Шымкенттік дәрігерлер өкпесінің 90 пайызы қабынған қарт әжені пневмониядан аман алып қалды.
Шымкентте өкпесінің 90 пайызы қабынған 82 жастағы әжей пневмониядан айықты. Өкпесіндегі дерті асқынған әжей Галина Хрущева 2020 жылдың 26 маусымы күні қалалық №1 клиникалық ауруханаға ауыр халде жедел жәрдеммен жеткізілген. Дәрігерлер егде жастағы кісіге “Пневмония” диагнозын қойған.
Қарт кісіні тексере келе мамандар оның өкпесінің 90 пайызы зақымданғанын анықтайды. Бұған қоса науқастың өкпесінен қан кеткен болып шықты.
Денсаулық жағдайының ауырлауына байланысты дәрігерлер әжейді 30 маусым күні жансақтау бөліміне ауыстырады. Жансақтау бөлімінде науқасқа COVID-19 емдеу хаттамасына сәйкес медициналық көмек көрсетіледі.
Нәтижесінде қарт кісінің денсаулығы жақсарып, 2020 жылдың 6 шілдесі күні н шығарылды.
Дәрігерлер 82 жастағы қарияның қазіргі жағдайы жақсы дейді. Ал әжей өзін ажалдан арашалап қалған медицина мамандарына алғысын білдірді.
«Барлық медицина мамандарына алғыс айтамын! Әрдайым сақтанып жүріңіздер”, — дейді 82 жастағы Галина Хрущева.
