Түркістан қалалық «Балалар мен жасөспірімдер спорт клубы» өз жұмысын бастағалы екі жылға жуықтады. Клуб аталған жыл аралығында облыс орталығында түрлі спорттық шараларға мұрындық болып, жүйелі жобаларды жүзеге асырды.
Атап айтсақ, 6 сектор тұрғындары бақ сынаған «Менің отбасым» отбасылық сайысынан бастап, клуб баскетбол, футбол, үлкен теннис ойындарынан жасөспірімдер арасында қала біріншілігін өткізді. Өткен жылдың сәуір мен тамыз айларында «Дені сау ұрпақ – ел болашағы» атты ашық алаң ойындарымен қатар, «Жазғы демалыс-2022» командалық ашық алаң ойындары ұйымдастырылды. Одан бөлек, клубтың бастамашы болуымен республикалық деңгейде жасөспірімдер арасындағы үлкен теннистен жарыс өткізілді. Оған Түркістан облысынан бастап, Алматы, Қызылорда облыстары және Тараз, Шымкент, Түркістан қалаларынан келген спортшылар қатысты.
Сонымен бірге, клубтың ұйымдастыруымен өткен Түркістан қаласының қысқы ойындары біріншілігінде жүзге жуық тұрғын бақ сынасты. Қатысушылар шарада шахмат, гір тасын көтеру, волейбол, баскетбол, үстел теннисі, футбол ойындарымен қатар, ұлттық спорт түрлерінен: тоғызқұмалақ, қол күрес пен асық атудан жарысқа түсті. Көптеген спорттық шаралардың ұйымдастырушы болған клуб ұжымы республикалық, облыстық деңгейдегі бәсекелерде шаһардың намысын қорғап, жүлделі орындарға ие болды.
Атап айтқанда, «ARMANS ZHETISAY CUP-2022» облыстық турнирінде клуб қатысушыларынан құралған команда үшінші орынды иемденсе, Кентау қаласында өткен жасөспірімдер арасындағы турнирде клубтың «Түркістан» командасы I-орынды жеңіп алған болатын. Қазіргі таңда, клубта алпысқа жуық қызметкер жұмыс жасайды. Оның ішінде жиырма жаттықтырушы – футбол, үлкен теннис, баскетбол ойындарынан 700-ге жуық оқушыны жаттықтыруда.
2022 жылы облыстағы үздік спорттық клуб атанған – Түркістан қалалық «Балалар мен жасөспірімдер спорт клубы» 2023 жылға арналған спорттық жобаларын бастап та кетті. Клубтың ұйымдастыруымен 18-ші қаңтардан 13 спорт түрінен Түркістан қаласының біріншілігі басталады.
Спорттық додада бокс, қазақша күрес, дойбы, жүзу, волейбол, дзюдо, үстел теннисі мен таэквондо, баскетбол, футбол және үлкен теннис, эстафета ойындарынан жүлделі орындар сарапқа салынады.
Одан бөлек, клуб қызметкерлері қала тұрғындары арасында спортты дамыту үшін таңғы жаттығуларын да жүйелі өткізіп келеді. Ауа райы температурасының төмендеуіне байланысты дәстүрлі жасалып жүрген таңғы жаттығулар аптасына бір рет (сәрсенбі күні) жасалуда. Клуб қызметкерлері мен мүшелері шаһардағы ашық ойын алаңдарын қардан тазалап, алдағы спорттық ойындарға дайындығын бастады. Ондағы мақсат – ашық алаңдарда тазалықты қамтамасыз етумен қатар, алаңда жасөспірімдердің қауіпсіздігін қорғау.
Айта кетейік, клубтың үйірмелеріне қатысуға 6 жастан 17 жасқа дейінгі жасөспірімдер өтініш бере алады.
