2024 жылғы 29 сәуір мен 10 мамыр аралығында еліміздің кез келген тұрғыны «Жайлы мектеп» ұлттық жобасы аясында салынып жатқан білім ошақтары жобаларының соңғы талқылауына қатыса алады.
Ұлттық жобаның бірыңғай операторы «Samruk-Kazyna Construction» АҚ білім беру кеңістігінің атмосферасы мен үйлесімділігін шолуға мүмкіндік беретін 3D-үлгіні ұсынып отыр.
Оның көмегімен жайлы мектептердегі сынып, дәліз, вестибюль, спорт залдары және асхананың қалай рәсімделетінін таңдауға қатысуға болады.
Виртуалды саяхат оқушыларға, ата-анаға, мұғалімдер мен қызығушылық танытқан азаматтарға жайлы мектептердің ішкі интерьерімен танысып, пікірін білдіруге мүмкіндік береді. Одан бөлек, қазақстандықтар арнайы сауалнамаға қатысып, ұсыныстар бере алады.
Пікірлер мен ұсыныстар биыл 10 мамырға дейін қабылданады.
Айта кетсек, Түркістан облысындағы шалғай ауылдарда орналасқан 330 мектеп Starlink желісімен жұмыс істейді. Түркістан облысындағы 911 мемлекеттік мектептің барлығы интернет желісімен қамтылған. Оның ішінде 581 мектепке талшықты-оптикалық байланыс желісі арқылы жылдамдығы 20-80 Мбит/с аралығындағы интернет желісі орнатылған. Ал, тағы 33 мектеп жуырда оптикамен қамтылады.
Бұдан бөлек, 330 мектеп шалғай және таулы аумақтарда орналасуына байланысты, техникалық мүмкіндігіне қарай жылдамдығы 512 Кб/с – 20 Мбит/с құрайтын төмен жылдамдықты интернет желісімен қамтылған. Бүгінде аталған білім ұяларының 200-ден астамы Илон Масктың Starlink спутниктік интернетіне қосылды. Қалған ауылдар сәуір айының соңында жаңа желімен жұмыс жасауды бастады.
Қазіргі таңға дейін облыс аумағында 203 мектепте Starlink спутниктік интернет желісінің құрылғылары орнатылды. Бұл өте үлкен көрсеткіш. Қалған мектептерде интернет желісінің құрылғыларын орнатуды биыл сәуір айының соңына дейін аяқтау жоспарланып отыр. Сонда Түркістан облысында мектептердегі интернет мәселесі толық шешімін табады.
