Түркістан қаласында инфрақұрылыммен қатар жол-көлік жүйесін жақсарту мен көлік қозғалғыштығын жеңілдету мақсатында бірқатар ауқымды құрылыс жұмыстары және жөндеу жобалары жүзеге асып жатыр. Бұл жұмыстар тұрғындардың жайлылығы мен қауіпсіздігін қамтамасыз етуге, қаланың көркейтуге бағытталған үкіметтік және жергілікті билік органдарының бірлескен жобасы. Қалада жалпы 845 шақырымды құрайтын 875 көше бар, оларды қолданысқа жарамды жол жағдайлары бойынша бағалау жүргізілді.
Бұл жайлы Мемлекет басшысы Қасым‑Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында жол жөндеу‑жұмыстары мен көлік инфрақұрылымын дамыту мәселелері маңызды басымдықтардың бірі болып белгіленген. Жолдардың аудандық, облыстық деңгейде әрі қалаішілік қиылысуларда қауіпсіздік, жарықтандыру, жол белгілері, жаяу жүргіншілер өткелдері секілді қосалқы элементтердің сапасын жетілдіру тапсырмасы бар. Бұл көліктік қауіпсіздікке тікелей қатысты. Республикалық маңызы бар жолдар мен жергілікті көшелердің нормативтік талаптарға сай жағдайға жеткізілуі туралы міндеттемелер жүктелген. Осы орайда қала әкімі Әзімбек Пазылбекұлы құрылыс нысандарын аралап, Бекзат секторына қарасты О.Жандосов көшесін кеңейту және қайта жаңарту жұмыстарының барысымен танысты.
Жобаның жалпы ұзындығы — 1,3 шақырымды құрайды. Құрылыс жұмыстары аясында көше бойындағы ескі аяқжолдар толықтай бұзылып, жаңадан жиектастар орнату жұмыстарымен толық аяқталған. Қазіргі таңда жол жабындысын төсеуге дайындық ретінде жол негізін нығайту және тегістеу жұмыстары жүргізілуде. Жөндеу жұмыстарының барлығы бекітілген кестеге сай, кезең-кезеңімен іске асырылуда.
Жоспар бойынша О.Жандосов көшесінің жөндеу жұмыстары тамыз айында толығымен аяқталып, пайдалануға берілмек. Қала әкімі құрылыс жұмыстарын бақылау барысында мердігер мекемеге жұмыстарды сапалы әрі белгіленген мерзімде аяқтауды тапсырды. Сонымен қатар, жауапты бөлім басшыларына күнделікті мониторинг жүргізіп отыруды, тұрғындар тарапынан келіп түсетін ұсыныс-пікірлер мен шағымдарды жедел әрі тиімді қарастыруды жүктеді.
Қазіргі таңда Түркістан қаласы аумағында жалпы ұзындығы 845 шақырымды құрайтын 875 көше бар. Осы жолдардың 430,1 шақырымы немесе 50,3 пайызы жақсы және қанағаттанарлық жағдайда болса, 419,9 шақырымы немесе 49,7 пайызы қиыршық тасты жолдар санатына жатады. Биылғы жоспар аясында ұзындығы 138,5 шақырымды құрайтын 159 көшеге орташа жөндеу жұмыстарын жүргізу жоспарланған. Бұл жұмыстардың нәтижесінде жақсы және қанағатты жағдайдағы жолдардың үлесі 66,7 пайызға дейін артады деп күтілуде.
Жөндеу жұмыстары негізінен қаланың инфрақұрылым жүйелері толық аяқталған Шауғар, Яссы, Отырар және Бекзат тұрғын алаптарында жүргізіледі. Орташа жөндеу барысында көшелерге екі қабатты асфальт жабындысы төселіп, жол жиектері, аяқжолдар, мүмкіндігінше веложолдар мен жаңбыр суағар жүйелері орнатылады. Жөнделетін көшелердің басым бөлігі қаланың тарихи, яғни ескі бөлігінде орналасқан. Атап айтқанда, Тәуке хан, Әл-Фараби, Наурызым көшелері толықтай жаңартылып, пайдалануға берілді. Сонымен қатар, қазіргі уақытта С.Жандосов көшесін кеңейту және қайта жаңғырту жұмыстары жүргізілуде.
Мәселен, Тәуке хан көшесінде ұзындығы 5,1 шақырымды құрайтын асфальт қабаты жаңартылып, жол бөлу таңбалары толықтай қайта сызылды. Әл-Фараби көшесінің 1,8 шақырымына асфальт төселіп, жаяу жүргіншілер жолы мен жаңбыр суағар жүйелері салынды. Ал Жангелдин көшесінде 3,75 шақырым аумаққа ауыр жүк көліктерінің жүріп-тұруына бейімделген асфальт жабындысы төселіп, аяқжол, веложол және су ағатын арықтармен қамтылды.
Жалпы Түркістан қаласындағы жол жөндеу және құрылыс жұмыстары — тұрғындардың тұрмыс сапасын жақсартуға, көлік инфрақұрылымын тиімді дамытуға бағытталған маңызды қадам. Жүйелі жоспарлар мен сапалы орындалатын жобалар арқасында қаладағы жолдардың жай-күйі тез өзгеруде, ал болашақта да бұл жұмыстар жалғасын табатын болады.