Бүгін Сенат қабырғасында «Жаһандану дәуірінде ұлттық құндылықтарды дәріптеу – кешенді жаңғырудың негізі» тақырыбына арналған парламенттік тыңдау өтті. Бұл туралы ҚР Парламент Сенатының депутаты Айгүл Қапбарова фейсбук әлеуметтік желісінде хабарлады.
– Сенат зиялы қауым өкілдерімен аталған тақырыпта салмақты ой қозғап, пікір алмасты. Қадау-қадау ұсыныстар айтылды. Жаһандану дәуірінде ең алдымен ұлттық ерекшелікті ескермей, «азаматтық ұлт» қалыптастыру мүмкін емес екендігі сөз болды. Күллі адамзат қауымдастығы алдында бізді көш ілгері ететін де халқымыздың төл құндылықтары, оның жады мен рухы екені рас. Сонымен, бүгінгі ұлт менталитетінің ахуалы қандай, қандай құндылықтар мен көзқарастар жаһандану жолында бізге серік бола алады деген сұрақ төңірегінде ой тарқатылды, – деп жазды Айгүл Жарылқасынқызы.
Сенат төрағасы Мәулен Әшімбаев ұлттық құндылықтарымызды ұрпақтың бойына сіңірудің оңтайлы жолын табуымыз қажет екендігін атап өтті. Бұл ретте негізгі салмақ білім беру саласына түсетіні сөзсіз. Білім беру оқу бағдарламасын түсіндірумен ғана шектелмегені жөн, – деді Мәулен Әшімбаев.
Сонымен қатар Сенат Спикері бұл бағытта интеллигенцияның да алатын орны ерекше екенін атап өтті.
«Қай заманда да зиялы азаматтарымыз қоғам үшін бағдар болған. Алдыңғы аға буын осы бағыттағы миссиясына адалдық танытып, әрдайым ұлтымыздың үні, қорғаушысы болып келеді. Сол үшін оларға алғысымызды білдіреміз. Ендігі кезекте, елімізде зиялы қауымның жаңа буынын қалыптастыруды өзекті мәселелердің бірі деп есептейміз. Олар ХХІ ғасырда ұлттық құндылықтарды сақтаушы және насихаттаушы болуы қажет», – деді Мәулен Әшімбаев.
Парламенттік тыңдауда баяндама жасаған сенатор Бақытжан Жұмағұлов, ұлттық құндылықтар тақырыбына орай түйткілді мәселелердің басын ашып, өзекті мәселелерге назар аударды.
Айта кетейік, Сенатта өткен парламенттік тыңдаудың қорытындысы бойынша арнайы Ұсынымдар дайындалды. Бұл құжат қатысушылардың ұсыныс-пікірлері негізінде тағы да толықтырылып, Үкіметке және тиісті министрліктерге жіберіледі. Сонымен қатар сенаторлар айтылған ұсыныстарды заң шығару ісінде ескеретінін атап өтті.
