Қазақстан құрамасының қақпашысы әрі капитаны Игита Еуропа чемпионатына қатысты пікірін айтты, деп жазады prosports.kz.
«Жарақат, COVID пен жақында біздің елде болған жағдай көп адамның өмірін қиып, біздің дайындықты тоқтатып тастады! Бізге халқымыздың қолдауы ауадай қажет. ЕУРО секілді жоғары деңгейдегі жарысқа лайықты дайындалмай келу өте қиын! Алға, Қазақстан, біз мінезімбен мықтымыз және қиындықты жеңе аламыз!», — деп жазды Игита Instagram-парақшасында.
Осы Еуропа чемпионатында Игита тарихи нәтижеге қол жеткізді. Әлемнің бес дүркін «Үздік қақпашысы» Финляндия қақпасына гол салып, қатарынан үш Еуропа чемпионатында гол салған қақпашы атанды. Игита бұған дейін 2016 жылы Сербия қақпасына, 2018 жылы Испания қақпасына гол салған болатын.
Ойындарға тоқталсақ, Қазақстан құрамасы алғашқы матчта Словениямен тең түсті (4:4). Үш күннен кейін біздің жігіттер Финляндиямен сынға түсіп, 6:2 есебімен басымдық танытты. Енді жерлестеріміз 28 қаңтарда екі дүркін Еуропа чемпионы Италиямен 28 қаңтада ойнайды.
Футбол сарапшыларының айтуынша, жерлестеріміз Португалиямен жолы түйіспеуі үшін топта бірінші орын алуы керек. Өйткені біздің топ плей-оффта Португалия ойнайтын топпен кездеседі. Егер екінші орын алатын болсақ, онда ширек финалда Португалиямен кездесу ықтималдығы жоғары.
Еуропа чемпионатының басты фавориттеріне тоқталсақ, қазір Ресей құрамасы мықты құрамалардың бірі. Ресейдің барлық ойыншысы қатарда. Испания футзалы да өте үздік, ал әлем чемпионатында жарқыраған Португалия да жоғары деңгейде. Қазақстан құрамасының көздеген межесі де өте жоғары.
