Ассамблея жалпыұлттық бірліктің негізгі моделіне айналған

418

Түркістан облысында этносаралық қатынастар саласында мемлекеттік органдармен және азаматтық қоғам институттарымен тиімді өзара іс-қимылды қамтамасыз ету, қоғамда этносаралық келісімді және толеранттықты одан әрі нығайту үшін қолайлы жағдайлар жасау үшін тиісті жұмыстар атқарылуда. Одан бөлек, халық бірлігін нығайту, қазақстандық қоғамның негіз қалаушы құндылықтары бойынша қоғамдық келісімді қолдау және дамыту бойынша да жұмыстар жалғасуда.
Осы орайда, Түркістан қаласындағы көрнекті «Достық үйі» ғимаратында Қазақстан халқы Ассамблеясының 30 жылдығына және 1 маусым – Халықаралық балаларды қорғау күніне орай ерекше форматтағы «Ұмай ана» фестивалі ұйымдастырылды. Бұл ауқымды іс-шара Түркістан облыстық қоғамдық даму басқармасы мен «Қоғамдық келісім» КММ-нің қолдауымен жүзеге асырылып, Қазақстан халқы Ассамблеясының «Мәдениетті ана – мәдениетті ұлт» жобасын насихаттау мақсатын көздеді.
Фестиваль барысында қазылар алқасы қатысушылардың өнері мен шығармашылық әлеуетін жіті бағалады. Үміткерлердің өзін-өзі ұстау мәдениеті, тапсырмаларды орындаудағы шеберлігі, көшбасшылық қасиеттері, түрлі ситуациялық жағдайлардан оңтайлы шыға білу қабілеті, сөз тазалығы мен киім үлгісіне дейін назардан тыс қалмады. Жиынның ең ерекше тұсы – Мақтаарал ауданының жарқырай көзге түсуі болды!
Мақтаарал ауданының атынан шыққан «Асыл аналар» тобы өзінің жоғары дайындық деңгейімен, ұжымдық бірлігінің жарасымымен, сахнадағы шынайы көріністерімен ерекшеленіп, фестивальдің шынайы жұлдызына айналды. Қазылар алқасы олардың өнеріне жоғары баға беріп, Мақтаарал ауданының «Асыл аналар» тобын 1-орынға лайық деп тапты. Бұл – аудан үшін зор мәртебе, зор қуаныш!
Іс-шара соңында жеңімпаздар мен жүлдегерлер Алғыс хаттармен және қаржылай сыйлықтармен марапатталды. Әсіресе, «Қоғамдық келісім» КММ-нің басшысы Эльмира Жанғазиева мен облыстық ҚХА жанындағы Аналар кеңесінің төрайымы Гүлсара Тоққұлова сахнаға шығып, Мақтаарал ауданының жеңісін ерекше атап өтіп, «Асыл аналар» тобын шын жүректен құттықтады. Мақтаарал ауданының бұл жетістігі – аудан аналарының мерейін өсірген, елдің рухын асқақтатқан зор жеңіс! Фестиваль арқылы ауданымыздың өнерлі, батыл, мәдениетті аналары республика деңгейінде жарқырап, мақтанышқа айналды. Бұл жеңіс – Мақтаарал ауданының игілігі мен абыройын арттырды!

Елімізде Ассамблеяға 2007 жылы конституциялық мәртебе берілді. Ұйым жалпыұлттық бірліктің негізгі моделіне айналды. Елімізде соңғы жылдары атқарылған ауқымды өзгерістердің арқасында Ассамблея қызметі жасампаздықтың жаңа сипатына көтерілді. Сенаттың бес депутатын Ассамблея кеңесінің ұсынысымен Президент тағайындайды. Бұл қадам заңнамалық деңгейде барлық этностың мүддесін қорғау мүмкіндігін едәуір арттырды. Оған қоса, Қазақстан парламентаризмі тарихында алғаш рет «Бір ел – бір мүдде» атты палатааралық депутаттар тобы құрылды. Бұл топ қоғамдық келісімді нығайту мәселелерімен айналысады. Қазір мемлекеттік органдар түгел Ассамблея жұмысына атсалысады. Министрліктерден, облыс әкімдіктері мен барлық деңгейдегі мәслихаттардан бастап ауыл әкімдіктеріне дейін одан шет қалмайды.

Ассамблея қоғамдық ұйымдармен және институттармен тығыз байланыста жұмыс істеп, еліміздің ішкі саясатын жүзеге асыруға белсене атсалысып келеді. Осылайша, мемлекет пен қоғам арасында сындарлы әрі жемісті сұхбат, яғни, диалог орнатуға ықпал етуде. Қазақстан халқы Ассамблеясының 12 мүшесі Ұлттық құрылтай құрамында табысты еңбек етіп, елдік бастамаларға өз үлесін қосып жатыр. Ассамблея сессиясы жыл сайын өтеді. Онда қабылданған шешімдерді мемлекеттік органдар міндетті түрде ескеруге тиіс. Сессиялар аралығындағы жұмысты Ассамблея кеңесі атқарады. Оның құрамына этномәдени бірлестіктердің өкілдері, қоғам қайраткерлері, Парламент депутаттары, министрлер мен әкімдер кіреді.

ҚХА Хатшылығы Президент Әкімшілігінің дербес құрылымдық бөлімі саналады. Барлық өңірде Достық үйі бар. Онда мыңнан астам этномәдени бірлестіктер орналасқан. Сондай-ақ облыс әкімдіктерінде «Қоғамдық келісім» мемлекеттік мекемелері құрылды. Ассамблея құрылымында төрт мыңнан астам қоғамдық ұйым жұмыс істейді. Бұл ұйымдардың мақсаты – бір, бұл – азаматтарымызды елдік маңызы бар жұмысқа тарту, яғни ортақ іске жұмылдыру. Мысалы, Ақсақалдар кеңесі мен Аналар кеңесі отбасы институтын нығайтуға, жалпыұлттық құндылықтарды дәріптеуге атсалысып, ауқымды жұмыс жүргізуде.

Соңғы уақытта Ассамблея қызметіндегі сарапшылық құрамның сапасы жаңа деңгейге көтерілді. Ғылыми-сарапшылар кеңесі мен 42 Ассамблея кафедрасы ұлт құрылымы мен этносаралық қарым-қатынастар үдерісін зерттейтін 360-тан астам сарапшыны біріктіріп отыр.

ҚХА мүшелері күн сайын көзге көрінбейтін, бірден нәтиже бермейтін, алайда ұзақ мерзімді, стратегиялық тұрғыдан тиімді, ауқымды жұмыс жүргізеді. Өткен жылдың өзінде Ассамблея барлық өңірде 15 мыңнан астам іс-шара ұйымдастырды. Оған 1 миллионға жуық адам қатысты.