ТҮРКІСТАН: САУРАН АУДАНЫНДА АУЫЛ ШАРУАШЫЛЫҒЫНА АРНАЛҒАН ДРОНДАР ӨНДІРІЛЕДІ

19

Бүгінде Сауран ауданында экономиканың тұрақты дамуын қамтамасыз ету, ауылдық аумақтардың мүмкіндігін тиімді пайдалану және жаңа өндіріс бағыттарын қалыптастыру негізгі басымдықтардың бірі болып отыр. Осы ретте ауыл шаруашылығына қажетті заманауи құрал-жабдықтар өндіру – өңір экономикасын әртараптандыруға мүмкіндік беретін маңызды қадам.

Ауыл шаруашылығына арналған дрондар өндірісі агросектордағы көптеген процестерді тиімді басқаруға мүмкіндік береді. Заманауи ұшқышсыз құрылғылар арқылы егістік алқаптарды бақылау, өсімдіктердің жағдайын бағалау, тыңайтқыштар мен қажетті препараттарды дәл мөлшерде енгізу, суару жүйелерін тиімді жоспарлау сияқты жұмыстарды автоматтандыруға болады. Бұл өз кезегінде ауыл шаруашылығы өнімділігін арттырып, өндіріс шығындарын азайтуға ықпал етеді.

Осы ретте Сауран ауданындағы «Шаға» өндіріс алаңында БАҚ өкілдеріне арналған пресс-тур ұйымдастырылды. Сапар мақсаты – ауданда жүзеге асырылып жатқан инвестициялық жобалармен таныстыру, өңірдің өндірістік әлеуетін көрсету. Тур аясында БАҚ өкілдері өндірістік алаңда жұмыс істеп тұрған кәсіпорындардың қызметімен танысып, инвестициялық жобалар жөнінде жан-жақты ақпарат алды. Алғашқы болып «BNK Group» кәсіпорны таныстырылды. Компания – ауыл шаруашылығы саласына арналған технологиялық жабдықтарды өндіретін жетекші қазақстандық кәсіпорындардың бірі саналады. Бүгінде «BNK Group» америкалық «Nelson Irrigation» компаниясымен бірлесіп, «BNK IRRIGATION» сауда белгісімен айналмалы және фронтальды жаңбырлатып суару құрылғыларын құрастырады. Сонымен қатар, кәсіпорында ауыл шаруашылығы техникалары құрастырылып, агродрондар дайындалады.

Пресс-тур бағдарламасы аясында «Aqniet Holding» кәсіпорнының өндірістік әлеуеті де таныстырылды. Компания білім беру ұйымдарына арналған жиһаз өндіруге маманданған. Соңғы үш жыл ішінде еліміз бойынша 50-ге жуық мектепті заманауи жиһазбен қамтамасыз еткен кәсіпорында «Жайлы мектеп» ұлттық жобасының талаптарына сәйкес өнімдер шығарылады. Сондай-ақ , онда «KAZMEDPRIBOR» компаниясымен бірлесіп медицина мекемелеріне арналған арнайы жабдықтар өндіріледі.
Сапар аясында «Юпитер-М» ЖШС-ң өндірістік жобасы таныстырылды. Кәсіпорын жаңбырлатып және тамшылатып суару жүйелерін өндіреді. Жылдық өндірістік қуаты 1750 тоннаны құрайтын зауыт бүгінде толық қуатында жұмыс істеп, өнімдерін ішкі нарықпен қатар Өзбекстан Республикасына экспорттауда. Кәсіпорында 20 жаңа жұмыс орны құрылған.
Сондай-ақ, БАҚ өкілдеріне «TURSAPA» полиэтилен өнімдерін шығаратын зауыттың өндірістік мүмкіндіктері көрсетілді. Кәсіпорында тұрмыстық және өндірістік мақсаттағы полиэтилен өнімдері мен әртүрлі көлемдегі қоқыс қаптары өндіріледі. Жоба ішкі нарықты сапалы отандық өніммен қамтамасыз етуге бағытталған.
Пресс-тур бағдарламасына «Turan Su» кәсіпорнының өндірісі де енгізілді. 2019 жылы құрылған мекеме ирригациялық жүйелерді күтіп ұстау, жөндеу және реконструкциялау жұмыстарымен айналысады. Сонымен қатар, кәсіпорын индустриялық парк аумағында тамшылатып суару құбырларын өндіретін жаңа зауытты іске қосқан. Өндірістің жылдық қуаты 183 мың шақырымнан астам тамшылатып суару ленталарын, 5 256 дана полиэтилен құбырларын және 2 117 шақырым шлангілерді шығаруға мүмкіндік береді. Кәсіпорында 20 қызметкер екі ауысымда еңбек етеді. Жоба ауыл шаруашылығында су үнемдеу технологияларын кеңінен енгізуге бағытталған.
БАҚ өкілдерінің назарына «Avatar Agricultural Technology Development» ЖШС жүзеге асырып жатқан агродрондар өндірісі де ұсынылды. Жоба аясында жылына 600 дана ауыл шаруашылығына арналған дрон шығару жоспарланған. Қазіргі уақытта өндірістік алаң дайындалып, қажетті құрал-жабдықтар толық орнатылған. Алғашқы сынамалық үлгілер әзірленген. Қазіргі кезде жобаны толық іске қосу үшін азаматтық авиация саласындағы тиісті рұқсат құжаттарын рәсімдеу жұмыстары жүргізілуде.
Бағдарлама аясында «Daulet Holding» кәсіпорнының өндірістік қызметі де таныстырылды. Кәсіпорын жылына 36 500 дана ішкі ағаш есік өндіреді. Өндіріс орнында 40-қа жуық адам тұрақты жұмыспен қамтылған. Заманауи технологиялар қолданылатын кәсіпорында шикізатты іріктеу, ағашты өңдеу, құрастыру және әрлеу жұмыстары толық өндірістік цикл бойынша жүзеге асырылады.

Сауран ауданы үшін мұндай жобалардың маңызы ерекше. Себебі аудан экономикасында ауыл шаруашылығы маңызды орын алады. Жер көлемін тиімді пайдалану, су ресурстарын үнемдеу және заманауи технологияларды енгізу арқылы аграрлық саланың бәсекеге қабілеттілігін арттыруға мүмкіндік бар. Дрон технологияларын пайдалану шаруалардың уақытын үнемдеп, өндіріс процесін нақты жоспарлауға жағдай жасайды.

Жаңа өндірістің іске қосылуы ауданның инвестициялық тартымдылығын арттырып, жоғары технологиялық бағыттағы кәсіпкерліктің дамуына жол ашады. Инновациялық жобалардың көбеюі Сауран ауданында тек ауыл шаруашылығы өнімдерін өндірумен шектелмей, заманауи өндіріс салаларын дамытуға мүмкіндік береді.

Жобаның жүзеге асуы жаңа жұмыс орындарын ашуға да мүмкіндік береді. Өндірісте инженерлік-техникалық мамандар, операторлар, қызмет көрсету саласының мамандары еңбек етіп, жергілікті халықтың жұмыспен қамтылуына ықпал етеді. Сонымен қатар жастардың заманауи мамандықтарды игеруіне және инновациялық бағыттарға қызығушылығын арттыруға жағдай жасалады.

Инвестиция тарту – Сауран ауданындағы экономикалық өсудің маңызды тетігі. Жаңа өндірістердің ашылуы кәсіпкерлік белсенділікті арттырып, жергілікті бюджет кірістерінің өсуіне, өндірістік әлеуеттің кеңеюіне және ауданның экономикалық өзін-өзі қамтамасыз ету деңгейінің жоғарылауына ықпал етеді.

Ауыл шаруашылығына арналған дрондар өндірісі тек бір кәсіпорынның дамуы емес, тұтас агроөнеркәсіптік жүйені жаңғыртуға бағытталған бастама болып табылады. Мұндай жобалар арқылы жергілікті шаруаларға жаңа технологиялар қолжетімді болып, ауыл шаруашылығы өндірісінің тиімділігі артады.

Сауран ауданында жүзеге асырылып жатқан инвестициялық және өндірістік жобалар өңірдің экономикалық мүмкіндіктерін кеңейтіп, ауылдық аумақтардың әлеуетін тиімді пайдалануға бағытталған. Алдағы уақытта да жаңа технологияларды енгізу, инвестиция тарту, кәсіпкерлікті қолдау және экономиканы әртараптандыру бағытындағы жұмыстар жалғаса береді.

Ауыл шаруашылығына арналған дрондар өндірісі – Сауран ауданын заманауи агротехнологиялар енгізілген, инновациялық өндірісі дамыған өңірлердің біріне айналдыру жолындағы маңызды қадамдардың бірі.