Түркістан облысының командасы АҚШ-тың Техас штатындағы Хьюстон қаласында өткен робототехникадан әлем чемпионатында жоғары нәтиже көрсетіп, жүлделі марапатқа ие болды. Бұл жетістік тек білім мен технология саласының ғана емес, өңірдегі мәдени-рухани дамудың да айқын көрінісі. Себебі заманауи ғылым мен инновация ұлттық құндылықтармен ұштасқанда ғана жан-жақты дамыған тұлға қалыптасады. Түркістан өңірі – тарихи-мәдени мұраға бай аймақ. Осындай ортада тәрбиеленген жастар өз жобаларында археология тақырыбын таңдап, өткен мен бүгінді сабақтастыра білді. Бұл олардың тек техникалық білімін ғана емес, тарихи санасы мен мәдени танымының жоғары екенін көрсетеді.
Қазақстанның робототехника құрамасы FIRST World Championship аясында табысты өнер көрсетіп, жалпы 12 марапат жеңіп алды. Бұл – оқушылардың жоғары дайындық деңгейін айқын дәлелдейді.
Байқау George R. Brown Convention Center алаңында ұйымдастырылып, әлемнің түкпір-түкпірінен 50 мыңнан астам қатысушыны біріктірді. Қазақстан атынан рекордтық көрсеткіш – 225 оқушыдан құралған делегация қатысты.
Жарыс барысында Түркістан облысынан барған «Tolebi Daryn» командасы «Unearthed» тақырыбы аясында археология бағыты бойынша тың идеялар мен инновациялық жобаларын ұсынды. Қатысушылар төрт негізгі кезең бойынша сынға түсті: «Innovation Project» – инновациялық жобаларды қорғау, «Robot Performance» – 15 миссиядан тұратын роботтар ойыны, «Robot Design» – роботтың құрылымы мен бағдарламасын таныстыру және «Core Values» – командалық құндылықтарды көрсету.
Нәтижесінде, «Tolebi Daryn» командасы FIRST LEGO League Challenge (10–16 жас) санаты бойынша әлемнің үздік 5 командасының қатарына еніп, «Champions Award» финалисті атанып, жүлделі II орынды иеленді.
Бұл жетістік – өңірдегі білім беру саласының сапалы дамуы мен оқушылардың ғылыми-техникалық бағытқа деген қызығушылығының арта түскенінің көрінісі. Түркістан облысында соңғы жылдары инновациялық білім беру, IT және робототехника бағыттарын дамытуға ерекше көңіл бөлінуде. Заманауи білім беру орталықтарының ашылуы мен қосымша білім беру жүйесінің кеңеюі дарынды жастардың әлеуетін арттыруға мүмкіндік беріп отыр.
Жалпы, мұндай халықаралық деңгейдегі жетістіктер өңірдің әлеуметтік-экономикалық дамуына оң әсерін тигізіп, адами капиталдың сапасын арттыруға, бәсекеге қабілетті жас ұрпақты қалыптастыруға негіз болуда.
Бүгінде облыста мәдениет пен білім саласы өзара тығыз байланыста дамып келеді. Түрлі мәдени іс-шаралар, көрмелер, ғылыми жобалар мен шығармашылық байқаулар жастардың жан-жақты дамуына жол ашуда. Соның нәтижесінде оқушылар тек білім алып қана қоймай, ұлттық мәдениетті құрметтеп, оны заманауи форматта дәріптеуге ұмтылуда.
Халықаралық деңгейдегі мұндай жетістіктер өңір жастарының шығармашылық және зияткерлік әлеуетін арттырып қана қоймай, Түркістан облысының мәдени имиджін де көтере түсуде. Бұл – болашақта ғылым мен мәдениетті ұштастыра алатын жаңа буынның қалыптасып келе жатқанын айғақтайды.
