Кентау қаласына қарасты Хантағы ауылында А.Құнанбаев атындағы №5 және А.Пушкин атындағы №6 мектептерінде заманауи үлгіде салынған спорт залдар пайдалануға берілді. ҚР Президентінің тапсырмасымен ауыл мектептеріне қолдау күшейіп, жасөспірімдердің спортпен шұғылдануына жағдай жасалып келеді. Спорт залдың ашылу рәсіміне қала әкімі Жандос Тасов қатысып, ауыл жастары мен тұрғындарын салауатты өмір салтын дамытуға шақырды.
«Бүгінгі пайдалануға берілген заманауи, барлық жағдайы қарастырылған спорт залы ел игілігіне қызмет жасайтын болады. Жастарымыздың салауатты өмір салтын ұстануға бет бұруы қуантады. Болашақта ауылдан көк туымызды көкке желбірететін мықты спортшылар шығатынына сенімдімін» деді қала басшысы.
Бұл спорт нысандары «Ауыл – ел бесігі» бағдарламасы аясында жүзеге асырылды. Тапсырыс беруші – Түркістан облыстық құрылыс басқармасы. А.Құнанбаев атындағы № 5 ші мектепке қаралған қаражат 201 млн. теңге болса, А.Пушкин атындағы №6 шы мектепке 199 млн. теңге қаралған.
«Оқушыларымыз мектептен тыс уақытын тиімді пайдалануға өте қолайлы орта, алдағы уақытта оқушы саны артып жұмыс ауқымы кеңейе береді. Мақсатымыз білімді, дарынды оқушыларды анықтап олимпиадаға дайындау, олимпиада резервін жасақтау» дейді мектеп ұстаздары.
Айта кетейік, спорт залдың биіктігі – 8,5 метрді құрайды. Онда ұлдар мен қыздарға арналған жеке арнайы жуыну бөлмелері бар. Мұнда оқушылардың спортпен шұғылдануына қолайлы жағдай жасалып, орталық жылумен толық қамтылған.
