Түркістан облысы әкімінің орынбасары Ертай Алтаев Біріккен Ұлттар Ұйымының даму құқығы мәселелері жөніндегі арнайы баяндамашысы Сурья Девамен кездесті. Кездесу барысында облыс әкімінің орынбасары Түркістан өңірі қарқынды дамып келе жатқанын атап өтіп, экономика, инфрақұрылым, әлеуметтік сала бойынша оң көрсеткіштерге тоқталды.
– Түркістан өңірі әлеуметтік-экономикалық дамуды қамтамасыз етуде Біріккен Ұлттар Ұйымы жариялаған тұрақты даму мақсаттарына ерекше мән береді. 2026 жылғы 1 наурыздағы мәлімет бойынша Түркістан облысы халқының саны 2146,7 мың адамды құрады. Оның ішінде қалалықтар – 545,1 мың адам (25,4%), ауыл тұрғындары – 1601,6 мың адам (74,6%). Біз экономикалық өсім мен әлеуметтік әділеттілікті үйлестіруге, халықтың әл-ауқатын арттыруға және қоршаған ортаны қорғауға бағытталған кешенді саясат жүргізіп келеміз, – деді ол.
Айта кетейік, 2026 жылдың қаңтар-наурыз айларында Түркістан облысы қысқа мерзімді экономикалық өсім 119,4%-ды құрап, республикада 2-орынға ие болды.
Кездесуде экологиялық тұрақтылық мәселелері де кеңінен талқыланды. Өңірде табиғи ресурстарды ұтымды пайдалану, жасыл технологияларды енгізу және қоршаған ортаны қорғау шаралары жүйелі түрде жүзеге асырылып келеді. Сонымен қатар көші-қон және интеграция мәселелері де ерекше назарда. Облыста азаматтардың құқықтары мен мүмкіндіктерінің теңдігін қамтамасыз етуге және әлеуметтік үйлесімділікті нығайтуға бағытталған жұмыстар жүргізілуде.
Жиында гендерлік теңдік мәселесі де сөз болды. Түркістан облысы – демографиялық өсімі жоғары аймақ. Бүгінгі таңда, өңірде 400 мыңнан аса отбасы бар. Көпбалалы батыр аналардың басым бөлігі Түркістан облысында тұрады. Бүгінгі таңда Түркістан облысындағы 5611 мемлекеттік қызметшінің 1572-сі немесе 28,1%-ы – қыз-келіншектер. Оның ішінде, 233 әйел немесе басшылық лауазымдарды атқарады.
Сондай-ақ өңірде әйелдер қауымы барлық салаларда жемісті еңбектер көрсетуде. Облыс көлемінде шамамен 210258 мың кәсіпкер болса, оның 91 мыңнан астамы – әйелдер. Статистикаға сәйкес, шағын және орта кәсіпкерліктің 43,1%-ында әйел адамдары басшылық жасауда.
Кездесуде азаматтық қоғамды қолдау, отбасы құндылықтарын нығайту және әйелдердің қоғамдағы рөлін арттыруға бағытталған бастамалар да талқыланды.
Жиын соңында Ертай Кенжебекұлы БҰҰ арнайы баяндамашысының тәжірибесі мен сараптамалық көзқарасының өңір үшін маңызды екенін атап өтіп, пікір алмасу Түркістан облысының даму стратегиясын жетілдіруге және халықаралық тәжірибені енгізуге серпін беретінін жеткізді.
Түркістан облысы соңғы жылдары әлеуметтік-экономикалық даму тұрғысынан қарқынды өсім көрсетіп, экономика, инфрақұрылым және әлеуметтік сала бағыттарында айтарлықтай оң динамика қалыптастырып келеді. Өңірдің даму қарқыны мемлекеттік бағдарламалардың жүйелі жүзеге асырылуымен және инвестициялық белсенділіктің артуымен тікелей байланысты.
Экономика саласында облыс агроөнеркәсіптік кешенді дамытуға, өңдеу өнеркәсібін кеңейтуге және шағын орта бизнесті қолдауға басымдық беріп отыр. Ауыл шаруашылығында су үнемдеу технологияларын енгізу, балық шаруашылығын дамыту, жылыжай кешендерін көбейту және қайта өңдеу кәсіпорындарын іске қосу арқылы өндіріс көлемі артып келеді. Бұл бағыттар өңір экономикасын әртараптандыруға және жаңа жұмыс орындарын құруға мүмкіндік беруде.
Инфрақұрылымдық даму да қарқынды жүріп жатыр. Жол-көлік желілерін жаңғырту, елді мекендерді газдандыру, ауыз сумен қамтамасыз ету және электр желілерін жаңарту жұмыстары кезең-кезеңімен жүзеге асырылуда. Сонымен қатар, жаңа тұрғын үй алаптары мен әлеуметтік нысандар салынып, қалалар мен ауылдардың сәулеттік келбеті жақсарып келеді. Бұл тұрғындардың өмір сүру сапасын арттыруға тікелей әсер етуде.
Әлеуметтік салада да оң өзгерістер байқалады. Білім беру және денсаулық сақтау инфрақұрылымы жаңартылып, жаңа мектептер мен медициналық мекемелер ашылуда. Жастарды қолдау, спорт пен мәдениетті дамыту бағытында түрлі жобалар жүзеге асырылып, халықтың әлеуметтік белсенділігі артуда. Сонымен қатар, жұмыспен қамту бағдарламалары арқылы халықтың табысын арттыруға жағдай жасалуда.
Экологиялық бағытта да бірқатар маңызды жұмыстар атқарылуда. Көгалдандыру, көшет отырғызу, орман қорын ұлғайту және су ресурстарын тиімді пайдалану арқылы өңірдің табиғи ортасы жақсарып келеді. Бұл бастамалар ұзақ мерзімді тұрақты дамуға негіз болып отыр.
Түркістан облысының осындай кешенді дамуы оның республикалық деңгейде маңызды өңір ретінде қалыптасып келе жатқанын көрсетеді. Инвестициялық тартымдылықтың артуы, жаңа өндірістердің ашылуы және әлеуметтік инфрақұрылымның дамуы өңір экономикасының тұрақты өсуіне ықпал етуде.
Қорытындылай келе, Түркістан өңірінің экономика, инфрақұрылым және әлеуметтік салалардағы оң көрсеткіштері оның қарқынды дамып келе жатқанын және алдағы уақытта да тұрақты өсім траекториясын сақтайтынын айғақтайды.
