Мемлекет басшысы Қасым-Жомарт Тоқаев Қазақстанды цифрлық дамыған мемлекетке айналдыру стратегиялық мақсат екенін айқындады. Мемлекеттік білім беру тапсырысы техникалық мамандықтар бойынша ұлғаяды: геология, машина жасау, энергетика, IT, металлургия, көлік т.б. Бүгінде техникалық және кәсіптік білімді мемлекеттік тапсырыспен қамту 80%-ға жетіп отыр.
«Біздің маңызды стратегиялық міндетіміз – Қазақстанды ІТ мемлекетке айналдыру. Цифрландыру ісінде нақты жетістіктеріміз де жоқ емес. Біз электронды үкіметті және финтехті дамыту индексі бойынша әлем көшбасшыларының қатарында тұрмыз. Былтырдың өзінде ІТ саласындағы экспортымыз бес есе өсті. Жыл соңына дейін бұл көрсеткіш 500 миллион долларға жетуі мүмкін. Әрине, мұнымен шектелмейміз. 2026 жылға қарай ІТ қызметтерінің экспортын бір миллиард долларға жеткізу – Үкіметке жүктелетін жаңа міндет. Шетелдің ірі ІТ компанияларымен бірлескен кәсіпорындар ашу бұл іске септігін тигізері сөзсіз. Үкімет осы мәселені мұқият зерделеп, нақты ұсыныстар енгізуі керек», деді Президент.
Осы орайда, колледжде тегін оқуға мүмкіндік молая түспек. Өйткені техникалық және кәсіптік білім беру ұйымдарында мемлекеттік тапсырыс ұлғайтылды. Бұл туралы Оқу-ағарту министрлігі хабарлады.
Жауапты министрліктің хабарлауынша, жаңа оқу жылында техникалық және кәсіптік білім беру ұйымдарындағы мемлекеттік білім беру тапсырысының көлемі 60 мың орынға көбейеді. Осылайша, мемлекеттік тапсырыс бойынша қабылданған білім алушылар саны 145 мың адамға жетеді.
Осыған орай мәлімдеме жасаған Оқу-ағарту министрлігіне қарасты техникалық және кәсіптік білім департаментінің директоры Әсет Мұханбетов: «Мемлекет басшысының тапсырмасымен сұранысқа ие мамандықтарға тегін техникалық және кәсіптік білім беру бойынша мемлекеттік білім беру тапсырысы республикалық бюджет есебінен 60 мың орынға ұлғайтылды. 2025 жылға қарай жастардың 100%-ы сұранысқа ие мамандықтар бойынша тегін техникалық және кәсіптік біліммен қамтамасыз етіледі», деді.
Айта кетейік, жыл сайын кәсіпорындардың өтінімдері бойынша 10 мың талапкер қабылданады. Тапсырыс беруші кәсіпорындарға практика ұйымдастыру, түлектерді одан әрі жұмысқа орналастыру бойынша міндеттемелер беріледі.
