Еліміздегі банктер де киберқауіпсіздіктің алдын алуға барын салуда. Соның бірі Еуразия банкі. Банк қызметкерлері алаяқтарға алданбау жолдары мен кибершабуылдың алдын алуға атсалысуда. Мәселен, банк тұтынушыларына арнайы түсіндірме жұмыстары жүргізіліп, алаяқтықтың күре тамырын жоюда.
Естеріңізге сала кетейік, жалпы Түркістан облысында интернет алаяқтық қылмысы көбейгенін жеткізді киберқауіпсіздік саласының мамандары. Мәселен Түркістан облысында былтыр интернет-алаяқтық бойынша 567 іс тіркелген. Оның 219-ы сотқа жолданды. Аталған бағыттағы қылмысты ашу бойынша өңір полицейлері Республика көлемінде алдыңғы қатардан көрініп келеді. Бұл туралы бүгін Өңірлік коммуникациялар қызметінде өткен брифингте айтылды. Облыста «CyberPol» қызметкерлерімен жүргізілген жүйелі іс-шаралардың нәтижесінде 67 қылмыскер құрықталып, оларға 113 интернет-алаяқтық қылмыстарына қатыстылығы дәлелденді. Оның ішінде әлеуметтік желілерде бірнеше жалған аккаунттар ашып жәбірленушілерден арзан бағада жиһаз жасауға тапсырыс алып, алаяқтық жасағандар да бар.
Назар аударыңыз! Алаяқтықтың жаңа амалы пайда болды! – дейді банк мамандары.
Соңғы кездері қазақстандықтарға өздерін банк қызметкеріміз деп таныстыратын алаяқтар телефон соғуда. Олар сіздің депозитіңізге қауіп төнгенін хабарлайды, ақшаны жедел шешіп алуды немесе депозитті «қауіпсіз шотқа» аударуды ұсынады. Бұл айлаға берілмей, керісінше банкке жедел түрде қоңырау шалыңыз!
Алаяқтардан бір қадам алда болуға және ақшаңызды үнемдеуге көмектесетін тағы бірнеше кеңестер:
— Жеке деректеріңізбен ешкіммен бөліспеңіз! Телефон алаяқтарының, әсіресе несиелерді немесе шоттарды жабу туралы өтініштерінен сақ болыңыз.
— Ақшаны аудармас бұрын алушының мәліметтерін тексеріңіз.
— Ешқашан SMS-те көрсетілген код пен PIN-кодтарды үшінші тұлғаларға, тіпті туыстарыңызға айтпаңыз.
— Құрылғыларыңызға AnyDesk және RustDesk сияқты бағдарламаларды орнатпаңыз. Күдікті жағдайларға тап болсаңыз, банкке немесе құқық қорғау органдарына хабарлаңыз.
Өзіңізге және қаржыңызға қамқор болыңыз! Алаяқтардан бір қадам алда болыңыз!
