Түркістан қаласында халықты нәтижелі жұмыспен қамту және еңбек нарығын тұрақты дамыту – әкімдіктің басты әлеуметтік бағыттарының бірі. Жұмыспен қамту саласындағы мемлекеттік бағдарламалар, кәсіптік оқыту, қоғамдық жұмыстар мен кәсіпкерлікті қолдау шараларының арқасында 2025 жылы қала тұрғындарының еңбекпен қамтылу деңгейі едәуір артты. Жалпы биылғы жыл «Жұмысшы мамандықтар жылы» деп жарияланып, бұл бастама аясында еңбек нарығында сұранысқа ие техникалық және кәсіби мамандықтарды дамытуға, жұмысшы кадрлардың мәртебесін көтеруге бағытталған жүйелі жұмыстар қолға алынды. Қала, аудан көлемінде бос жұмыс орындары жәрмеңкесі өтіп келеді.
Бұл шешім Мемлекет басшысының елдегі кәсіптік-техникалық білім мен еңбек адамына деген көзқарасты өзгерту жөніндегі тапсырмаларына сәйкес қабылданды. Ел Президентінің тапсырмасына және еңбек нарығындағы сұранысты ескере отырып, 2025 жыл Түркістан қаласында «Жұмысшы мамандықтар жылы» деп жарияланды. Бұл бастама техникалық және кәсіптік білімді дәріптеу, жұмысшы кадрларды даярлау жүйесін күшейту және жастарды нақты еңбек нарығына бейімдеуге бағытталған. Жастардың техникалық және өндірістік салаға бет бұруын арттыру, жұмыссыздықты төмендету және еңбекке адал көзқарасты қалыптастыру – осы бастаманың басты мақсаттары. Түркістан облысында бұл бағытта қыруар жұмыс атқарылып, нақты көрсеткіштер мен нәтижелерге қол жеткізілуде.
Бұл жұмыстар Түркістан облысының әкімі Нұралхан Көшеровтің төрағалығымен өткен жиында қаралды. Облыс басшысы жұмысшы мамандықтар жылында жүзеге асырылып жатқан шаралардың формальды емес, нақты нәтиже беруін қатаң тапсырды. Жұмыс орындарын көбейту, шетелдік инвесторлар тартқан өндірістерге отандық мамандарды даярлау, жастарды кәсіптік біліммен қамту сияқты өзекті мәселелер күн тәртібінде тұр.
Түркістан облыстық білім басқармасы «Жұмысшы мамандықтар жылына» арналған 64 бағыт, 138 іс-шарадан тұратын жоспар бекіткен. Оның ішінде жұмысшы мамандықтарын дәріптейтін форумдар, көрмелер, жәрмеңкелер, дуалды оқыту жүйесін кеңейту, кәсіптік бағдар беру, озық колледждердің инфрақұрылымын жетілдіру сынды нақты шаралар қарастырылған. Облыстағы 50 техникалық және кәсіптік білім беру ұйымында 47 450 студент 84 түрлі мамандық бойынша білім алуда. Биылғы жаңа оқу жылында 15 500 грант бөлінсе, соның ішінде 8 880 грант (61,9%) жұмысшы мамандықтарына берілді. Былтыр колледжді 12 538 түлек бітіріп, соның 75,7%-ы жұмыспен қамтылды. Мемлекеттік тапсырыспен білім алғандардың 79,5%-ы еңбекке араласқан. Биылғы түлектердің жұмысқа орналасу деңгейі алғашқы екі айда 48% көрсетіп отыр. Дуалды оқыту жүйесіне 36 колледжден 31 779 студент (35%) қатысуда. Студенттер нақты кәсіпорындарда тәжірибе жинап, оқуын бітіре салысымен жұмысқа тұру мүмкіндігіне ие болуда.
Жұмыс беруші мен жұмыс іздеуші арасындағы байланысты күшейту үшін Enbek.kz электронды еңбек биржасы белсенді қолданылып келеді. Түркістан облысы бойынша 2 178 бос жұмыс орны тіркелсе, соның 47%-ы жұмысшы мамандықтарына тиесілі. Онлайн оқыту арқылы 5 333 адам қайта даярланып, сертификат алды. 2025 жылы «Өңірлік жұмыс орындарын құру картасы» аясында 130 769 жұмыс орны ашу көзделсе, қыркүйекке дейін 100 807 жұмыс орны ашылып, соның 32 473-і жұмысшы мамандықтарына тиесілі. Мемлекет басшысының «10 мың тұрғынға 100 жаңа жұмыс орны» тапсырмасы аясында да жоспар артығымен орындалды – 117,8%. Жыл басынан бері 64 бос жұмыс орындары жәрмеңкесі өтті. 7 мыңға жуық бос жұмыс орны ұсынылды. Ашық есік күндері аясында 37 өндіріс орнына 10 мыңға жуық адам, оның ішінде мектеп оқушылары мен колледж студенттері барып, өндірісті өз көзімен көрді. Колледждерде бизнес-стартаптар, халықаралық аккредитация және жаңа жатақханалар салу жұмыстары да қолға алынған.
Түркістанда құрылыс, ауыл шаруашылығы, энергетика, көлік, қызмет көрсету салаларында жұмысшы мамандықтарға сұраныс артуда. 2025 жылы қала бойынша 5 000-ға жуық жұмысшы маманға сұраныс күтілуде. Қала әкімдігі, Жұмыспен қамту орталығы және жеке кәсіпкерлер арасында үшжақты келісімдер жасалып, білікті кадрларды тікелей жұмысқа орналастыру тетігі енгізілуде. 2025 жыл – Түркістан қаласында еңбек адамының беделін арттырып, жұмысшы мамандықтардың өзектілігін дәлелдейтін жыл болмақ. Қала әкімдігі бұл бағыттағы жұмыстарды жүйелі жалғастырып, жастарды кәсіби тұрғыда қолдауды негізгі міндет санайды. Жалпы қала көлемінде халықты нәтижелі жұмыспен қамту және жұмыссыздық деңгейін төмендету мақсатында бос жұмыс орындары жәрмеңкесі ұйымдастырылды. Іс-шараны Түркістан қалалық әкімдігі мен Жұмыспен қамту орталығы бірлесіп өткізді. Қаладағы ірі өндіріс орындары, құрылыс компаниялары, сервис қызметтері және агроөнеркәсіп кешені өкілдерімен 50-ден астам меморандумға қол қойылды. Түркістан индустриялық аймағында жаңадан ашылып жатқан кәсіпорындар білікті жұмысшы кадрларға тікелей сұраныс білдіруде. Бизнес қауымдастықтар мен халықаралық серіктестер (мысалы, GIZ, WorldSkills Kazakhstan) қолдау көрсетуде.
Сонымен қатар жұмыссыздық деңгейі – 4,8% (өткен жылмен салыстырғанда 0,6%-ға төмендеді) 3 200 адам тұрақты жұмысқа орналасты, 1 700 адам қоғамдық жұмыстарға тартылды, 900 жас жастар практикасы аясында жұмыс істеді. Білімсіз және біліктілігі жоқ 600 азамат қысқа мерзімді оқыту курстарынан өтті. 1 200 азамат өз кәсібін ашу үшін қайтарымсыз грант алды. 360 адам шағын несие алды (жалпы сомасы 1,6 млрд теңге)
Қала әкімдігі алдағы уақытта бұл бағыттағы жұмыстарды жүйелі түрде жалғастырып, әрбір азаматтың кәсіби дамуына жағдай жасауды басты міндет етіп отыр.