«AMANAT» партиясы Түркістан облыстық филиалының төрағасы, Түркістан облыстық мәслихатындағы фракция жетекшісі Алтынсары Үмбетәлиев партиямыздың Түркістан қалалық филиалына қарасты «Достық» және «Түркістан станциясы» бастауыш партия ұйымдарының белсенді құрамдарымен кездесті. Кездесу барысында партияластарға атқарылып жатқан жұмыстар мен партиялық қызмет, партиялық жобалар төңірегінде айтылды.
Түркістан жоғары медицина колледжінің базасында құрылған «Достық» бастауыш партия ұйымы 220-дан астам азаматты біріктіріп, партия айқындаған басымдықтарды іске асыру шараларын атқарып келеді. Гүлмира Алдабергенованың жетекшілігіндегі бастауыш ұйымның негізгі құрамын – орта буын медицина кадрларын даярлайтын денсаулық сақтау саласының кәсіби мамандары құрайды. Колледж директоры, медицина ғылымдарының кандидаты Ғалымжан Бимурзаевтың қолдауымен партияластарымызға арнайы бөлме қарастырылып, компьютерлік техникамен және басқа да қажетті жабдықтармен қамтамасыз етілген.
Ұйымның құрамындағы 3 партиялық топ бастауыш ұйымның жоспарына сәйкес және партиялық жобалар шеңберінде Мемлекет басшысының ұлт саулығын қамту жөнінде берген тапсырмаларының орындалуы бойынша арнайы кездесу, тұрғындарға құқықтық көмек ұсынуда кәсіби адвокаттардың қатысуымен қоғамдық қабылдау жиыны өткізілген. Бастауыш ұйым берген ұсыныспен 50 азамат «Қарызсыз қоғам» жобасы шеңберіндегі қаржылық сауаттылықты көтеру курстарында білім алған. «Бақытты отбасы» жобасы аясында «Балаңа уақыт арна», «Әкем, анам және мен» отбасылық сайыстары өткізілген. Колледжде білім алушы жастардың қатысуымен бизнес бастамаларға баулу семинарлары, қоғамның экологиялық санасын қалыптастыруда «Таза бейсенбі» апталығы аясында «Таза аула», «Жасыл колледж» экологиялық акциялары ұйымдастырылған.
Алтынсары Дүйсенбекұлы ұйымның белсенді қызметіне ризашылығын білдіріп, жүйелі жұмысты қамтуда бірқатар шараларды қоса атқаруды ұсынды.
Түркістандағы ең көне еңбек ұжымдарының бірі – Түркістан локомотив депосы. Қадір Сырлыбеков жетекшілік ететін «Түркістан станциясы» бастауыш партия ұйымы өңіріміздегі ең белсенді қызметі бар ұйымдарымыздың бірі. Партияласымыз Сұлтан Базарбай бастауыш ұйым тарапынан атқарылып жатқан жұмыстарды баяндады. Бес жүзден астам азаматтың басын біріктіретін бұл ұйым тұрғындармен мейлінше жақын кері байланыс орнатуға басымдық берген. Биылғы жылдың өзінде БПҰ өкілдері 15 азаматтың арыз-шағымдарын тыңдап, оң шешім табуына үлес қосқан.
«Теміржол станциясы» БПҰ көтерген негізгі мәселенің бірі – магистралді жол үстінде тұрған жаяу жүргіншілерге арналған көпірдің адамдар үшін қауіпті боп жатқаны еді. Аманаттықтар дер кезінде көтерген мәселе шұғыл шешімін тауып, көпірге қауіпсіз қоршаулар мен бөгеттер қойылды. Сонымен қатар, теміржолшылар санатындағы партияластарымыз «Ардагерлерді ардақтайық», «Ұлттық мұра», «Баланы мектепке жинайық», «Қарызсыз қоғам», «Таза бейсенбі», тағы басқа партиялық жобалардың атқарылуына елеулі үлестерін қосып келеді.
«AMANAT» партиясы Түркістан облыстық филиалының баспасөз қызметі
