Бүгін, 26 қараша – көркемсөз бен көсемсөздің шебері, классик жазушы Мархабат Байғұттың пәни дүниеден өткен күні. Әдебиет әлеміндегі алыптың мәңгілік дүниесіне қайтқанына үш жыл толып үлгерді.
Осы орайда, бүгін Түркістан қаласындағы “FARAB” әмбебап-ғылыми кітапханасында Мархабат Байғұттың 80 жылдығы аясында «Мақамы бөлек Мархабат» атты жинақтың тұсаукесері өтті.
Түркістан облысы әкімдігінің қолдауымен, “FARAB” әмбебап ғылыми кітапханасы мен “Медиакратия” қоғамдық бірлестігінің, “Мархабат” журналының ұйымдастыруымен өткен басқосуда қаламгерлер, қоғам қайраткерлері мен жастар, жазушының жақын туыстары кітапханадағы Мархабат Байғұт атындағы залға көптеп жиналды.
«Мақамы бөлек Мархабат» атты жинаққа естеліктер, ғылыми мақалалар мен толғаныстар енгізілген. Жиынды Түркістан облыстық Мәдениет басқармасының басшысы Әзімхан Қойлыбаев ашты. Жазушының аяулы жары Қыздаркүл Пернебайқызы, інісі Нышан Байғұтов, ұлы Нұрлан Мархабатұлы жүрекжарды лебіздерін білдірді. Қалам ұстаған қауымның атынан Сейдолла Садықов, Асхан Майлыбаева, Роза Нарымбетова сағынышты сырға толы естеліктер айтты.
Мархабат Байғұт “AMANAT” партиясы Түркістан облыстық филиалы жанындағы “Miras” қоғамдық кеңесінің төрағасы қызметін абыроймен атқарған азамат. Қазір сол қоғамдық кеңесті біліктілікпен басқарып келе жатқан мәслихат депутаты Халима Жантөреқызы, осы кеңестің мүшесі, айтыскер ақын, “Алтын домбыра” иегері, облыстық мәслихаттың депутаты Бекарыс Шойбеков те оқырманға ой тастар пікірлерін ортаға салды. “Мархабат” журналының бас редакторы, республикалық жазба ақындар байқауында топ жарып жүрген, болашағынан үлкен үміт күттіретін жас талантты ақын, Мархабат Байғұт атындағы сыйлықтың иегері Сезім Мергенбай классик жазушыға арнаған тамаша жырын оқыды.
Тағылымды шарада “Мархабат Байғұттың туғанына 80 жыл” жобасының жетекшісі һәм “Медиакратия” қоғамдық бірлестігінің төрағасы, белгілі журналист Ғалымжан Елшібай елдің мұңын мұңдап, жоғын жоқтаған, қазақы болмысты дәріптеген қаламгердің рухани мұрасы жастар бойындағы патриоттық сезімді нығайтуға үлкен септігін тигізетінін баса атап өтті.
– «Мархабат Байғұттың туғанына 80 жыл» жобасы аясындағы мазмұнды әрі мағыналы іс-шаралар жыл бойы атқарылып келді. Әуелі “Мархабат” журналының ақпарат айдынына желкен керіп шығуына байланысты қаңтар айында Шымкенттегі Әл-Фараби атындағы кітапханада зиялы қауымға таныстырылымын жасадық. Көктемде «Мақамы бөлек Мархабат» атты халықаралық симпозиум өткіздік. Түркиядан, Өзбекстаннан, Қырғызстаннан және Қазақстанның Жазушылар Одағынан басшылық құрамы, айтулы қаламгерлер, мемлекет және қоғам қайраткерлері, Парламент депутаттары, ақпарат құралдарының жетекшілері, ғалымдар, әдебиет сыншылары қатысқан алқалы жиын түңлігі алдымен Түркістанда түрілді. Ертеңіне үшінші мегаполис Шымкентте халықаралық жиын жалғасты. Үшінші күні ауқымды іс-шара жазушының туған жері – Түлкібас ауданында “Таупістелі тағлымы” форумының төртінші мәрте ұйымдастырылуына ұласты. Облыс көлемінде «Мархабат оқулары» шығармашылық байқауы бірнеше айға созылып, өте тартысты өтті. Оған 720 талапкердің қатысуы біраз жайтты аңғартады. Ал классиктің публицистикасы мен прозасын талдап, таразылаған жастар, студенттер арасындағы байқауда еліміздің 7 өңірінен үміткерлер бақ сынады. Облыстық та, республикалық та байқаулардың жүлдегерлері симпозиумде марапатталды. Талантты қаламгер Нұрғали Ораздың Мархабат Байғұт өмірін өрнектеген су жаңа драматургиялық шығармасының үзіндісі сол халықаралық симпозиумде қойылды. Келер жылы Түркістандағы театрда толық нұсқасы сахналанып қалың көрерменге ұсынылмақ. Тек қазақ елі емес, күллі түркі әлеміне кеңінен танылған, мықтылығы мойындалған кемеңгер тұлғаның шығармалары әлем елдерінің талай тіліне аударылған. Әлі де аударыла бермек. Мәселен, алдағы аптада Өзбекстан астанасы Ташкент қаласында өзбек тіліндегі аудармасының кезекті тұсаушешері болады деп жоспарланып отыр. Кезекті деп отырғанымыз Мархабат Байғұттың туындылары бұған дейін де өзбекшеге аударылған болатын, – деді Ғалымжан Қамытбекұлы.
Мән-маңызы мол басқосуда Ғалымжан Қамытбекұлы қайсыбір іс-шаралар болмасын, барлығына іскерлікпен, ең бастысы шынайы жанашырлықпен атсалысқан “FARAB” әмбебап ғылыми кітапханасының директоры Жанат Шардарбековаға әдебиетсүйер қауымның атынан жүрекжарды лебізін жеткізіп, Алғыс хат тапсырды.
Мархабат Байғұттың 80 жылдық мерейтойына қорытынды есеп берген бұл жиын алдағы уақытта да классик жазушыны дәріптеуге, жан-жақты насихаттауға тұрақты түрде жалғасады. Әсіресе, Оңтүстікте Мархабат Байғұт атындағы Әдебиетшілер үйін ашу көптің қалауы. Қарапайым оқырманнан бастап еліміздегі, түркі дүниесіндегі Жазушылар Одағы басшылығы, қалам ұстаған қауым осы орынды ұсынысты бірауыздан қолдап отыр.
