Қазақстан халқы Ассамблеясының құрылғанына биыл- 30 жыл. Бүгінгі таңда Қазақстанның түрлі өңірлерінде, оның ішінде Түркістан облысында да қоғамдық келісім мен бірлікті нығайтуға арналған түрлі жобалар жүзеге асырылып келеді. Облыстағы 20-дан астам этномәдени бірлестік пен олардың жанындағы жастар ұйымдары, аналар кеңестері қоғамдық іс-шаралардың ұйытқысы болып отыр. Солардың бірі Кентау қалалық өзбек этномәдени бірлестігінің белсенді мүшесі- Абдухаликова Шахла. Назарларыңызға Шахланың ассамблея жайлы, татулық пен бірлік туралы пікірін ұсынамыз:
Қазақстан – тағдыры әртүрлі, арманы ортақ жүзден аса ұлт пен ұлысқа ортақ алтын бесік. Осы ынтымағы жарасқан ұлттарды бір арнада тоғыстырып, ел ішіндегі татулық пен келісімді сақтау үшін құрылған бірегей құрылым – Қазақстан халқы Ассамблеясы бүгінде мемлекетіміздің тұтастығы мен тұрақтылығының сенімді тірегіне айналды.
Ассамблеяның басты мақсаты – еліміздегі әр этностың мәдениеті мен тіліне құрмет көрсете отырып, олардың мемлекет құраушы қазақ ұлтымен бірге дамуына жағдай жасау. Бұл – ұлттар мен ұлыстарды бөлмей, қайта біріктіретін, мемлекетшіл сана мен ортақ құндылықтарға жетелейтін ұлы миссия.Қазақстан халқы Ассамблеясы 1995 жылы Елбасы Нұрсұлтан Назарбаевтың бастамасымен құрылып, аз уақыттың ішінде ел ішіндегі этносаралық қатынастарды реттейтін бірден-бір тиімді тетікке айналды. Бүгінде Ассамблеяның құрамында 390-нан астам республикалық, облыстық және өңірлік этномәдени бірлестіктер жұмыс істейді. Олар тек мерекелік шаралармен шектелмей, қоғамдық келісімді нығайтуға, қайырымдылық, ағартушылық, тәрбиелік бағыттағы жұмыстарға белсене қатысып келеді.
Мәселен, Кентау қаласындағы өзбек этномәдени бірлестігі жыл сайынғы «Наурыз», «Достық фестивалі», «Мәдениеттер тоғысы» сынды түрлі іс-шараларға қатысып, өзбек халқының өнері мен салт-дәстүрін паш етіп қана қоймай, басқа этнос өкілдерімен өзара ынтымақтастықты нығайтуға атсалысып келеді.
Біздің Тәуелсіздігіміздің 30 жылдан астам тарихында еліміз бірде-бір рет ұлтаралық жанжалға ұшырамады. Бұл – ең алдымен, мемлекет жүргізіп отырған салиқалы саясаттың және Ассамблея жұмысының нәтижесі. Біздің әрқайсымыз – өз ұлтымыздың ұлы бола отырып, ортақ Отан – Қазақстанның перзентіміз. Бізді біріктіретін – осы туған жерге деген сүйіспеншілік, бейбіт өмірге деген ұмтылыс, болашаққа деген сенім. Ассамблея – әр этнос өкілінің үні естілетін, пікірі ескерілетін диалог алаңы. Бұл ұйым азаматтарды қоғамдық мәселелерге бейжай қарамауға, елдің бүгіні мен болашағына үлес қосуға шақырады. Біз, этномәдени бірлестіктердің мүшелері, жастармен жұмыс істеу, патриоттық тәрбие беру, ұлттық құндылықтарды ұлықтау бағытындағы жобаларға белсене қатысып келеміз.
Қазақстан халқы Ассамблеясы тек этностардың мәдениетін сақтап қалуға емес, сонымен қатар, қазақ тілі мен руханиятын ортақ негіз ретінде дамытуға айрықша мән беріп келеді. Мемлекеттік тілді үйренуге арналған курстар, ана тілін ұмытпауға бағытталған үйірмелер, мәдени фестивальдер – бәрі де ел ішінде бірлік пен өзара құрметті қалыптастырады. Бүгінде өзбек этномәдени бірлестігі де қазақ тілінде сөйлейтін, қазақ мәдениетін құрметтейтін азаматтарды тәрбиелеуге үлес қосып отыр. Өйткені біз білеміз: қазақ халқының тілі мен мәдениетін құрметтеу – бұл осы жерге, осы елге деген шынайы құрметтің белгісі.
Түркістан облыстық Қазақстан халқы Ассамблеясы еліміздегі этносаралық татулық пен тұрақтылықты сақтау жолында ауқымды жұмыстар атқарып келеді. Соның ішінде, Кентау қаласы – Қазақстанның этносаралық келісім үлгісін айқын көрсетіп отырған шағын орталық. Мұнда өзбек, түрік, татар, орыс, кәріс және басқа да ұлт өкілдері тату-тәтті өмір сүріп келеді. Әр этнос өз салт-дәстүрін ұмытпай, сонымен қатар қазақ халқымен тығыз араласып, шынайы достықта тіршілік етуде. Бұл – Қазақстан халқы Ассамблеясының құндылықтары шын мәнінде жергілікті деңгейде де іске асырылып жатқанын дәлелдейді. Біз, өзбек этномәдени бірлестігінің мүшелері, барлық этнос өкілдерін ортақ құндылықтарды құрметтеуге, бейбітшілікті сақтау жолында бірігуге шақырамыз. Бұл – біздің азаматтық борышымыз, тарихи жауапкершілігіміз.
Қазақстан халқы Ассамблеясы – еліміздегі ең маңызды қоғамдық институттардың бірі. Ол саяси емес, рухани күш ретінде жұмыс істейді. Бірлік пен келісімді сақтайтын, алуан түрліліктің ішінде ортақтық табатын бұл құрылым – болашақ ұрпаққа үлгі боларлық тәлім мектебі. Кез келген халықтың рухани биіктігі – оның өзге ұлтқа деген көзқарасынан танылады. Қазақстан бұл тұрғыдан әлемге өнеге көрсетіп келеді. Біз осы биіктен түспеуіміз керек. Өйткені Ассамблея – татулық пен бірліктің тұғыры, ал сол тұғырды мықтап ұстап тұру – барша қазақстандықтардың қасиетті міндеті.
