Президент Қасым-Жомарт Тоқаев Қазақстанды цифрлық дамыған мемлекетке айналдыру стратегиялық мақсат екенін айқындады.
«Біздің маңызды стратегиялық міндетіміз – Қазақстанды ІТ мемлекетке айналдыру. Цифрландыру ісінде нақты жетістіктеріміз де жоқ емес. Біз электронды үкіметті және финтехті дамыту индексі бойынша әлем көшбасшыларының қатарында тұрмыз. Былтырдың өзінде ІТ саласындағы экспортымыз бес есе өсті. Жыл соңына дейін бұл көрсеткіш 500 миллион долларға жетуі мүмкін. Әрине, мұнымен шектелмейміз. 2026 жылға қарай ІТ қызметтерінің экспортын бір миллиард долларға жеткізу – Үкіметке жүктелетін жаңа міндет. Шетелдің ірі ІТ компанияларымен бірлескен кәсіпорындар ашу бұл іске септігін тигізері сөзсіз. Үкімет осы мәселені мұқият зерделеп, нақты ұсыныстар енгізуі керек», деді Президент.
Осы орайда, таяуда Абу-Дабиде Emirates Skills XV халықаралық жарысы өтті.
Австрия 700 ұпаймен күміс, Біріккен Араб Әмірліктері 637 ұпаймен қола жүлде еншілесе, Қазақстан атынан қатысқан Абай атындағы радиотехника және байланыс колледжінің студенттері Тимур Бабенко мен Елнар Жусабаев ең жоғары 720 ұпай жинап, жеңіс тұғырының шыңына көтерілді.
Облыс студенттері халықаралық жарыстарда үздік нәтиже көрсетіп, ел намысын абыроймен қорғап жүр. Жігіттердің тәлімгерлері – Радиотехника және байланыс колледжінің директоры Оралхан Сартаев пен IT бағытының арнайы пән оқытушысы Күлпан Түсіпбаева, халықаралық сарапшы Полат Хизметов.
Айта кетейік, БАӘ-де өткен Emirates Skills XV ұлттық чемпионатына 26 құзырет бойынша 17 елдің өкілдері қатысты.
Жалпы, жоспар бойынша елімізде жасанды интеллект саласында жыл сайын 1000 маман дарялануы керек. Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды. Жасанды интеллект саласында жыл сайын 100 стартап іске қосу бойынша өршіл міндет қойылып отыр.
