«AMANAT» партиясының Сайлауалды бағдарламасын Түркістан облысында іске асыру жөніндегі Жол картасында 2023-2027 жылдар аралығындағы кезеңде ардагерлердің өмір сүру сапасын жақсартуға бағытталған 255 іс-шараны өткізу жоспарланған болса, осы бес жыл ішінде демеушілік көмек есебінен 425 ардагерге қолдау көрсету көзделген болатын.
Бұл бағыттағы жұмыстарымыз ең алдымен, 207 мыңнан аса зейнеткердің өмір сүру сапасын аумақтық партия филиалдары арқылы қадағалаудан басталды. «Ардагерлерді ардақтайық!» жобасымен өмірлік белестері 100 жастан асқан 51 қарияны атаулы және мерекелі күндері партия атынан құттықтау дәстүрі енгізілді. Қиын өмірлік жағдайларға тап болған қарттардың ахуалын әлеуметтік қамсыздандыру органдарының назарына жеткізу, демеушілік көмек көрсетуге ықпал ету мәселелері назарға алынды.
Партияның «Құқықтық көмек» жобасы шеңберінде ардагерлерге құжат рәсімдеу, кәсіби заңгерлік көмек көрсету бағыттарында жәрдем беріліп отыр. Партиямыздың тағы бір бастамасы – «Кедергісіз келешек» жобасы бойынша мүмкіндігі шектеулу азаматтар, оның ішінде мүгедектігі бар зейнеткерлер көп баратын қоғамдық орындардың қолжетімді болуын қамтуда азаматтық ұйымдармен, депутаттық корпус өкілдерімен қоғамдық бақылаулар жүргізіліп келеді. Жалғызілікті қариялардың денсаулық жағдайын медицина қызметкерлерінің бақылауынан өткізуде «Денсаулық керуені» акциясы тұрақты негізде өткізілуде.
Облыс басшылығының қолдауымен өңірімізде 23 «Белсенді ұзақ өмір сүру» орталықтары ашылса, соның 3 орталығы Түркістан қаласында салынып, қарияларды қолдау орындарына айналды. Ардагерлерге деген шынайы құрмет пен қоғамның қамқорлығының нәтижесінде ашылған бұл орталықтардың салынуы, жабдықталуы партияның бақылауында, фракция депутаттарының қадағалауында жүрді. Түркістан облысындағы Белсенді өмір сүру орталықтары қарттарға әлеуметтік, мәдени, психологиялық және сауықтыру қызметтерін көрседі. Мұнда дене шынықтыру және емдік гимнастика, йога, би, қолөнер, ән-күй, шахмат, компьютерлік сауаттылық сабақтары ұйымдастырылады. Сонымен қатар, психолог пен заңгер кеңестері де қарастырылған.
«- Белсенді өмір сүру орталығына келетін қариялардың өмірге деген құлшынысын күн сайын көріп жүрміз. Әсіресе би үйірмесіне қатысатын аға толқынның ынтасы ерекше. Олар мұнда серігіп, жаңа орта тауып, өздерін қоғамның белсенді мүшесі ретінде сезіну үшін келеді. Би – адамның денесін ғана емес, жан дүниесін де қозғалысқа түсіретін өнер. Жаттығулар барысында қариялардың қимылы ширап, денсаулығы жақсарып, көңіл күйі көтеріледі. Кейбір қатысушылар бастапқыда қысылып келгенімен, уақыт өте сахнаға шығып, түрлі шараларда өнер көрсетіп жүр. Бұл олардың өз-өзіне деген сенімін арттырды», – дейді Түркістан қаласындағы «Белсенді өмір сүру орталығының» хорегорафы, партияның Түркістан облыстық филиалы жанындағы Отбасы және халықты әлеуметтік қорғау кеңесінің мүшесі Ұлжан Мұстафаева.
Өңірімізде жыл сайын 8 мыңға жуық қария облыстық бюджет есебінен демалыс және сауықтыру орындарына барып, денсаулығын түзейді. Ардагерлерді жолдамамен қамтуға байланысты сұраныстар мен өзекті мәселелер облыстық партия филиалы жанындағы отбасы және халықты әлеуметтік қорғау мәселелері жөніндегі кеңесте қаралып, талқыланады. Партиямыз өмірден көргені мен түйгені көп қарттардың алаңсыз тынығып, салауатты өмір салтымен шұғылдануына барлық жағдай қарастырылуы керек деп біледі. Ардагерлердің денсаулық сақтау саласына қатысты сұраныстары мен өтініштерін облыстық партия филиалы жанындағы білім беру және денсаулық сақтау мәселелері жөніндегі кеңестің жұмыс отырыстарында қарау игі тәжірибеге айналды.
Ұлттың қадірі қартына деген ықыласынан көрінеді деп пайымдайтын Түркістан облысындағы аманаттықтар, 2025 жылы «Ардагерлерді ардақтайық» жобасы шеңберінде 1446 іс-шара өткізіп, оларға аға буын өкілдері санатынан 8 мыңнан астам адам қамтылды. Қоғамды біріктірген іс-шараларымыздың басым бөлігі «Белсенді өмір сүру орталықтары» мен ардагерлерге қызмет көрсететін медициналық-әлеуметтік мекемелерде өткізілді.
«AMANAT» партиясы Түркістан облыстық филиалының баспасөз қызметі
