Түркістан қаласындағы «Керуен сарай» туристік кешенінде дәстүрлі «Өнерлі өлке» облыстық өнер фестивалінің шымылдығы түріліп, мәдени шара Бәйдібек ауданының мәдени күндерімен бастау алды.
Фестиваль аясында келушілерге ауданның мәдениеті мен тыныс-тіршілігін танытатын арнайы бағдарламалар ұсынылады. Атап айтқанда, ұлттық қолөнер бұйымдарының шеберлік сағаттары, ауыл шаруашылығы өнімдерінің жәрмеңкесі, концерттік бағдарлама ұйымдастырылады. Сонымен қатар өңірдің тарихи мұрасы мен әлеуметтік-мәдени жетістіктері кеңінен насихатталады.
Кешкі уақытта «Керуен сарай» сахнасында аудан өнерпаздары мен қазақ эстрадасының танымал жұлдыздары қатысатын ауқымды гала-концерт ұйымдастырылады. Әсем ән мен күмбірлеген күй, ұлттық нақыштағы сахналық қойылымдар көрерменге ерекше рухани әсер сыйлайды.
Айта кетейік, «Өнерлі өлке» фестивалі – ұлттық өнерді ұлықтап, өңірлер арасындағы мәдени байланысты бекемдейтін тағылымды жоба. Рухани құндылықтарды дәріптеген фестиваль халқымыздың бай мәдени мұрасын насихаттап, өнер арқылы ел бірлігін айшықтай түседі.
