ТҮРКІСТАН: 2,5 ПАЙЫЗДЫҚ ЖЕҢІЛДЕТІЛГЕН НЕСИЕ БОЙЫНША 142 ЖАСТЫҢ ЖОБАСЫ МАҚҰЛДАНДЫ

936
Президент Қасым-Жомарт Тоқаев Қазақстан халқына Жолдауында ел ертеңі жастардың мәселесін тілге тиек ете кетті. Жастарға жан-жақты қолдау көрсету – мемлекетіміздің басты міндетінің бірі деп атап өтті.
«Жастарға жан-жақты қолдау көрсету – мемлекетіміздің басты міндетінің бірі. Еңбекпен қамтитын түрлі шаралар арқылы келесі жылы 100 мың жасқа жұмыс беруіміз керек. Жастардың кәсіпкерлік бастамаларына қолдау көрсетіле бермек. Оларға жеңілдетілген тәртіппен жылдық өсімі 2,5 пайыз болатын шағын несие беріледі», деді Президент.
Сондай-ақ Мемлекет басшысы бұл шаралар қоғамның барынша үйлесімді әрі әділетті болуына ықпал ететінін жеткізді.
Түркістан облыстық «Жастар ресурстық орталығының» басшысы  Ернар Нұралыұлының сөзінше, өңір бойынша 2,5 пайызбен несие алу үшін бүгінге дейін 636 жас құжат тапсырған. Оның 434-і комиссияға ұсынылып, 243 үміткердің бизнес-идеялары қаралған. Нәтижесінде, 142 жастың жобасы мақұлданып, 62 жасқа қаражат аудару жұмыстары жүргізіліп жатыр, 80 жасқа кәсібін жүргізу үшін қаражат берілді. Ал қалған 101 үміткерге несие беру талаптарына сай келмеуіне байланысты оң қорытынды берілмеген.
– Несиелер «Аграрлық кредиттік корпорациясы» арқылы беріледі. Өңір бойынша Қазығұрт, Отырар, Сарыағаш, Түлкібас, Ордабасы аудандарының жастары мемлекеттік бағдарламаға өтінім беру бойынша алдыңғы қатарда тұр. Ал Созақ, Мақтаарал, Бәйдібек, Келес, Сауран аудандары мен Кентау, Түркістан қалаларында белсенділік төмен. Сондай-ақ, Жетісай, Сайрам, Төлеби, Шардара аудандары мен Арыс қаласындағы жұмыстар орта деңгейде, – деді Ернар Нұралыұлы.
Ал Түркістан облысы бойынша «Аграрлық несие корпорациясы» АҚ филиалының Несиелеу бойынша директорының орынбасары Әлібек Имашевтің айтуынша, несие мал шаруашылығы саласындағы жобалар үшін – 7 жылға дейін, басқа бағыттар үшін – 5 жылға дейін беріледі.
– Несие алушылардың жасы 21-ден 35-ке дейін және жеке кәсіпкер ретінде тіркелуі тиіс. Үміткердің жасы құжат тапсыру сәтінде ескеріледі. Тағы бір айта кетерлігі, жоба шеңберінде кепілдік қою – басты талаптардың бірі. Үміткерлерде кепіл болмаса, үшінші тарап кепілгер бола алады. Жоба қабылданып, несие алатын кезде кепілгердің сенімхаты мен өзі міндетті түрде болуы тиіс. Сондай-ақ, тұрғылықты жері бойынша Түркістан облысында тіркеліп, ал кепілге қоятын мүлкі басқа өңірде орналасуына рұқсат беріледі. Кепілге жылжымайтын мүліктен басқа меншіктегі ауыл шаруашылық мақсаттағы жерлер немесе арнаулы техника қабылданады. Өтінім беру үшін құжаттар пакетін «Аграрлық несие корпорациясы» АҚ филиалына тапсыру қажет, – деді Әлібек Қойшыбайұлы.
Жастарға арналған 2,5 пайыздық шағын несиеге құжат қабылдау наурыз айында басталған болатын. Жоспар бойынша, Түркістан облысында 594 жас мемлекеттік бағдарламаға қол жеткізуі тиіс. Түркістан облысының әкімдігі мен аталған жауапты басқарма бағдарламаны іске асыруға 2,9 млрд. теңге қаражат бөлінгенін мәлімдеген еді.
Еске сала кетсек, қазіргі таңда Түркістан облысына қарасты аудан, қалалық «Жастар ресурстық орталығы» КММ-мен бірлесіп Халықты жұмыспен қамту орталығы мамандары мемлекеттік бағдарламалар бойынша ақпараттық-түсіндірме жұмыстарын жүргізіп жатыр. Бұл бағыттағы кездесулер мен насихаттау жұмыстары жылдың соңына дейін жалғаспақ.

 

«Еңбекпен қамтитын түрлі шаралар арқылы келесі жылы 100 мың жасқа жұмыс беруіміз керек. Жастардың кәсіпкерлік бастамаларына қолдау көрсетіле бермек. Оларға жеңілдетілген тәртіппен жылдық өсімі 2,5 пайыз болатын шағын несие беріледі. Бұл шаралар қоғамның барынша үйлесімді әрі әділетті болуына ықпал етеді», – деді Қасым-Жомарт Кемелұлы.

Осы ретте жастарды қолдауға  бағытталған нақты шешімдерге қатысты өз Dalanews.kz тілшісі саясаттанушы Джабрәйіл Мархиевтің пікірін білген еді. «Президент Жолдауында жас  кәсіпкерлерді қолдау жайлы айтылды. Бұл бүгінгі таңдағы өзекті мәселелердің бірі еді. Енді жастардға мүмкіндік беру арқылы біраз дүниелер шешілмек. Мысалы, жастар арасындағы жұмыссыздық азаяды, яғни еңбек ететін жастар көбейеді, жұмыс орындары ашылады. Кәсіби мамандардың саны артады.  Иә, еліміздегі жастардың жан-жақты, креативті екені даусыз. Ендігі жерде сол буын өкілдеріне Президент жолдауы тағы да тың серпін беріп, жаңа мүмкіндіктерді іске асыруға ықпал етері анық. Сондай-ақ Президент Жолдауында отандық оқу орындарының білім сапасы, студенттердің жатаханамен қамтамасыз етілуі де егжей-тегжейлі сөз болды.

«Отандық жоғары оқу орындарының білім сапасы артқан сайын ондағы оқу ақысы да өсе түседі. Сондықтан мемлекет ұлттық бірыңғай тестілеудің нәтижесіне және басқа да көрсеткіштерге байланысты білім беру гранттарын әртүрлі деңгейде бөлуді жоспарлап отыр. Оның көлемі 30-дан 100 пайыз аралығында болады. Білім алуға жылдық өсімі 2-3 пайыз болатын жеңілдетілген несие де беріледі.   Бұл шаралар жоғары білімнің қолжетімділігін арттырып қана қоймай, қоғамда әріптестік және өзара жауапкершілік қағидатын нығайта түседі», – деді Президент.

«Президент сондай-ақ Үкіметке жастарға арналған жаңа 100 мың жұмыс орнын ашуды, оларға кәсібін ашу үшін 2,5 пайыздық жеңілдетілген несие беруді тапсырды. Яғни, жас өрендер маман, кәсіпкер ретінде қалыптасып, қоғамның толыққанды мүшесіне айналуы тиіс. Бұл жастарға балық емес, қармақ берудің бір тәсілі» деп айтып өтті.

Президент Тоқаев Жолдау жолдады, енді қолдау ғана емес, саяси құжатта көрсетілген міндеттерді тездетіп орындау да маңызды болмақ.

Мемлекет басшысы Қасым-Жомарт Тоқаев жолдауында бизнестің дамуына қатысты реформаларға тоқталды. Бірқатар заң қайта жазылып, баж салығының мөлшері өзгереді. Жас кәсіпкерлерге жеңілдетілген несие беріліп, жұмыссыздықпен күрес жанданады. Осы және өзге де маңызды өзгерістер туралы «Атамекен» Ұлттық кәсіпкерлер палатасы басқарма төрағасының орынбасары Ербол Өстеміров баяндады.

Ербол Өстеміров кәсіпкерлерге байланысты жаңашылдықтарды былай топтастырды: Демонополизацияның жұмысы әрі қарай жалғасады. Бірыңғай операторлардың қызметі жетілдіріліп, нарыққа берілуі керек немесе табиғи монополиялар заңнамасына сәйкес реттелуі тиіс. Жаңа реттеушілік саясат.Бұл реформа екі жылдан бері жүзеге асырылып келе жатыр. Өткен жылғы желтоқсанда президент тиісті заңға қол қойған. Мемлекет басшысы реформаның аяқталу мерзімін 2024 жылдың 1 қаңтары деп бекітті.