Бүгін Түркістан қаласында тарихшылар мен зиялылар бас қосты.
Алқалы басқосуда қазақтың тұңғыш кәсіпқой палуаны Қажымұқан Мұңайтпасұлының өмірі үш тілде баяндалған “Күш атасы – Қажымұқан” кітабының таныстырылымы өтті. Жиынды белгілі ақын, Қазақстан Жазушылар Одағы Түркістан облыстық филиалының төрағасы Айдар Сейдазым ашып, жүргізді.
Бұл кітаптың бастамашысы – Түркістан облысы әкімінің орынбасары болған марқұм Қосман Қайыртайұлы еді. Идеяны Нұрбол Тұрашбеков қолға алып, аманатты аяғына жеткізді.
Құнды кітапта Қажымұқан бабаның спорттағы жеңісті жолымен қатар өмірбаяны, қайталанбас болмысы нақты деректермен өрнектелген. Осыдан бір жыл бұрын Ордабасы ауданының сол кездегі әкімі Нұрбол Тұрашбеков күш атасы Қажымұқан Мұңайтпасұлының есімін тек ел аумағында емес, шет мемлекеттерге де насихаттау керегін айтып, қазақ балуанының өмірбаяны үш тілде баяндалатын кітап шығаруды қолға алған еді.
Конференцияның ашылуында сөз алған Түркістан қаласының әкімі Нұрбол Әбдісаттарұлы:
– Қажымұқан Мұңайтпасұлының өмір жолы – кейінгі ұрпаққа үлгі. Біз осындай тарихи тұлғаларымыздың ғұмырын насихаттау арқылы кейінгі ұрпақты дұрыс жолға бағыттауымыз керек. Бүгінгі жиынымыздың негізгі мақсаты да осы, – деп атап өтті.
Палуан өмірін терең зерттеп жүрген отырарлық Бекжан Бейсенбай тың деректермен бөлісті. Түркістан облыстық Ақсақалдар алқасының төрағасы Жарылқасын Әзіретбергенов, қалалық Ардагерлер кеңесінің төрағасы Жарқынбек Құлбайымбетов, Қажымұқан Мұңайтпасұлының немересі Нұрлан Айдарханұлы, шөбересі Меруерт Ескермес сөз алып, конференцияның мән-маңызына тоқталды.
Сонымен қатар, кітаптың қашан да рухани мұра ретінде сақталып, тарихты қалыптастыруда алатын орны туралы пікірлерін білдірді. Журналист Әсет Әссанди кітаптың аудармасын әлі де жетілдіру бойынша ұсыныстар айтты.
Шара аясында ақын-сазгер Құрманәлі Жылқыбайдың Қажымұқанға арнаған әні шырқалып, жиынға келгендердің көңілін серпілтті.
Нұрбол Әбдісаттарұлы ұлыларды ұлықтау шаралары киелі Түркістанда тұрақты жалғасатынын айтып, жиынға қатысушыларға алғысын білдірді.
