Келес ауданындағы барлық 67 білім беру ұйымында 2025–2026 оқу жылының аяқталуына арналған соңғы қоңырау салтанаты өтті. «Білімім – Отаныма!» тақырыбында ұйымдастырылған мерекелік іс-шараларда ұстаздар мен оқушылардың бір жылдық еңбегі қорытындыланып, мектеп бітіруші түлектерге ақ жол тілегі айтылды. Аудан әкімі Жәнібек Ағыбаев Ақтөбе ауылдық округіне қарасты №39 Л.Жолдасов атындағы жалпы білім беретін мектептегі салтанатты жиынға қатысып, түлектерді құттықтады.
Мерекелік шараға ұстаздар, ата-аналар, мектеп оқушылары мен аудан тұрғындары қатысты. Іс-шара Мемлекеттік Туды енгізу рәсімімен басталып, Қазақстан Республикасының Әнұраны орындалды. Сонымен қатар оқу жылы барысында жетістікке жеткен оқушылар мен түрлі білім додаларының жеңімпаздары көпшілікке таныстырылды. Жиында аудан басшысы білім саласының қоғам дамуындағы орнына ерекше тоқталды.
— Білім беру – ел болашағын айқындайтын стратегиялық маңызды сала. Білімді ұрпақ – Тәуелсіз Қазақстанның тірегі, ел ертеңінің сенімді кепілі. Бүгінгі жас түлектердің әрқайсысы туған елдің дамуына өз үлесін қосатын азамат болады деп сенемін, – деді аудан әкімі.
Сонымен қатар аудан әкімі ұстаздар қауымының еңбегін жоғары бағалап, ата-аналарға перзент тәрбиесіндегі жауапкершілігі үшін алғысын білдірді. Сондай-ақ биыл аудан бойынша 2284 оқушы мектеп бітіріп жатқанын, оның ішінде 108 түлек «Алтын белгіге», 192 оқушы үздік аттестатқа үміткер екенін атап өтті.
Мерекелік шара барысында оқушылардың қатысуымен көркем қойылымдар көрсетіліп, түлектердің вальс биі көпшілік назарына ұсынылды. Салтанатты жиын соңында соңғы қоңырау соғылып, түлектерге сәт сапар мен жарқын болашаққа ақ жол тілегі айтылды.
