ТҮРКІСТАН МЕН ЛИТВАНЫ БАЙЛАНЫСТЫРАТЫН ӘУЕ РЕЙСІ АШЫЛМАҚ

Түркістанға еліміздегі Литва Республикасының Бас консулы Гвидас Керушаускас жұмыс сапарымен келді. Балтық жағалауынан келген елшімен Түркістан облысы әкімінің орынбасары Рашид Аюпов кездесу өткізіп екіжақты байланыстарды жан-жақты талқылады.

Кездесуде Рашид Аюпов 2018 жылы маусым айында Елбасы Нұрсұлтан Назарбаевтың Жарлығымен Түркістан облысы құрылып, Түркістан қаласы облыс орталығы болғанын, үш жылдан астам уақытта шаһар жаңарғанын мәлімдеді.
– 2018 жылдан бері Түркістан облысына 3,5 млрд. АҚШ доллары көлемінде ивестиция тартылды. Өңірімізде Литва және Қазақстан кәсіпорындарын қатыстырып, бірлескен жобаларды жүзеге асыруға мүмкіндік мол. Туризм саласында әріптестік орнатуға мүдделіміз. Алдағы уақытта туристер саны 5 миллионға жетеді деге болжам бар. Сондықтан Түркістан мен Вильнюс қалалары арасында әуе рейсін ашуды және арнайы турпакеттер әзірлеуді ұсынамыз. Біз жалпы литвалық кәсіпкерлерді Түркістанға шақырамыз. Жобаларды талқылауға дайынбыз, – деген облыс әкімінің орынбасары алдымен онлайн байланыс арқылы кәсіпкерлер форумын немесе кездесуін өткізуді ұсынды.

Литва елшісі Түркістандағы оң өзгерістерден хабардар екенін айта келе өңірде инвестрларға көрсетілетін қолдаулар жөнінде өз елінің кәсіпкерлеріне мағлұмат беретінін, әріптестікті нығайту бағытында жұмыс жалғасатынын мәлімдеді.