Түркістандық тұрғындарының назарына мемлекеттің дін саласындағы саясатының оның ішіндегі ұлтаралық келісім мәселелері қалай шешіліп келеді. Бұның алдын алу туралы мәліметтерді ұсынамыз. Жалпы Қазақстан өзінің гуманистік, демократиялық және толерантты сипатымен ерекшеленеді. Соның айқын бір көрінісі – ұлтаралық татулық пен келісімді сақтауды алдына мақсат етіп қойған Қазақстан халқы Ассамблеясының құрылуы. Мұндай мемлекеттік органның қажеттілігін тұңғыш Президент Нұрсұлтан Назарбаев көрді. Ол осы идеяның бастамашысы болып, оның қалыптасуына жан-жақты үлес қосқанын мойындауға тиіспіз.Әр ұлттың жеке ерекшеліктері, сол ұлттың бірлігін тану, қабылдау мәдени құндылықтар жүйесін, тарихы мен тілін еркін дамыту арқылы жүзеге асады. Бүгінде елімізде 130-дан астам ұлт өкілі бар, олар ана тілін үйренуге, баспасөзге, бұқаралық ақпарат құралдарына қол жеткізуге мүмкіндік алды, олар өздерінің салт-дәстүрі мен әдет-ғұрпын осы күнге дейін сақтай отырып, ұлттық мерекелерін еркін тойлай алады.
Аталған тақырып төңірегінде Түркістан өңірінде бірқатар ауқымды шаралар жүргізіліп келеді. Соның бірі Қазақстан халқы Ассамблеясының мониторинг тобы Қарабұлақ, Манкент ауыл округтерінің тұрғындарымен кездесу өткізді. Жиынға Қазақстан Республикасы Президенті Әкімшілігінің Қазақстан халқы Ассамблеясы хатшылығы меңгерушісінің орынбасары Ғалымжан Махан, ҚР Парламенті сенатының депутаты Алишер Сатвалдиев және ҚХА Республикалық этномедиация кеңесінің төрағасы Шерзат Пулатов қатысты.
Кездесуді аудан әкімінің орынбасары Мадияр Әліпов жүргізіп отырды.
Қазақстан халқы Ассамблеясының мониторинг тобының мүшелері елдің қауіпсіздігі мен бейбітшілігін сақтау үшін ішкі тұрақтылық пен этникалық топтар арасындағы келісімділікті арттыру ретіндегі рөліне тоқталды. Сондай-ақ этносаралық саладағы мемлекеттік саясаттың негізгі басымдықтары мен жеткен жетістіктерін атап өтті. Ашық пікір алмасу форматында өткен мәжіліс барысында қоғам қауіпсіздігі мен тыныштығын қамтамасыз етуде қандай жұмыстарды атқару қажеттігі туралы мәселелер талқыланды. Жиын соңында тұрғындардың туындаған сұрақтарына жауап берілді. Мемлекеттік органдардың этносаралық байланысты нығайту жөніндегі тиімді тетіктері мен Қазақстан халқы Ассамблеясы қызметінің жаңа бағыттары туралы ұсыныс-пікірлерін ортаға салды.
Жалпы осы тақырып төңірегінде бірнеше сайыстар да ұйымдастырылып жүр. Оған дәлел Түркістан қаласындағы «Достық үйі» ғимаратында Республика күні ұлттық мерекесіне орай этнос жастары арасында Қазақстан халқы Ассамблеясының «Мың бала» республикалық мәдени-ағартушылық жобасының облыстық кезеңі өтті.
Аталған байқау Түркістан облыстық қоғамдық даму басқармасының «Қоғамдық келісім» КММ-нің қолдауымен ұйымдастырылды. Ашылу салтанатында сөз алған облыстық қоғамдық даму басқармасы «Қоғамдық келісім» КММ-нің басшысы Эльмира Жанғазиева байқаудың қазақстандық бірегейлік пен бірлікті нығайтудағы рөліне тоқталып, қатысушыларға сәттілік тіледі. Жыл басынан бері бастау алған «Мың бала» мәдени-ағартушылық жобасы аудан, қалаларда 7 номинация бойынша өткізілді. Аталған байқаудың 5 сайысы бойынша үздік шыққан жеңімпаздар бүгінгі шарада марапатталды. Сондай-ақ 2 байқау бойынша үміткерлер облыстық кезеңде бақ сынасты. Жас таланттардың шеберлігін шыңдаған байқауға өз саласының білгірлері, мәдениет, өнер саласының майталман мамандары қазылық етті. Әділқазылар мүшелері қатысушылардың сөйлеу мәнеріне, мәтіннің бейнелік жүйесі мен мазмұндық құрылымына, актерлік шеберлігіне, таңдап алынған шығарманың ерекшелігіне мән берді. Байқауда қазылар қатарында Түркістан облысы қоғамдық даму басқармасы «Қоғамдық келісім» КММ-нің басшысы Эльмира Жанғазиева, Қазақстан Жастар Одағы сыйлығының лауреаты, ҚР мәдениет қайраткері, Қазақстан Композиторлар Одағының мүшесі, әнші-компазитор Сауранбек Елеуов, Қожа Ахмет Ясауи атындағы ХҚТУ-нің «Орындаушылық өнер» кафедрасының аға оқытушысы, ҚР мәдениет қайраткері, компазитор Әлімбай Ботақараев, Қожа Ахмет Ясауи атындағы ХҚТУ-нің «Орындаушылық өнер» кафедрасының аға оқытушысы, ҚР мәдениет саласының үздігі Аякөз Якуб және облыстық қоғамдық даму басқармасы ҚХА хатшылығы және этносаралық қатынастарды дамыту бөлімінің маманы Мадина Камеденова төрелік етті.
Байқау қорытындысы бойынша «Жарқыра, жас дарын» байқауында кентаулық Венера Расулова топ жарса, ІІ орынды төлебилік Маржона Рафикжанова, ІІІ орынды түлкібастық Ағжа Агалы иеленді. Ал «Өнерлі өрге жүзер» байқауында өнер көрсеткен мақтааралдық Лабор Ибадуллаева жеңімпаз атанып, республикалық байқауға жолдама алды. Бұл сында саурандық Шахзод Рустамхан ІІ орынға, түлкібастық Гулназа Мирхамитова ІІІ орынға лайық деп танылды. Жеңімпаздар мен жүлдегерлер Түркістан облыстық қоғамдық даму басқармасының басшысы Ерлан Күзембаевтың атынан Алғыс хаттармен және қаржылай сыйлықтармен марапатталды.
Ал Астанадағы Бейбітшілік және келісім сарайы есігін айқара ашты, мұнда қоғам қайраткерлері жиі жиналып, түрлі этнос өкілдері бас қосып тұрады. Ассамблеяның нақты міндеті құқықтық негізде жүйеленген. Айталық: этносаралық қатынастар саласында мемлекеттік органдармен және азаматтық қоғам институттарымен тиімді өзара іс-қимылды қамтамасыз етеді әрі қоғамда этносаралық келісім мен толеранттылықты нығайта түсу үшін қолайлы жағдай жасайды; халық бірлігін нығайту, қазақстандық қоғамның іргелі құндылықтары бойынша қоғамдық келісімді қолдау мен дамыту; экстремизм мен радикализмнің көріністеріне және адам мен оның құқықтарына, бостандықтарына қол сұғуға бағытталған әрекеттерге қарсы тұруда мемлекеттік органдарға жәрдемдесу; демократиялық нормалар негізінде азаматтардың саяси және құқықтық мәдениетін
қалыптастыру.
Қазақстан халқы Ассамблеясы құрылған күннен бастап орасан зор әлеуетті жинақтап, халық дипломатиясы институтының үлгісіне бейімделіп, дамудың ұзақ жолын жүріп өтті. Еліміздегі 100-ден астам этностың басын біріктірген бірегей құрылым тұрақтылықты сақтап, республиканың дамуында маңызды рөл атқарды.
Қазақстан халқы Ассамблеясы Қазақстанның ұлтаралық қатынастар саласындағы саясатының табыстылығын бүкіл әлемге паш етуде. Жалпы, Ассамблея жұмысының арқасында елімізде этносаралық және конфессияаралық келісімнің бірегей үлгісі, әрбір азаматтың өз құқықтарын толық пайдаланып, еркіндікті сезіне алуы үшін ерекше сенім, ынтымақтастық және өзара түсіністік атмосферасы қалыптасты. Әрбір қазақстандыққа ұлты мен дініне қарамастан Конституциямен кепілдік берілген.
Республикада Қазақстанның барлық этностарының мәдениетін, тілін, салт-дәстүрін дамыту үшін барлық қажетті жағдайлар жасалған. Ассамблея қызметі Қазақстанның ұлтаралық қатынастар мәселелерін тиімді шешетін мемлекет ретіндегі халықаралық беделін арттыруға ықпал етуде. Әлі де осы қызметінен, мүддесінен таймайтыны анық.
Айта кетейік, Түркістанда этносаралық қарым-қатынас мәдениетін нығайту мақсатында түрлі семинар өтіп келеді. Осыған дейін ҚР Президенті Әкімшілігі ҚХА Хатшылығы меңгерушісінің орынбасары Ғалымжан Махан және ҚР Мәдениет және ақпарат министрлігі Этносаралық қатынастарды дамыту комитетінің төрағасы Ғалым Шойкин жұмыс сапарымен Түркістан облысына келген болатын. Сапар аясында елордадан келген қонақтар Түркістан қаласындағы «Ұлы Дала Елі» орталығында «Этносаралық қарым-қатынас мәдениетін қалыптастырудың психологиялық-педагогикалық негіздері» тақырыбындағы семинарда сөз сөйлеп, пікір алмасты. Аталған жиынға аудан, қалалардағы білім бөлімдерінің тәрбие ісі жөніндегі әдіскерлері, аудан, қалалардағы этнос өкілдері тығыз шоғырланған елдімекендердегі жалпы және орта арнаулы оқу орындары директорлары мен олардың тәрбие ісі жөніндегі орынбасарлары, аудан, қалалардағы этнос өкілдері тығыз шоғырланған елдімекендердегі жалпы және орта арнаулы оқу орындарының оқытушылары мен психологтары, «Қоғамдық келісім» КММ-нің аудандық, қалалық филиалдарының басшылары қатысты. Жиында қоғамдық келісімді нығайту жұмыстарын БАҚ-та жандандыру, жалған ақпараттың таралуына қарсы заң аясында ақпараттық-түсіндіру жұмыстарын күшейту және өзекті мәселелерді, ұсыныстарды талқылау, ақпараттық жұмыстарды жетілдіру жайы талқыланды. Бұл ретте, «Парасат» медиация және құқық орталығының сарапшы-конфликтологы Саламат Жұмағұлов, Қолданбалы этносаяси зерттеулер институты Қолданбалы зерттеулер орталығының директоры Ғали Дінмұхаммед өз тәжірибелерімен бөлісіп, мазмұнды баяндама жасады.
