Түркістан қаласында өнеркәсіп саласы қарқынды даму үстінде. Қалада соңғы жылдары бірнеше өндіріс нысандары ашылып, олар өңір экономикасын нығайтып, жаңа жұмыс орындарын құруға мүмкіндік беруде. Қалада құрылыс материалдары, жеңіл өнеркәсіп өнімдері, азық-түлік және жиһаз өндірісі бойынша ірі кәсіпорындар жұмыс істейді. Бұл өндіріс орындары заманауи технологиялармен жабдықталған және экологиялық талаптарға сай жұмыс атқарады. Түркістан қаласы әкімдігінің қолдауымен кәсіпкерлерге арналған инвестициялық жобалар іске асуда. Жаңа өндіріс нысандарының ашылуы аймақтың экономикалық даму көрсеткішін арттырып, тұрғындардың өмір сүру деңгейін жақсартуға ықпал етеді. Өндіріс саласындағы жетістіктер қаланың әлеуметтік-экономикалық дамуына серпін беріп, Түркістанды өңірлік өнеркәсіп орталығына айналдыруға бағытталған нақты қадамдар болып табылады.
Осы орайда Түркістан қаласының әкімі Әзімбек Пазылбекұлы қала аумағындағы бірқатар өндірістік кәсіпорындарды аралап, жұмыс барысымен танысты. Іссапар барысында шаһар басшысы «Ақ Жол Фудс» жауапкершілігі шектеулі серіктестігінің өндірістік әлеуетін көріп, өндіріс процесі мен инфрақұрылыммен қамтылу барысымен танысты. Кәсіпорын жылына 1000 тоннадан астам нан өнімдерін өндірумен қатар, ет өнімдері – атап айтқанда, шұжық және сосиска түрлерін дайындаумен де айналысады. Түркістан қаласында орналасқан бұл өндіріс орны бүгінде 80 адамды тұрақты жұмыспен қамтып отыр.
Бұл жоба өңірдің азық-түлік қауіпсіздігін қамтамасыз етуге және жергілікті шағын және орта бизнесті дамытуға елеулі үлес қосуда. Түркістанда өндірістік және кәсіпкерлік әлеуетті арттыру мақсатында қала әкімдігі тарапынан жүйелі жұмыстар жүргізіліп келеді. Атап айтқанда, өндірістік аймақтарды инфрақұрылыммен қамту, инвесторларды қолдау және отандық өнім өндірушілерге нақты қолдау көрсету бағытында кешенді шаралар іске асуда.
Өндірістік нысандарды аралау барысында қала әкімі кәсіп иелерімен пікір алмасып, ұсыныс-тілектерін тыңдады. Сонымен қатар, жергілікті өнімдердің сапасын арттыру мен өндіріс ауқымын кеңейтуге бағытталған жұмыстар алдағы уақытта да жалғасын табатынын жеткізді.
Жалпы облыста тамақ, құрылыс материалдары, химия, жеңіл және жиһаз өнеркәсібі бағыттары бойынша ондаған өндіріс орындары жұмыс істейді. Өңдеу өнеркәсібі облыс экономикасының маңызды құрамдас бөлігіне айналып, өңірдің жалпы ішкі өніміндегі үлесі жылдан жылға артып келеді. Мемлекет басшысының тапсырмасына сәйкес, жоғары деңгейде өңделген өнім өндірісін ұлғайту, индустриялық-инновациялық жобаларды қолдау, және жергілікті шикізатты терең өңдеу басты басымдықтардың бірі болып отыр.
Қала аумағында орналасқан индустриялық аймақтарда жаңа өндіріс нысандары салынуда. Жоба аясында жергілікті және шетелдік инвесторлар тартылып, жүздеген жаңа жұмыс орны ашылды. Бұл өз кезегінде қаланың әлеуметтік-экономикалық дамуына оң ықпал етуде. Түркістан қаласының әкімдігі өндірістік кәсіпорындарға инженерлік инфрақұрылым тарту, жер телімдерін ұсыну, инвестициялық кеңестер өткізу сынды кешенді қолдау шараларын жүзеге асырып келеді. Сонымен қатар, «Жұмыспен қамту», «Кәсіпкерлікті дамыту» бағдарламалары арқылы өндіріс орындарын кадрлық қамтамасыз ету бағытында нақты жұмыстар атқарылуда. Алдағы уақытта қалада өнеркәсіптік жобаларды кеңейту, экспортқа бағытталған өнім көлемін ұлғайту, және жасыл өндіріс технологияларын енгізу жоспарланып отыр.
