Бүгін Түркістандағы «Достық үйінде» Қазақстан халқы Ассамблеясының 30 жылдығы аясында «Кітап – алтын қазына» тақырыбында іс-шара өтті. Жиынға Түркістан облыстық қоғамдық даму басқармасы «Қоғамдық келісім» КММ-і басшысының орынбасары Ерназар Баетов модераторлық етті.
Шараның мақсаты – жас ұрпақты кітап оқуға баулу, рухани-адамгершілік құндылықтарды насихаттау, жастардың мәдени өсуіне серпін беру.
Басқосуға Түркістан облыстық қоғамдық даму басқармасы басшысының орынбасары Нұрсұлтан Сейтжанов, Қ.А.Ясауи атындағы ХҚТУ бас кітапханашысы Шолпан Қуанышбаева, Түркістан облыстық «Фараб» әмбебеп ғылыми кітапханасының Абонемент бөлімінің сектор меңгерушісі Маржан Құсбекова, ардагер кітапханашы, жазушы Алима Пашанова және Е. Иззатуллаев атындағы мектептің кітапхана меңгерушісі Сарвиноз Аминжанова және ҚХА мүшелері қатысты.
Келелі жиында сөз алған Нұрсұлтан Маратұлы жастарды рухани байлыққа ұмтылуға шақырып, кітап оқу арқылы тұлғалық дамудың маңызын атап өтсе, Шолпан Айтбайқызы кітап тек ақпарат көзі ғана емес, ойлау мәдениетін қалыптастыратын күш екенін тілге тиек етті.
Сонымен қатар, шара барысында «Ассамблея жастары» РҚБ мүшелері Захро Ирисматова мен Мавлуда Усманова Мұқағали Мақатаевтың поэзиясынан үзінділер оқып, көрерменге рухани әсер сыйлады.
