрағалығымен қаладағы инфекциялық аурулардың таралуы бойынша өткізген жиналысында Шымкент қаласындағы эпидемиологиялық ахуал туралы денсаулық сақтау басқармасының басшысы Рустам Албаев баяндама жасады.
Нысан құны 900 млн. теңгеге бағаланған. Сондай-ақ, 2025 жылға дейін шаһардағы 11 медицина орталығы мен 8 емхана қайта жөндеуден өткізіледі деп жоспарлануда.
«14 млрд. теңгеге жаңа аппараттар алуды да көздеп отырмыз. Осылайша емханалар мен ауруханаларды жаңа құрылғылармен жабдықтаймыз. Ол үшін меморандумдар жасауды қолға алғалы отырмыз»,-дейді Шымкент қаласы денсаулық сақтау басқармасының басшысы Рустам Албаев.
Айта кетйік, 2025 жылға дейін тұрғындардың өмір сүру жасын 75-ке көтеру де алға қойылған. Ал, аналардың өлімін 7 пайызға, балалардың өлімін 6,9 пайызға азайту жоспарланған.
Сондай-ақ, Р. Албаев осы жылдың бірінші маусымынан бастап ЖРВИ диагнозымен 1030 және пневмония диагнозымен 360 науқас ауруханаға жатқызылғанын баяндады. Яғни, жыл басынан бері пневмониядан көз жұмғандар саны 0,6 пайызға жеткен. Бүгінде пневмония дертін жұқтырып, ауруханаға келіп жатқандар 50 мен 68 пайыз аралығында болып отыр. Демек, алаңдауға негіз жоқ.
