Кейінгі жылдары еліміздің қай саласында болсын сыбайлас жемқорлықпен күрес қарқын алып, әділетті қоғам қалыптастыруға күш салынып келеді.
Бұл бағытта Әділет министрлігі де қоғамдық дерттің алдын алуға арналған іс-шаралар жоспарын әзірледі. «Жемқорлық – індет, жою – міндет» қағидатын санаға сіңіре отырып, семинарлар мен дәрістер өткізуді қолға алды.
Сыбайлас жемқорлықтың басты себептерінің бірі – мемлекеттік қызмет түрлеріне адами фактордың араласуы және сол қызметтері үшін қомақты қаржы талап етуі. Осындай деректерді азайту мақсатында Мемлекет басшысы онлайн ұсынылатын мемлекеттік қызметтердің сапасын жақсарту мен санын арттыруға тапсырма беріп, бұл бюрократия мен жемқорлықты төмендетуге, сондай-ақ мемлекеттік органдарды неғұрлым тиімді және ашық етуге мүмкіндік беретінін атап өткен еді.
Сонымен қатар, Президент цифрландыру дегеніміз бір ғана саланы немесе бір бағытты дамыту емес, оның, ең алдымен, экономиканың, өнеркәсіптің және қоғамның дамуына түбегейлі өзгерістер әкелуі қажеттігін баса айтты. Барлық мемлекеттік орган мен ведомствоға қарасты мекемеге ортақ мониторинг жүйесін құрудың маңыздылығын ескертті.
Әділет министрлігі 53 мемлекеттік қызмет түрін көрсетеді. Қазір оның барлығы электронды түрде қолжетімді. Бұл – цифрлы қызмет түрлерін қолыңыздағы смартфон арқылы жасай аласыз деген сөз. Бұл ретте бизнес-үдерістерді реинжинирингтеу, оларды танымал мобильді қосымшаларға көшіру бойынша жұмыстар белсенді жүргізіліп жатқанын баса айтуымыз керек.
2023 жылы «egov.kz» сайтта міндетті мемлекеттік тіркеуге жатпайтын жылжымалы мүлік кепілін тіркеу жөніндегі қызмет толық автоматтандырылды. Бұл бағыттағы цифрландыру жұмыстары алдағы уақытта да жалғаспақ.
