Сарыағаш ауданының әкімі Арман Абдуллаев аудан аумағындағы бірқатар нысандарды аралап, құрылыс және абаттандыру жұмыстарының орындалу барысымен танысты. Жауапты сала басшыларына нақты тапсырмалар беріліп, жұмыстарды белгіленген мерзімде сапалы аяқтау қажеттігі қатаң ескертілді. Сонымен қатар, аудандық құрылыс, сәулет және қала құрылысы бөліміне жөндеу жұмыстарының барысын тұрақты бақылауда ұстау міндеттелді.
Алдымен аудан басшысы Қазығұрт ауданымен шектесетін аумақта орналасқан ауданның кіреберіс қақпасы – төлқұжат нысанын жаңғырту жұмыстарымен танысты. Қазіргі таңда нысанда іргетасын құю жұмыстары жүргізіліп, баспалдақ құрылысы аяқталуға жақын. Сондай-ақ тас қаптау жұмыстары атқарылуда.
Сонымен қатар, аудан әкімі Сарыағаш қаласы арқылы өтетін республикалық маңызы бар А-15 автомобиль жолы бойындағы абаттандыру және көркейту жұмыстарын да бақылап, жоба эскизімен танысты.
Бүгінде аталған жол бойында абаттандыру жұмыстары жүйелі түрде жүргізілуде. Құрылыс-монтаж жұмыстары мердігер мекеме – «BY Construction» ЖШС тарапынан атқарылуда. Жобаның тапсырыс берушісі – Сарыағаш қаласы әкімінің аппараты.
Сонымен қатар, Сарыағаш ауданының әкімі Арман Абдуллаев Дархан, Бостандық, Ақжар және Дихан баба елді мекендерінде салынып жатқан медициналық нысандардың құрылыс барысымен танысты. Нысандарды аралау барысында аудан басшысы құрылыс жұмыстарының сапасына ерекше назар аударуды тапсырды. Ауыл тұрғындарына сапалы медициналық қызмет көрсету үшін заманауи талаптарға сай нысандар салудың маңыздылығын атап өтті.
– Бүгінде аудан аумағында ауқымды құрылыс жұмыстары жүргізілуде. Соның ішінде тұрғындардың денсаулығын жақсартуға бағытталған медициналық нысандардың құрылысы басты назарда. Сондықтан ауылдық округ әкімдері мен мердігер мекеме өкілдеріне жұмыстарды сапалы жүргізуді, сондай-ақ қолданылатын құрал-жабдықтардың сапасына ерекше мән беруді тапсырамын, – деді аудан әкімі.
Қазіргі таңда, Көктерек ауылдық округіне қарасты Дархан елді мекенінде медициналық нысанның іргетасын құю жұмыстары жүргізілуде. Жартытөбе ауылдық округіндегі Бостандық елді мекенінде және Ақжар ауылдық округіне қарасты Ақжар елді мекенінде фельдшерлік-акушерлік пункттердің құрылысы жүргізіліп, кірпіш қалау жұмыстары атқарылуда. Ал, Жібек жолы ауылдық округіндегі Дихан баба елді мекенінде медициналық нысанның жер жұмыстары қолға алынған.
Айта кетсек, аталған нысандардың құрылысы белгіленген жоспарға сәйкес кезең-кезеңімен жүзеге асырылып, уақытылы пайдалануға беру көзделуде.
Одан бөлек, Сарыағаш ауданына қарасты Тегісшілдік ауылдық округіндегі Мәдениет елді мекенінде бой көтеріп жатқан 75 орындық мәдениет үйі мен кітапхана ғимаратының құрылыс барысы аудан әкімі Арман Абдуллаевтың бақылауында. Аудан басшысы нысан басында болып, атқарылып жатқан жұмыстардың сапасын пысықтады.
Тексеру барысында Арман Абдуллаев құрылыс жұмыстарының сапасына ерекше мән беру қажеттігін атап өтіп, жауапты сала мамандарына барлық жұмыстарды бекітілген талаптар мен стандарттарға сай, жоғары деңгейде орындауды қатаң тапсырды. Сонымен қатар, нысанның уақытылы әрі сапалы пайдалануға берілуі басты міндет екені ескертілді.
Аталған жоба «Мәдени объектілерді дамыту» бағдарламасы аясында жүзеге асырылуда. Қазіргі таңда ғимараттың сыртқы абаттандыру жұмыстары жүргізіліп, құрылыс үдерісі бекітілген жоспарға сәйкес қарқынды түрде жалғасуда. Нысанның мердігері – «Строительная компания «Люкс сервис» ЖШС, ал тапсырыс беруші – ауданның құрылыс және сәулет, қала құрылысы бөлімі.
Сондай-ақ, Сарыағаш ауданына қарасты Таскескен елді мекенінде кіші футбол және workout алаңшасы пайдалануға берілді. Әлеуметтік нысандардың салтанатты ашылу рәсіміне аудан әкімі Арман Абдуллаев қатысып, жергілікті тұрғындарды жаңа нысанның іске қосылуымен құттықтады. Сонымен қатар іс-шараға аудандық мәслихат депутаттары, жергілікті тұрғындар мен ауыл ақсақалдары қатысты. Ауыл тұрғындары игі бастаманың маңыздылығын атап өтіп, өз ризашылықтарын білдірді.
Аталған спорт алаңшасының құрылысы аудандық бюджет есебінен қаржыландырылып, «AIN Development» ЖШС тарапынан жүзеге асырылды. Нысан кіші футбол алаңымен қатар, заманауи workout құрылғыларымен толық жабдықталған.
Айта кетейік, жаңа алаңша ауыл тұрғындарының бос уақытын тиімді өткізуіне, дене шынықтырумен тұрақты айналысуына және түрлі спорттық іс-шаралар ұйымдастыруға мүмкіндік береді. Одан бөлек,
Сарыағаш ауданының әкімі Арман Абдуллаев «Өндірістік парк» аумағында құрылыс жұмыстарын жүргізіп жатқан кәсіпкерлермен кездесіп жобаны сапалы әрі белгіленген мерзімде аяқтаудың маңыздылығына ерекше тоқталды.
Жалпы аумағы 6,5 гектарды құрайтын өндірістік аймақта кәсіпкерлік ғимараттардың құрылысы инвесторлар қаражаты есебінен жүзеге асырылуда. Бүгінгі күні бір кәсіпкерлік нысанның құрылысы толық аяқталып, пайдалануға дайын күйге жеткізілді. Сонымен қатар, тағы төрт нысан бойынша құрылыс жұмыстары қарқынды түрде жалғасып жатыр.Инфрақұрылымды дамыту бағытында да жүйелі жұмыстар атқарылуда. Мердігер мекеме тарапынан электр, су және басқа да қажетті инженерлік желілерді тарту жұмыстары кезең-кезеңімен жүзеге асырылуда.
Айта кетсек, «Өндірістік парк» жобасы өңірдің инвестициялық әлеуетін арттырып, жаңа жұмыс орындарын ашуға, сондай-ақ шағын және орта бизнестің дамуына серпін береді деп күтілуде.
