Өмірі мен өнері
Актерлік шеберлік саласында ширек ғасырдан астам тәжірибесі бар Мақсат Айтжанов – Қазақстанның өнер әлеміндегі танымал тұлғалардың бірі. Ол кино мен театрда актерлік шеберлігін шыңдап, соңғы он жылдан астам уақытта режиссураға ден қойған. Қазіргі таңда Қожа Ахмет Ясауи атындағы халықаралық қазақ-түрік университетінде актерлік өнерден сабақ береді.
“Актерлік өнерге алғашқы қадамым бала кезден басталды. Ән айтып, мәдени шараларға қатысқан шағымнан сахнаға деген махаббатым пайда болды. Мектеп қабырғасында айтысқа қатысып, өнер жолына бет бұрдым. 1996 жылы Қожа Ахмет Ясауи университетінің өнер факультетіне оқуға түсіп, 2000 жылы тәмамдадым. Сол күннен бастап актерлік өнер – өмірлік кәсібіме айналды,” – дейді ол.
Шәкірттерге артылған жауапкершілік
Мақсат Айтжанов – бірнеше буын өнерпаздарды тәрбиелеп шығарған ұстаз. Оның айтуынша, шәкірттер саны нақты есептеусіз болғанымен, әрбір шәкіртіне деген мақтанышы ерекше. “Мен үшін шәкірттерімнің өнер жолында жеткен жетістігі маңызды. Олар сахнада өздерінің шеберлігін көрсете алған сайын, еңбегімнің ақталғанын сезінемін. Ал үйреткенімді толық игере алмаса, бұл – шәкіртке ғана емес, ұстазға да сын,” – дейді ол.
Мақсат мырза студенттермен жұмыс істеуде дәстүр мен заманауи әдістерді ұштастырады. Ол шәкірттерімен жақын қарым-қатынас орнатуды және олармен ашық байланыс жасауды маңызды санайды. “Студенттерімнің маған сенім артқаны, тіпті жеке сырларын бөлісуге дайын болғаны – біздің қарым-қатынасымыздың басты құндылығы,” – деп бөлісті ол.
Актерлік шеберлік пен болашаққа сенім
“Қазақстандағы актерлік өнердің болашағы жарқын,” – дейді Мақсат Айтжанов. Оның пікірінше, қазіргі таңда қазақстандық театрлар мен актерлер халықаралық деңгейде танылып, үлкен жетістіктерге жетуде. “Ғабит Мүсірепов атындағы театрдың “Құлагер” спектаклі Мәскеуде көрсетіліп, көрермендер ұзақ уақыт шапалақтап, құрмет көрсетті. Бұл – қазақ өнерінің әлемдік аренада мойындалғанының дәлелі,” – дейді актер.
Сондай-ақ, ол жасанды интеллекттің актерлік шеберлікті алмастыра алмайтынын ерекше атап өтті. “Актерлік өнер – адамның жүрегі мен сезімінен туатын өнер. Мұндай органикалық шынайылықты ешбір машина немесе технология қайталай алмайды,” – деп сенім білдіреді ол.
Өнер жолындағы қиындықтар мен шабыт
Мақсат Айтжанов өнер жолындағы қиындықтарға тоқтала отырып, оларды шығармашылық процесс кезінде сезінбейтінін айтты. “Маған шабыт беретін – шәкірттерім. Олардың көзіндегі отты көргенде, шаршау дегенді ұмытып кетемін,” – дейді ол. Алайда, өнер жолында кездесетін басқа адамдардың қызғанышы мен іштарлығын кейде қиындық ретінде атап өтеді.
Заманауи технологияларды қолдану
Ұстаз ретінде заманауи әдістерді қолдану оның басты ұстанымдарының бірі. “Бүгінгі таңда студенттер үшін кез келген театрдың спектаклін көру мүмкіндігі бар. Біз сол мүмкіндікті тиімді пайдаланамыз. Сонымен қатар, шәкірттермен достық қарым-қатынас орнату арқылы олардың шығармашылық қабілетін аша түсемін,” – дейді ол.
Мақсат Айтжановтың өнер жолына деген адалдығы мен шәкірттеріне деген қамқорлығы оның қазақ актерлік өнерінің дамуына қосқан үлесін ерекше айшықтайды. Ол өз кәсібін мақтанышпен айта отырып, актерлік өнердің болашағына үлкен сеніммен қарайды.
Арайлым МҰРАТБЕК
ХҚТУ 4 курс студенті
