Қазақстанда GPT чатының баламасы жасалады

Қоғам

Қазақстанда GPT чатының баламасы жасалады

Сабит Тастанбек

20.04.2024

Қазақстанда GPT чатының баламасы жасалады

Қазақстан жасанды интеллектке өзінің цифрлық өнімімен енуді мақсат етіп отыр.Болашақта қазақстандықтар мемлекеттік қызметтерді ChatGPT форматында байланыс жасау арқылы ала алады. Бұл туралы Digital Almaty 2024 цифрлық форумында цифрлық даму, инновациялар және аэроғарыш өнеркәсібі министрі Бағдат Мусин айтты.

“БҰҰ рейтингі бойынша Қазақстан қазірдің өзінде онлайн қызмет көрсету бойынша әлемде 8-ші орында, ал жалпы электронды үкіметті дамыту бойынша 28-орында тұр”, – деп атап өтті ол.

Оның айтуынша, бүгінгі таңда мемлекеттік қызметтердің 93 пайызға жуығы электронды түрде көрсетіледі, 50 миллион анықтама мүлдем алынып тасталды.

“Өйткені біз ақпараттық жүйелерді интеграциялап, мемлекеттік құрылымдар мен ұйымдарға анықтама талап етуге тыйым салдық”, – деді Бағдат Мусин.

Ол биыл e-Gov өнімдеріне жасанды интеллект енгізуге назар аударыла бастағанын атап өтті.Бағдат Мусин қазақстандықтар жақын арада мемлекеттік қызметтерді ChatGPT форматындағы байланыс арқылы алады деп есептейді.”Қазіргі әзірлеме қазақ тіліне аударылады, біз қазақ тілді LLM құру бойынша жұмыс істеп жатырмыз”, – деді ол.Назарбаев Университетімен бірлесе отырып, қазақстандық әзірлеме базасында GPT чатының баламасын жасау жұмысы басталған.

“Бұл басқа өнімді пайдалану немесе қайта пайдалану емес, Қазақстан жасанды интеллектке өзінің цифрлық өнімімен енуді мақсат тұтып отыр”, – деп түйіндеді Бағдат Мусин.

Алматыда Digital Almaty 2024 цифрлық форумы өтіп жатыр. Форумда 200-ден астам спикер сөз сөйлейді. Үш күнге созылатын цифрлық іс-шараға 30 мыңнан астам адам келеді деп жоспарланып отыр.

Қазақстанда жасанды интеллектіні қолданудың перспективалы бағыттарының бірі қала құрылысы және менеджмент болып табылады. Зияткерлік жүйелер көлік инфрақұрылымын жақсартуға, энергияны басқаруды оңтайландыруға және мемлекеттік қызметтерді тиімдірек етуге көмектеседі. Осылайша, Қазақстан жасанды интеллекті белсенді дамытып, елді жаңғырту және инновациялық дамыту үшін өзінің әлеуетін іске асыруда. Қазақстанда жасанды интеллектіні қолданудың тағы бір саласы – ауыл шаруашылығы. Жасанды интеллект топырақ пен өсімдіктерді бақылау жүйелерін әзірлеу, егін өнімділігін болжау және тыңайтқыштар мен суды пайдалануды оңтайландыру үшін қолдануы мүмкін. Бұл ауыл шаруашылығының тиімділігін арттыруға және азық-түлік қауіпсіздігін жақсартуға көмектеседі.