Кентау қаласындағы Б.Саттарханов атындағы №1 балалар мен жасөспірімдер спорт мектебі коммуналдық мемлекеттік мекемесі осы уақытқа дейін қаладағы спортшы жастарды тәрбиелеп, түрлі спорт түрлерімен шынықтыруда. Аталмыш мектепде спорттың 12 түрінен жаттығу сабақтары жүргізіледі. Атап айтсақ, қазақ күресі, грек-рим күресі, дзюдо, еркін күрес, самбо, белбеу күресі, жеңіл атлетика, велоспорт, көркем гимнастика, баскетбол, тоғыз-құмалақ, шахмат. Қазіргі таңда осы спорт түрлерімен қала және ауыл мектептерінен барлығы 1094 оқушы спортпен шұғылдануда.
Бүгінде спорт мектебінде 43 жаттықтырушы – оқытушы жұмыс атқарады. Арнайы жоғары білімді 43 бапкер, Жоғары дәрежелі 3 бапкер, І-дәрежелі -14 бапкер, ІІ-дәрежелі -15 бапкерз қызметін атқаруда. Сонымен қатар, ауылдық жерлерде де спорт үйірмелері жұмыс істейді. Оның ішінде Хантағы ауылында еркін күрес, тоғызқұмалақ, Байылдыр ауылында шахмат, грек-рим күресі, Қарнақ ауылында шахмат, Ащысай ауылында тоғызқұмалақ, Құсшы-ата ауылында қазақ күресі спорт үйірмелері жұмыс жасайды.
Айта кетсек, мектептен Әлем және Азия чемпиондары шыққан. Соның бірі, Самбо күресінен Жамалхан Нұрхан Әлем жүлдегері, Дзюдо күресінен Қыдырәлі Ақбота Азия кубогінің жүлдегері, Грек-рим күресінен Мусан Ерасыл Азия кубогінің жүлдегері атанған. Жалпы өткен жылы 71 спортшылар түрлі жарыстардан жеңімпаз болып келген. Мектеп 1972 жылы ашылған. 2003 жылы Олимпиада чемпионы Бекзат Саттархановтың атына берілді. Бүгінде спорт мектебін Қазақ күресінен ҚР спорт шебері Култаев Бахытжан Турарбекұлы басқарып келеді.
