Мемлекет басшысы Қасым-Жомарт Тоқаев өз Жолдауларында және ресми отырыстарда балық шаруашылығын дамыту мәселесіне ерекше тоқталған болатын. Ол бұл саланың еліміздің агроөнеркәсіптік кешеніндегі маңызды бағыт екенін атап өтіп, өңірлерге нақты тапсырмалар жүктеген. «Агроөнеркәсіптік кешенді дамыту үшін жаңа тәсілдер керек. Оның ішінде, су ресурстарын тиімді пайдалану, оның ішінде балық шаруашылығын өркендету – басты міндеттердің бірі. Бұл салада экспорттық әлеует те зор» деп атап өткен болатын.
Жалпы балық шаруашылығы саласын жүйелі дамыту жоспарын жасау. Өңірлік бағдарламалар қабылдап, жергілікті су айдындарын тиімді пайдалануды қамтамасыз ету. Балық өсірумен айналысатын кәсіпкерлерге қолдау көрсету (субсидия, инфрақұрылым, жеңілдетілген несие). Балық өнімдерін ішкі нарыққа және экспортқа шығару тізбегін жолға қою. Браконьерлікпен күресті күшейту және заңнаманы жетілдіру. ҚР Ауыл шаруашылығы министрлігінің мәліметінше, 2030 жылға қарай елде жылына 270 мың тоннаға дейін балық өсіру жоспарланған. Бұл мақсатқа жету үшін облыстарда балық кластерлерін құру, балық өсіру шаруашылықтарын көбейту, жем-шөп, инкубациялық цехтарды дамыту қажеттігін атап өткен-ді.
Осы тұста Түркістан қаласының әкімі Әзімбек Пазылбекұлы Өзбекстан Республикасынан келген инвесторлармен кездесті. Кездесуде әуежай жанындағы жағажайда заманауи балық шаруашылығы кластерін дамытуға бағытталған жаңа инвестициялық жобаның жүзеге асырылу барысы талқыланды. Қала басшысы инвесторлармен бірге жобаның жоспарланған аумағын арнайы аралап, ондағы инфрақұрылымдық және инвестициялық мүмкіндіктермен танысты.
Аталған жобаға Өзбекстандық инвесторлар тарапынан 5 миллион АҚШ доллары көлемінде жеке инвестиция тарту көзделіп отыр. Жалпы аумағы 100 гектарды құрайтын кешеннің 70 гектары — су қоймаларына, 10 гектары — интенсивті бассейндерге, ал қалған 20 гектары — әкімшілік және өндірістік нысандар мен туристік инфрақұрылымға арналмақ. Жоба аясында инкубациялық құрылғылар, балық өсіруге арналған интенсивті су айдындары, шабақ және балапан балық өсіретін шаруашылықтар құрылып, сонымен қатар 200 орынға арналған заманауи қонақүй мен мейрамхана салу жоспарлануда.
Жоба толық іске қосылған кезде жылына 1000 тонна балық, 50 миллион дана шабақ және 400 мың балапан балық өсіріледі деп күтілуде. Бұл жобаны жүзеге асыру алты кезеңнен тұрады. Толық іске қосылу мерзімі — 2 жыл. Сонымен қатар, 100-ден астам жаңа жұмыс орны ашылады деп жоспарлануда. Қазіргі таңда тараптар арасында өзара ынтымақтастықты бекітуге бағытталған құжаттар дайындалуда. Жоба аясында инвестициялық меморандум жобасы қаралуда.
Мемлекет басшысы өңірлерде балық шаруашылығын дамыту – экономикалық әртараптандырудың маңызды бағыты екенін атап өтті. Бұл сала ауылдық жерлерде жұмыс орындарын көбейтуге, азық-түлік қауіпсіздігін нығайтуға, сондай-ақ экспорттық табысты арттыруға сеп болады.
Айта кетейік, облыстың өңірлік бағдарламасына сәйкес, жылына шамамен 6640 тонна балық өсіру жоспарланған. Түркістан облысында тауарлы балық өсірумен айналысатын 156 кәсіпкерлік субъектісі бар. Облыста акваөсіру субъектілеріне субсидиялар берілуде. «Ауыл аманаты» бағдарламасы арқылы жеңілдетілген несиелер, фермерлерге түсіндіру жұмыстары жүргізілуде.