Әлемнің әртүрлі бөліктерінде ұқсас экожүйелердің жаһандық серіктестер желісінің болуы маңызды. Өткен жылы еліміз Кремний алқабында IT-хабын іске қосты. Бұл еліміздің экспорттаушыларына жаңа технологиялар мен капиталға қолжетімділікті қамтамасыз ете отырып, әлемдік IT нарығына шығуға мүмкіндік берді. Мұндай жұмыстар Оңтүстік-Шығыс Азия, Таяу Шығыс пен Еуропаны қоса алғанда басқа аймақтарда да жүргізіліп отыр.
Бұл орайда, құзыретті және білікті кадрлардың болуы да маңызды мәселе. Бұл міндетті іске асыру үшін Қазақстанда жастарға қысқа мерзімде IT-мамандықтарды игеруге мүмкіндік беретін «TeхОрда» бағдарламасы іске қосылды.
Нәтижесінде, 6 мыңнан астам адам IT-білім алып, салада жұмыс істей бастады, табыстары бірнеше есеге артты.
Сонымен бірге республикада Спорттық бағдарламалау федерациясы құрылған. Ал биыл қыркүйек айында Астанада жастар арасында бағдарламалау бойынша әлем чемпионатының финалы өтеді.
Елімізде өнеркәсіп саласында жаңа технологияларды қолдану мәселесі де маңызды. «Икс» индустриясын дамытудың маңызды құралы жер қойнауын пайдаланушылар табысының 1%-ын ғылыми зерттеу әзірлемелеріне бөлу болды. Бір мысал – жасанды интеллект көмегімен кеннен алтын алу процесін оңтайландыру жобасы. Мұндай әзірлемелер өндірістік процестерді оңтайландыруға және олардың тиімділігін арттыруға мультипликативтік әсер етеді.
Қазақстанның коммуникациялық инфрақұрылымын дамыту мақсатында өткен жылы «Қолжетімді интернет» ұлттық жобасы қабылданған болатын. 2027 жылға қарай интернеттің таралуы 100%-ға жетеді деп күтіліп отыр. Осылайша, ауылдық елді мекендерді сапалы байланыспен қамтамасыз ету жұмыстары жалғасып жатыр. Сонымен қатар биыл шалғайдағы екі мың ауыл мектебін жоғары жылдамдықты интернетпен қамту жоспарланып отыр.
Елімізде 5G байланысы іске қосылды, оны қазірдің өзінде еліміздің 20 қаласында 2 миллионнан астам адам пайдаланады. Келесі жылы 8 миллионнан астам адамды 5G байланысымен қамтамасыз ету жоспарланды. Осылайша, Қазақстан цифрлық әлемде жаңа Жібек жолының негізгі қатысушысы болуға ұмтылады.
Көршілерімізбен бірлесе отырып, еліміз Каспий теңізінің түбімен оптикалық байланыс бағытын іске асыруды жоспарлап отыр және Парсы шығанағы елдерімен оптикалық байланыс орнату нұсқалары қарастырылуда.
