“Дүниеге келген жас нәрестеге ауа қаншалықты қажет болса, мүмкіндігі шектеулі азаматтарға да пандус (сырғыма баспалдақ) солай қажет”. Бұл нақыл сөз емес, бұл шардаралық азаматтың арманы болатын. Осы ниеттің жүзеге асуында 109 call орталығының үлесі орасан.
Облыстық бірыңғай байланыс бөліміне жыл басынан бері Шардара ауданынан 1135 өтініш түсіп, дер кезінде орындалып келді. Шардаралық мүмкіндігі шектеулі азамат үй кезегі арқылы “Болашақ” мөлтек ауданындағы жаңа баспанаға қоныстанған. Алайда, пәтердегі көтерме сатыда пандус қойылмаған. Бұл бойынша 109 нөміріне өтініш қалдырып, дер кезінде сала өкілдеріне жолданды.
– Пандус орнату мәселесі бойынша 109-ға хабарластым. Сол жақтан қолдау тауып, аудан әкімі Арман Романұлының бастамасымен, пандус орнатылды. Барлығы талапқа сай. Түсіп, шығуға қолайлы. Рақмет, – деді Ерқонды Ахметов.
Сондай-ақ, 109 нөмірі мәселесінің шешімін табуға қолайлы екенін, үйде отырып қажетті сұрақтарға жауап тауып, арыз-шағымдары орындалатынын жеткізді.
Айта кетейік, Президенттің «Халық үніне құлақ асатын мемлекет» қағидасын жүзеге асыру мақсатында бірыңғай байланыс орталығы тәулік бойы жұмыс істейді. 2025 жылдың басынан бері облыс бойынша 62 590 мың өтінім түсіп, 61 194-і дер кезінде жабылды. Ал қалған арыздар орындалу барысында тұр. Облыс әкімінің хаттамасы негізінде “109 мониторинг” тобы өтініштердің сапалы орындалуын қадағалау үшін шалғай елді мекендерге барып, тұрғыдармен тұрақты кездесу өткізеді. Сондай-ақ, насихаттау жұмысына да басымдық берілуде.
