Түркістан қаласының тұрғындарының назарына апараттық сайтымыз арқылы отандық кәсіпкерлікті дамыту жөнінде мәліметтерді ұсынамыз.
Мемлекет басшысы Қ.Тоқаев бірінші кезекте жеке бастама мен еркін кәсіпкерлік экономиканы дамытудың және еліміздің әл-ауқатын арттырудың негізгі факторлары екенін атап көрсетті. Бұл факторлар бүгінгі отырыс тақырыбының «Кәсіпкерлікті дамыту – ел экономикасын жаңғыртудың негізі» деп аталуына түрткі болғанын айтты.
«Былтырғы жыл біздің бизнес үшін табысты болды. Нақты жұмыс істейтін шағын және орта бизнес субъектілерінің саны 11 пайызға көбейіп, 1,3 миллионға жетті. Шағын және орта бизнес өндіретін өнім көлемі 14 пайызға артып, 26,5 триллион теңгені құрады. Экономикадағы бұл саланың үлесі өткен жылғы көрсеткіш бойынша 25,6 пайыздан 28,3 пайызға дейін өсті. Бұл жаман көрсеткіш емес. Қазақстанда бұрын өндірілмеген 500-ден астам өнім түрі шығарыла бастады. Экспорттың таралым аумағы кеңеюде, отандық өнімдер әлемнің 120 елінің нарығына жеткізілуде. Бірақ жетістіктермен бірге, бірқатар шешімін күткен мәселе де бар. Бұл – іскерлік ахуал, тауарларды өткізу нарығы, қаржыландырудың қолжетімділігі сияқты мәселелер», деді Қасым-Жомарт Тоқаев.
Қазақстан Президенті қолайлы іскерлік ортаны, бизнеске тиімді қолдау көрсетуді және бәсекелестікті қорғауды қамтамасыз ету жөніндегі міндеттерді белгілеп берді. Тарата айтар болсақ, Қ.Тоқаев ең алдымен қолайлы бизнес-ортаны қалыптастыру қажеттігіне екпін берді. Осы орайда Президент: «Соңғы жылдары бизнесті алаңдатқан бірқатар мәселе шешілді. Саланы бақылау және қадағалау тетіктерін жетілдіру бойынша шаралар қабылданды. Мемлекеттік органдардың тексерулеріне қатысты жұмыстар реттелді», деді.
Мемлекет басшысы екінші міндет ретінде тиімді бизнесті қолдау керектігін атады. Жекелеген игі бастамаларды жан-жақты насихаттау, қолдау мемлекеттік саясаттың басымдығы болып келгенін қозғаған Қ.Тоқаев: «Елбасы шешімі бойынша қолжетімді несиелендіруді қамтамасыз ету үшін 600 млрд теңге бөлінді. Бұл «қарапайым» тауарларды өндіруді ұйымдастырудың керемет мүмкіндігі», деді.
Сондай-ақ Президент: «Біздің заңнамада дамыған елдердегідей салықтық несиелер сияқты кең тараған құрал жоқ. Оны Салық кодексіне енгізу керек деп есептеймін. Жаңа кәсіпорындар 3-5 жыл мерзімге инвестициялық салық несиелеріне қол жеткізуі тиіс. Бұл бизнеске нарықта орнығып, өзін-өзі ақтауға мүмкіндік береді. Бизнесті дамытудың үлкен әлеуеті отбасылық кәсіпкерлік тәжірибесінде жатыр. Сарапшылардың бағалауы бойынша, еуропалық компаниялардың 60%-ын ұрпақтан-ұрпаққа берілетін бизнеске, яғни отбасылық кәсіпорындарға жатқызуға болады. Финляндия, Германия, Франция, Жапония, Оңтүстік Корея, Швейцария секілді елдер – отбасылық кәсіпкерліктің көшбасшылары. Үкімет «Атамекен» ҰКП-мен бірлесіп, осындай тәжірибені біздің елімізде де орнықтыру мәселесін ойластыруы қажет», деді. Бұдан бөлек, Мемлекет басшысы 2025 жылы экономикадағы шағын және орта бизнестің үлесін 35-40%-ға жеткізу міндетін алға қойды.
Үшінші міндет ретінде бәсекеге қабілеттілікті қорғау және дамыту мәселесі аталды. Осы орайда Президент бағалардың негізсіз өсуіне жол бермеу, ашық бәсекелестікке кедергі келтірмеу қажеттігіне назар аударды.
Бұдан кейін Мемлекет басшысы нарықты дамыту ісіне маңыз берді. «Отандық бизнестің ішкі және сыртқы нарықтарға қолжетімділігін кеңейту жөнінде шаралар қабылдау қажет», деген Президент жаһандық бәсекелестік жағдайында ішкі нарықты қорғау да өзекті екенін жеткізді.
Сондай-ақ Қ.Тоқаев мемлекет пен бизнестің кең ауқымды әріптестігін орнықтырудың маңыздылығына тоқталды. Оның айтуынша мемлекет-жекеменшік әріптестігінің әлеуетін айқындау қажет. Өткен жылдарда әлеумет нысандар – ауруханалар, балабақшалар, мектептер салуда мемлекет-жекеменшік әріптестігі кеңінен қолданылды.
Мемлекеттің экономикаға араласуын шектеу ісі де Мемлекет басшысы тарапынан негізгі міндеттердің бірі ретінде аталды. «Мемлекеттің экономикаға қатысуын шектеу қажет. Біз экономикадағы мемлекет шекарасын айқын анықтауымыз керек. Қиын кезеңде мемлекет әрқашан экономикалық өсуді қолдау ауыртпалығын өз мойнына алды. Үкіметке 1 қыркүйекке дейін мемлекеттік компаниялар үшін барлық рұқсат етілген қызмет түріне тексеру жүргізуді және оларды қысқарту жөнінде ұсыныстар енгізуді тапсырамын. Сондай-ақ экономикада жаңа мемлекеттік компаниялар құруға мораторий жариялаймын», деген Қ.Тоқаев экономиканың жүйелі түрде бәсекеге қабілеттігін жеке кәсіпкерлік қалыптастыратынын еске салды.
Сонымен қатар Президент отандық компаниялардың қаржылық тұрақтылығын арттыру қажеттігіне де басымдық берді. Мемлекет басшысы қазіргі уақытта банкроттық рәсімдерін өтейтін кәсіпорындар саны 4 мыңға дейін өскенін, олардың қарызы 4 триллион теңгеден асатынын атап көрсетті. Президент осы орайда Үкіметтің ЭЫДҰ елдерінің озық тәжірибесін пайдалана отырып, банкроттық туралы заңның жаңа нұсқасын қабылдау туралы мәселені қарауы тиіс екенін сөз етті.
Отандық кәсіпкерлердің Бизнес-дағдыларын жетілдіру, құзіретін арттыру ісі де басты міндеттердің бірі екенін жеткізген Президент технологиялық өзгерістер мен енгізілген инновациялар өмір бойы жаңа дағдыларды үйренуді талап ететінін қозғады. «2025 жылға дейін Қазақстанның еңбек нарығына 2 миллиондай жас азамат келіп қосылады. Орта және жоғары білімді мамандарға сұраныс артады. Төменгі білікті мамандар үшін жұмыс орындары азаяды», деді Қ.Тоқаев. Президент, сондай-ақ төртінші өнеркәсіптік революция біліктілікті арттыруға қатысты талаптарды күшейте түсетінін жеткізді.
Соңында Мемлекет басшысы Қасым-Жомарт Тоқаев еліміздің жоғары басшылығы отандық бизнеспен жүйелі диалог жүргізу үшін Ұлттық инвесторлар кеңесі тұрақты жұмыс істейтін алаң болуы тиіс екенін айтып, Үкіметке Кеңес жұмысының жаңа форматын бекіту жөнінде жарлық жобасын әзірлеуді тапсырды.
Отырыста «Атамекен» Ұлттық кәсіпкерлер палатасының басқарма төрағасы Абылай Мырзахметов, «Alageum Electric» акционерлік қоғамы директорлар кеңесінің төрағасы Еркебұлан Ілиясов, «Textiline» жауапкершілігі шектеулі серіктестігінің атқарушы директоры Инна Апенко, «Гормолзавод» жауапкершілігі шектеулі серіктестігінің директоры Асен Жақсылықов, «Меthod» жауапкершілігі шектеулі серіктестігінің директоры Дагар Давлетовтер баяндама жасады.
Мемлекет басшысы өз сөзінде елімізде қалыптасқан ахуалды талқылап, халық игілігі үшін билік пен бизнестің өзара ықпалдастығына қатысты жолдарды айқындау қажет екенін айтты. Президенттің пайымдауынша, бүгінде біздің алдымызда бүкіл қоғамдық тыныс-тіршілікті түбегейлі трансформациялау міндеті тұр. Мұның стратегиялық мәні бар.
– Қағаз жүзіндегі әлеуметтік-экономикалық мәселе мен оның қазіргі шынайы жағдайының арасындағы алшақтық сын көтермейді. Сондықтан шұғыл түрде экономикалық саясатты қайта қарау жұмысына бірлесе кірісу керек. Таза, ашық және әділ іс-әрекеттердің жаңа тәртібін анықтаған жөн, – деді Қасым-Жомарт Тоқаев.
Мемлекет басшысының пікірінше, аз ғана элиталық топтар ықпалының артуы және халықтың басым бөлігінің табысының азаюы қауіпсіздікке айтарлықтай қатер төндірді. Бұл қоғамның экономикалық, әлеуметтік, содан кейін саяси бөлінуіне әкеп соқтыруы мүмкін.
– Ұлттық табыстың әділ бөлінуі бойынша теңгерімсіздік пен проблеманың бар екені айдан анық. Халықаралық сарапшылар (KPMG, 2019 жыл) Қазақстан байлығының жартысы 162 адамның ғана қолында екенін растап отыр. Осы ретте халықтың жартысының айлық табысы 50 мың теңгеден аспайды. Бұл – жылына 1300 доллардан сәл ғана асады деген сөз. Мұндай ақшамен өмір сүру мүмкін емес. Бұлай жіктелу мен теңсіздіктің қауіпті екенін айтқан болатынмын. Жағдайды дереу өзгерту керек, – деді Президент.
Қасым-Жомарт Тоқаев бизнес-қауымдастықты осыдан сабақ алып, Жаңа Қазақстанның негізі болуға тиісті жаңа экономикалық саясатты қалыптастыру үшін бірлесіп жұмыс істеуге шақырды.
Президенттің сөйлеген сөзінде мынадай маңызды қағидаттар айтылды:
– әділ бәсекелестік;
– қабылданатын шешімдердің ашықтығы;
– мемлекеттік саясаттың болжамдылығы;
– бизнестің салықтық тазалығы;
– кәсіпкерлердің әлеуметтік жауапкершілігі.
Мемлекет басшысы кәсіпкерлерді патриотизм мен әлеуметтік жауапкершіліктің үлгісін көрсетуге, капитал, тәжірибе, басқарушылар тобы мен нарықты дәл пайымдау сияқты ресурстарды экономиканы қайта құруға жұмсауға шақырды.
–Бүгінгі сөз болып отырған реформа «тартып алуды және қайта бөлуді» көздемейтінін тағы да қайталап айтамын. Бұл ақымақтық және жауапсыздық болар еді. Міндет – сіздерді, ұлттық буржуазияны еліміздің әлеуметтік-экономикалық моделін трансформациялау үдерісіне белсене атсалысуға тарту. Өндіріске инвестиция салу, сапалы жұмыс орындарын ашу және экспорттық әлеуетті арттыру бағытындағы игі істерге жауап ретінде мемлекет жеке меншікті қорғау бойынша кепілдікті арттыруға, тұрақтылық пен мемлекеттік реттеудің болжамдылығын қамтамасыз етуге, бәсекелестікті әкімшілік ресурстардың араласуынан, жемқорлық пен фаворитизмнен қорғауға дайын, – деді Президент.
Қасым-Жомарт Тоқаев еліміздің Жаңа экономикалық бағытының негізін қалайтын басты қағидаттарға жан-жақты тоқталды.
