16 мен 23 жас аралығындағы қыздарға арналған Tech girls бағдарламасы іске қосылды. Екі айға созылатын Tech Girls бағдарламасы елдің барлық аймақтарын қамтиды. 3 мыңнан астам қыз-келіншек IT-бағыттар бойынша тегін оқу мүмкіндігіне ие болады. Білім беру барысында вебинарлар, воркшоптар, тікелей эфирлер, сондай-ақ Techno Women және Astana Hub сарапшылары мен тәлімгерлерімен сессиялар қарастырылған.
«Tech Girls бағдарламасының қатысушылары IT-өнімдерді тез және тиімді құруға мүмкіндік беретін бірегей дағдыларға ие болады. Мысалы, No Code School лендингтер, сайттар, мобильді қосымшалар, чат-боттар және маркетплейстер құру негіздерін үйретеді. Low Code бағдарламалаудың минималды дағдылары бар қосымшаларды әзірлегісі келетіндерге жарамды, ал Beta Career курсы беделді IT-компанияларда мансаптық консалтинг және кәсіби бағдарламалау саласындағы тәжірибелі мамандардан әңгімелесуден сәтті өту үшін қажетті білім мен дағдыларды ұсынады», — деді Astana Hub басқарушы директоры Дания Ахметова.
Мұндай бағдарламалардың маңыздылығына 2023 жылы жүзеге асқан IT—Aiel бағдарламасының табысты тәжірибесі дәлел бола алады. Аталған бағдарламаның арқасында Қазақстанның 17 өңірінен 2000-нан астам жұмыссыз әйелге Ақпараттық технологиялар саласындағы мамандықтар бойынша тегін білім алуға мүмкіндік берілді. Биыл да IT—Aiel бағдарламасы өз жалғасын табады деп күтіліп отыр.
«Tech Girls — бұл жас қыздардың Ақпараттық технологиялар саласындағы әлеуетін ашуға зор мүмкіндік беретін бағдарлама. Біздің мақсатымыз — жас ұрпақты IT саласында табысты мансапқа қажетті дағдылармен қамтамасыз ету арқылы қолдау. Бұл тек таланттарды дамытуға ғана емес, Қазақстанның цифрлық экономикасының болашағына да инвестиция», – деп атап өтті ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшесі Алина Абдрахманова.
