2025 жылдың 18 тамызынан бастап Желтоқсан көшесі, 121/1 мекенжайы бойынша орналасқан Еңбекші ауданының №2 Халыққа қызмет көрсету орталығы өз қызметін тоқтатады.
Талдау қортындылары бойынша аталмыш ХҚКО-да қызметалушылардың саны төмен болғандықтан, жұмысты оңтайландыру туралы шешім қабылданды. Бұл шешім ресурстарды қайта бөлуге, цифрлық сервистерді дамытуға және қолданыстағы халыққа қызмет көрсету орталықтарындағы жағдайды жақсартуға мүмкіндік береді.
«Еңбекші ауданындағы №2 ХҚКО-ның жабылуы қала тұрғындары үшін мемлекеттік қызметтердің қолжетімділігіне әсер етпейді. Барлық қажетті қызметтерді Шымкент қаласындағы кез келген халыққа қызмет көрсету орталығынан алуға болады. Сондай-ақ, Еңбекші ауданында Бәйтереков көшесі, 89 мекенжайындағы №1 ХҚКО жұмысын жалғастырады. Жұмыс уақыты дүйсенбі жұмаға аралығы, сағат 9:00-ден 18:00-ге дейін», — деп атап өтті Шымкент қаласы бойынша филиал директоры Айнұр Тобаева.

Айта кетейік, азаматтар мемлекеттік қызметтерді тек халыққа қызмет көрсету орталықтарынан ғана емес, сонымен бірге «ХҚКО» мобильді қосымшасы, екінші деңгейлі банктердің сервистері және өзге де цифрлық платформалар арқылы ала алады.

Еске сала кетсек, бүгінде Шымкент қаласында 10 халыққа қызмет көрсету орталығы жұмыс істейді. Оның ішінде 3 мамандандырылған және 1 көші-қон орталығы бар. Барлық орталықтарда кең автотұрақтар және мүмкіндігі шектеулі жандарға арналған пандустар және қызметкерлерді шақыру түймелері орнатылған.