Бүгін Басқармалар үйінің мәжіліс залында Сауран ауданының әкімі Мақсат Таңғатаровтың төрағалығымен мәдениет, тілдерді дамыту, дене шынықтыру және спорт бөлімі мен оған қарасты коммуналдық мемлекеттік мекеме басшыларының 2025 жылдың 11 айында атқарған жұмыстары бойынша есеп беру жиыны өтті.
Ресми кездесуге аудан әкімінің орынбасары Бақытжан Букебаев, аудандық Қоғамдық кеңестің төрағасы Серікбай Оразбеков, сала қызметкерлері және бұқаралық ақпарат құралдары өкілдері қатысты.
Күн тәртібіне сәйкес, алдымен мәдениет, тілдерді дамыту, дене шынықтыру және спорт бөлімінің басшысы Жанар Жаңабекқызы 2025 жылдың 11 айында атқарылған жұмыстар туралы баяндама жасады. Баяндамасында сала бойынша жүзеге асырылған жобалар, өткізілген мәдени-көпшілік және спорттық іс-шаралар, сондай-ақ алдағы кезеңге жоспарланған міндеттер кеңінен қамтылды.
Тілдерді оқыту және дамыту орталығының директоры Арман Сансызбайұлы орталықтың есептік кезеңдегі қызметі туралы баяндап, мемлекеттік тілдің қолдану аясын кеңейту бағытында атқарылған жұмыстарға тоқталды.
Келесі кезекте мәдениет үйінің директоры Ердәулет Төлегенұлы мәдениет саласындағы жұмыстарды таныстырса, аудандық кітапханалар жүйесінің 2025 жылдың 11 айындағы қызметі жөнінде Құндызай Ажмаханқызы баяндама жасады. Сондай-ақ бұқаралық және спорт түрлерін дамыту клубының директоры Нұрсұлтан Камалбекұлы мен Сауран спорт клубының директоры Еркін Ерсінұлы спорт саласында қол жеткізілген нәтижелер мен жетістіктер туралы есеп берді.
Жиын барысында қатысушылар тарапынан қойылған сұрақтарға сала басшылары тарапынан нақты жауаптар беріліп, өзекті мәселелер талқыланды.
Мәжілісті қорытындылаған аудан басшылығы мәдениет пен спорт салаларын дамыту бағытындағы жұмыстарды жүйелі түрде жалғастыру, көрсеткіштерді арттыру және халыққа көрсетілетін қызмет сапасын жақсарту жөнінде нақты тапсырмалар жүктеді.
Сонымен қатар жиналыс соңында мәдениет пен спорт саласының дамуына елеулі үлес қосып, өз қызметінде жоғары нәтижелерге қол жеткізген сала үздіктері Сауран ауданының әкімі Мақсат Таңғатаровтың алғыс хаттарымен марапатталды.
Аудан басшысы марапатталған қызметкерлерге алғысын білдіріп, алдағы жұмыстарына сәттілік тіледі.
