Бүгін «Достық үйінде» Түркістан қалалық өзбек этномәдени бірлестігінің жылдық есебі тыңдалды және қорытынды іс-шарасы өтті.
Жиынға Түркістан облыстық қоғамдық даму басқармасы басшысының орынбасары Нұрсұлтан Сейтжанов, «Қоғамдық келісім» КММ басшысы Эльмира Жанғазиева, Түркістан облыстық және Түркістан қалалық өзбек этномәдени бірлестігінің өкілдері қатысты.
Түркістан қалалық өзбек этномәдени бірлестігінің төрағасы Райымжан Қошқаровтың мәлімдеуінше, қалалық өзбек этномәдени бірлестігі елдік пен бірлікті нығайту бағытында және қайырымдылық мақсатында жасалған іс-шараларға белсенді қатысып келеді. Мәселен, 2024 жылдың басынан бері облыстық Қазақстан халқы Ассамблеясы жанындағы этномәдени бірлестіктердің мүшелері және «Үлес» қайрымдылық қоры тарапынан 187 млн 915 мың теңге көлемінде көмек көрсетілген. Атап айтар болсақ, Төтенше жағдай орын алған облыстарға көмек жіберіліп, әлеуметтік жағдайы төмен отбасыға баспана берілді және азық-түлікпен тұрақты түрде қамтамасыз етуде.
Сондай-ақ этномәдени бірлестік Наурыз мейрамы, Алғыс айту күні, 1 мамыр Қазақстан халқының бірлігі күні және қоғамдық көпшілік іс-шараларға белсене қатысуда.
Іс-шарада пайымды пікірлерін ортаға салған Түркістан облыстық ҚХА жанындағы Медиация кеңесінің төрағасы Бақытжан Бейсембаев, Түркістан облыстық өзбек этномәдени бірлестігі Ақсақалдар кеңесінің төрағасы Зуппархан Чалданов және Түркістан облыстық өзбек этномәдени бірлестігі Аналар кеңесінің төрайымы Мухаббат Ибрагимова этносаралық татулықты сақтау жолындағы игі істерге тоқталып, береке-бірлігіміз арта берсін деген ізгі лебіздерін жеткізді.
Келелі кеңесте сөз сөйлеген «Қоғамдық келісім» КММ басшысы Эльмира Жанғазиева елдік мұраттың сәтті жүзеге асуы халықтың ынтымақ-бірлігіне тікелей байланысты екенін айтып, этносаралық татулық пен қоғамдық келісімді сақтау жолында бірлесе жұмыс істеуге шақырды.
Жиын соңында этносаралық татулықты, қоғамдық келісімді нығайтуға үлес қосып жүрген этномәдени бірлестіктің бірқатар мүшелері Түркістан қаласының әкімі Әзімбек Фазылбекұлы мен Түркістан облысы қоғамдық даму басқармасының басшысы Ерлан Күзембаевтың атынан Алғыс хаттармен марапатталды.
