Жетісай ауданында 9 мамыр – Жеңіс күні мерекесі қарсаңында Ұлы Отан соғысының ардагері Петр Папков ерекше құрмет көрсетілді. Ғасыр жасаған қарт майдангерге Мемлекет басшысы Қасым-Жомарт Тоқаевтың арнайы мерекелік құттықтау хатын аудан әкімі Серік Мамытов салтанатты түрде табыс етті.
101 жастағы майдангерді құттықтау рәсіміне аудандық мәслихат төрағасы Медет Қасымов пен «AMANAT» партиясы Жетісай аудандық филиалының төрағасы Асқар Қайназаров, аудандық сот төрағасы Ермек Қожамқұлов пен аудан прокуроры Мырзахмет Өтегенов қатысып, ел қорғаған ерлердің ерлігі ешқашан ұмытылмайтынын, бейбіт өмір сыйлаған батырларға құрмет көрсету – бүгінгі ұрпақтың парызы екенін атап өтті.
Папков Петр Кузьмич 1925 жылдың 20 маусымында Татарстан Республикасының Максимовка селосында дүниеге келген. Сұрапыл соғыс жылдарында Киев, Бухарест, Венгрия бағытындағы кескілескен шайқастарға қатысып, Отан үшін от кешті. Майдан даласындағы батылдығы мен жанқиярлығы бүгінгі бейбіт өмірдің негізіне айналған ерліктің айқын көрінісі.
Соғыстан кейін, 1950 жылы елге оралған ардагер еңбек майданында да аянбай тер төкті. Трактор тізгіндеп, ауыл шаруашылығы мен құрылыс салаларында ұзақ жылдар жемісті еңбек етті. Ел алдындағы ерен еңбегі үшін «Ұлы Отан соғысы ардагері», «Еңбек ардагері», «Құрмет белгісі» секілді орден-медальдармен марапатталған.
Ардагерге көрсетіліп жатқан құрмет – елдің батырға деген тағзымының белгісі. Айта кетейік, ауданның соңғы майдангеріне 2024 жылы баспана кілті табысталған болатын. Сонымен қатар Ұлы Жеңістің 81 жылдығына орай облыс әкімі Нұралхан Көшеров, аудан әкімі Серік Мамытов пен ҚР Қорғаныс министрі Дәурен Қосанов тарапынан арнайы мерекелік құттықтаулар жолданып, 5 миллион теңгенің сертификаты мен мерекелік себет тарту етілген болатын.
Бүгінде бір ғасырлық ғұмыр кешкен Петр Кузьмичтің өнегелі өмір жолы – жас ұрпаққа үлгі. Ерлік пен елдік рухты дәріптеген ардагерлердің есімі халық жадында мәңгі сақталмақ.
Бұл тағылымды сәт тек бір ардагерге көрсетілген құрмет қана емес, жалпы Ұлы Отан соғысы ардагерлерінің барлығына деген алғыс пен ілтипаттың белгісі болды. Жетісай ауданы деңгейінде ұйымдастырылған мұндай іс-шаралар ел тарихын ұлықтауға, патриоттық тәрбиені күшейтуге және ұрпақтар сабақтастығын нығайтуға ықпал етеді.
Мұндай кездесулердің әлеуметтік және мәдени маңызы зор. Олар жас буынға бейбіт өмірдің құндылығын түсіндіріп, отансүйгіштік сезімді қалыптастырады. Сонымен қатар, ардагерлерге құрмет көрсету қоғамдағы адамгершілік құндылықтарды нығайтып, бірлік пен ынтымақты арттырады.
