Мемлекеттік қызмет – халыққа қызмет етудің жоғары жауапкершілігін талап ететін ерекше сала. Бұл жүйенің тиімділігі мен қоғам сенімінің деңгейі тікелей мемлекеттік қызметшілердің кәсіби біліктілігімен ғана емес, олардың қызметтік әдеп нормаларын сақтауымен де тығыз байланысты.
Қызметтік әдеп – мемлекеттік қызметшінің күнделікті қызметіндегі мінез-құлқын айқындайтын негізгі қағидалар жиынтығы. Ол адалдық, әділдік, ашықтық, бейтараптық және жауапкершілік секілді құндылықтарға негізделеді. Әдеп нормаларын сақтау – әрбір қызметшінің кәсіби міндеті ғана емес, азаматтар алдындағы моральдық жауапкершілігі.
Мемлекеттік қызметші өз қызметінде заңдылықты қатаң сақтап, қызметтік өкілеттігін жеке басының мүддесіне пайдаланбауы тиіс. Сонымен қатар, әрбір азаматпен қарым-қатынас барысында сыпайылық танытып, олардың құқықтары мен заңды мүдделерін құрметтеуі қажет. Бұл – халық пен мемлекет арасындағы сенімді нығайтудың басты алғышарты.
Бүгінде қоғам тарапынан мемлекеттік қызметшілерге қойылатын талап жоғары. Сондықтан қызметтік әдеп нормаларын сақтау тек жұмыс орнында ғана емес, қызметтен тыс уақытта да маңызды. Мемлекеттік қызметшінің әрбір әрекеті мемлекеттік қызметтің беделіне әсер ететінін естен шығармаған жөн.
Осы бағытта мемлекеттік органдарда әдеп нормаларын түсіндіру, құқықтық сауаттылықты арттыру бойынша жүйелі жұмыстар жүргізілуде. Түрлі семинарлар, кездесулер мен оқыту іс-шаралары қызметшілердің кәсіби мәдениетін жетілдіруге ықпал етуде.
Қорытындылай келе, қызметтік әдепті сақтау – мемлекеттік қызметтің сапасын арттырудың маңызды факторы. Әдептілік, жауапкершілік және кәсібилік қағидаттарын ұстану арқылы ғана халық сеніміне ие болуға болады. Ал сенім – кез келген мемлекеттік орган жұмысының басты көрсеткіші.
Түркістан қаласы әкімі аппаратының басшысы, Әдеп жөніндегі уәкілі
Әлібеков Қуаныш Нұржанұлы
