Еліміз цифрлық қызмет жөнінен әлемде 28-орында тұр. Көрсеткіш жылдан-жылға өсіп келеді. Өткен жылы бұл бағытта біршама жұмыс атқарылды.
Мемлекет басшысы Қасым-Жомарт Тоқаев елдің цифрлық трансформациясындағы бес негізгі басымдықты атап өткен еді.
Соның біріншісі – азаматтарға заманауи қызмет көрсету. Яғни мемлекеттік қызметтердің барлығы мүмкіндігінше электронды форматқа көшірілуі керек. Екінші басымдық – IT саласын дамытуға қолайлы жағдай жасау. IT сектор мемлекеттік қызметтің маңызды бағыты болғандықтан, цифрлық технологиялар, криптоиндустрия, цифрлық майнинг саласында жетекші ойыншы болуға ұмтылу аса маңызды. Үшінші басымдық – IT инфрақұрылымын ауқымды жаңғырту. Бұл арқылы еліміз халықаралық деңгейде трансшекаралық деректер ағынымен ұштасқан цифрлық инфрақұрылымды қалыптастырады. Төртінші басымдық – цифрлық экономика мен индустрияны дамыту. Бұл бағыт технологиялық жаңарту және цифрлық шешімдер қабылдау үшін инновациялық гранттар мен салықтық жеңілдіктер ұсынуды көздейді. Бесінші басымдық – адами капиталды нығайту. Көріп жүргеніміздей, цифрлық трансформация заманында IT мамандарға деген қажеттілік артып келеді. 2025 жылға қарай кем дегенде 100 мың қызметкерді даярлау міндеті де қойылған. Цифрлық даму, инновациялар және аэроғарыш өнеркәсібі министрлігі қолға алған бастамалар мен атқарылған жұмыстар да осы 5 басымдыққа негізделген.
Бүгінде еліміздің IT саласында 16 мыңға жуық компания жұмыс істейді. Осы салада еңбек ететіндер саны 182 мың адамға жетті. 2023 жылдың бірінші жартыжылдығында IT қызмет экспорты 247 млн доллардан асқан. Ал Дрейпер университетімен бірлесіп жүзеге асырылған бағдарламаға 27 жоба қатысқан. Қатысушы компаниялардың бірі «Ciix» Тим Дрейперден 1 млн доллар инвестиция тартты. Ал «Google for Startups» компаниясымен бірлесіп ұйымдастырылған бағдарламаға 24 жоба қатысты. Бағдарламаның нәтижесінде, компаниялар 4,2 млн доллар жинап, жалпы бюджеті 87,6 млн долларды құрады, ал айлық табыс көлемі 535 мың долларға жетті.
