Түркістан облысында Мемлекет басшысының тапсырмасына сәйкес Ауыл аманаты жобасы жүйелі түрде жүзеге асырылып, ауылдық аумақтардың әлеуметтік-экономикалық дамуына серпін беріп келеді. Бағдарламаның негізгі мақсаты – ауыл тұрғындарының әл-ауқатын арттыру, кәсіпкерлікті дамыту, кооперацияны күшейту және жаңа жұмыс орындарын ашу.
Аталған жоба аясында ауыл тұрғындарына төмен пайызбен жеңілдетілген несиелер беріліп, өз ісін бастауға немесе кеңейтуге мүмкіндік жасалуда. Нәтижесінде өңірде шағын және орта бизнес субъектілерінің саны артып, ауыл экономикасының құрылымы әртараптандырылуда. Әсіресе мал шаруашылығы, құс шаруашылығы, егіншілік, жылыжай ісі және қызмет көрсету салалары қарқынды дамып келеді.
2023-2026 жылдары облыста «Ауыл аманаты» жобасын іске асыру үшін республикалық бюджеттен жалпы 30,2 млрд теңге бөлінді. Оның ішінде 2023 жылы 19,8 млрд теңге, 2024 жылы 3 млрд теңге және 2025 жылы 7,4 млрд теңге толық игерілді. Бөлінген қаражат есебінен 6 бағыт бойынша 4 221 жобаға, жалпы 30,2 млрд теңге несие берілді.
Аталған бағдарламаның іске асырылу барысы Түркістан облысы әкімінің төрғалығымен өткен жиналыста жан-жақты талқыланды. Өңір басшысы жобаларды жүзеге асыруда сапа мен нақты нәтижеге баса назар аудару қажеттігін атап өтіп, жауаптыларға бірқатар тапсырма жүктеді.
– «Ауыл аманаты» бағдарламасы арқылы жаңа жұмыс орындары мен кәсіпорындар ашылуға тиіс. Бөлінген қаражатты бірінші кезекте терең өңдеу саласына бағыттаған жөн. Ауадандарда осы бағдарламаны жүзеге асыруға бағытталған өндірістік ғимараттар салу жұмысын жандандыруды тапсырамын, – деген облыс әкімі аудан, қала әкімдеріне, тиісті жауаптыларға жұмысты ширату қажеттігін ескертті.
«Түркістан» әлеуметтік-кәсіпкерлік корпорациясының басқарма төрағасы Бекжан Бисенбаев бағдарламаның жүзеге асуы өңірімізде айқын әрі нақты нәтижелер көрсеткенін жеткізді. Нақтырақ айтсақ, шағын кәсіпкерлік 4221 бірлікке артты. Сонымен қатар 4635 жаңа жұмыс орны ашылды. Жалпы аумағы 29,3 гектарды құрайтын 593 жылыжай кешені салынып, мал басы 76887-ге ұлғайды. Бұдан бөлек 79 қайта өңдеу кәсіпорны іске қосылды. Атаулы әлеуметтік көмек алушылар саны 441 адамға азайды. Жүзеге асқан жобалардың нәтижесінде жыл сайын шамамен 30 млрд теңгенің ауыл шаруашылығы өнімі өндіріледі.
Мемлекет басшысының тапсырмасына сәйкес ауыл шаруашылығы кооперативтерін дамыту жұмыстары қарқын алуда. Қазіргі таңда қайта өңдеу саласы бойынша жалпы 54 жоба 1480 млн теңгеге қаржыландырылып, толық жүзеге асырылды.
Сонымен қатар жобаларды кешенді дамыту мақсатында Бәйдібек, Созақ, Ордабасы аудандары мен Кентау қаласында «Ауыл аманаты» жобаларына арналған ғимараттарын ашу жоспарланған. Бүгінде Бәйдібек ауданы Шаян ауылында тиісті жұмыстар жүріп жатыр. Мұнда тігін, кондитерлік, қолғап және сабын өндірісі бойынша 12 шағын жоба іске қосылып, 35 жаңа жұмыс орны ашылады. Ал Созақ ауданында кәсіпкерлер есебінен арнайы ғимарат ашылып, жеңіл өнеркәсіп бағытында 6 жоба жүзеге асырылуда.
Айта кетейік, Түркістан облысы аталған бағдарлама бойынша 2026 жылы республикадан 15,3 млрд теңге қаражат тартуды көздеп отыр. Бұл қаржы 1151 жаңа жобаны жүзеге асыруға және 2468 жаңа жұмыс орнын ашуға мүмкіндік береді. 2026 жылы өңірдің ауылдық округтерінде 4,6 млрд теңгеге қайта өңдеу саласын несиелендіру жоспарланған.
«Ауыл аманаты» жобасы ауылдық жерлерде табысты арттырумен қатар, еңбек нарығындағы теңгерімді қамтамасыз етуге де ықпал етуде. Жаңа жұмыс орындарының ашылуы жастардың ауылда тұрақтап қалуына және урбанизация үдерісін теңестіруге мүмкіндік беріп отыр. Бұл өз кезегінде өңірдің демографиялық және әлеуметтік тұрақтылығын нығайтады.
Сонымен қатар, бағдарлама аясында кооперативтер құруға ерекше көңіл бөлінуде. Ауыл тұрғындарының бірігіп жұмыс істеуі арқылы өндіріс көлемі ұлғайып, өнім сапасы артып, нарыққа шығу мүмкіндігі кеңеюде. Кооперация тетігі ауыл шаруашылығы өнімдерін өңдеу мен өткізу жүйесін тиімді ұйымдастыруға жол ашуда.
Инфрақұрылымдық тұрғыдан да оң өзгерістер байқалады. Ауылдарда өндірістік нысандар іске қосылып, логистикалық байланыстар күшейтілуде. Бұл ауыл шаруашылығы өнімдерінің ішкі нарыққа және экспортқа шығуын жеңілдетіп, өңірдің инвестициялық тартымдылығын арттыруға ықпал етуде.
Әлеуметтік тұрғыда «Ауыл аманаты» жобасы ауыл тұрғындарының өмір сүру сапасын жақсартуға бағытталған кешенді бастама ретінде бағаланады. Тұрғындардың табысының артуы білім, денсаулық сақтау және тұрмыстық жағдайларға да оң әсер етуде. Ауылдарда әлеуметтік нысандардың қолжетімділігі артып, инфрақұрылым біртіндеп жаңартылуда.
Жалпы алғанда, Түркістан облысында жүзеге асырылып жатқан бұл жоба ауылдық аумақтарды дамытуға жаңа серпін беріп, өңірдің әлеуметтік-экономикалық әлеуетін нығайтуда. «Ауыл аманаты» бастамасы ауыл экономикасын жаңғыртып қана қоймай, тұрғындардың өмір сапасын арттыруға және тұрақты дамуға негіз болып отыр.
