Бүгін «Харекет» қайырымдылық қоры Бәйдібек ауданы, Шаян ауылының тұрғыны төрт балалы жалғызбасты ана Нүрила Елбеговаға жеті бөлмелі баспана сыйлады.
Қайырымдылық шараға қатысқан аудан әкімі Ержігіт Шәріпбеков баспаналы болған Нүрила Елбегованың қуанышымен бөлісіп, шараның ұйытқысы болған «Харекет» қорының негізін қалаушы, қор президенті Гүлмира Мұханқызына алғысын білдірді. Өзінің тілегін білдірген аудандық мәслихат хатшысы Асқар Кенехан Н.Елбегованы қоныс тойымен құттықтады.
Шарада «Харекет» қайырымдылық қорының Түркістан облысы бойынша өкілі Бақдаулет Сапарханов қордың ашылып жұмыс жасап келе жатқаннан бері қаншама отбасыға қуаныш сыйлап жатқанына тоқталып, өзінің тіліген білдіріп, Нүрила Елбеговаға 679 баспана сертификатын табыс етті. Нүриланың қуанышымен бөліскен «Аманат» партиясының атқарушы хатшысы Тұрсынәлі Дүйсенбеков, Шаян ауылдық ардагерлер кеңесінің төрағасы Ермахан Тойжанов және қордың Түркістан облысы бойынша өкілі Бақдаулет Сапарханов баспананың лентасын салтанатты түрде қиды.
Үлкені 10-да, кішкентай 5 жасар төрт баланың анасы Нүрила Елбегова қуаныштан көз жасына ерік беріп, балаларының жеке баспанасы, жеке бөлмелері болатынына қуанып, үйлі болуына жәрдемдескен барлық азаматқа шын көңілімен алғысын білдірді.
Айта кетерлік жайт ақылы қоғамдық негізде жұмыс жасайтын Нүрила Елбегованың бүған дейін өзінің жеке үйі болмаған. Бүгінгі күнге дейін пәтер жалдап келген.
