Сауран ауданында экономиканың тұрақты өсімін қамтамасыз ету, экономикалық өзін-өзі қамтамасыз ету деңгейін арттыру және жаңа өндірістерді қалыптастыру бағытындағы жұмыстар жүйелі түрде жалғасуда. Мемлекет басшысы жүктеген экономиканы әртараптандыру, өңдеу өнеркәсібін дамыту және инвестициялық ахуалды жақсарту жөніндегі міндеттерді іске асыру аясында ауданда өндірістік инфрақұрылымды дамытуға басымдық беріліп келеді.
Бүгінде аудан экономикасының негізгі қозғаушы күштерінің бірі – шағын және орта кәсіпкерлікті қолдау арқылы өндіріс саласын дамыту. Осы мақсатта Шаға ауылдық округінде кәсіпкерлерге арналған шағын өндірістік алаң құрылып, ол өңірдегі индустриялық дамудың маңызды орталығына айналды.
Қазіргі таңда өндірістік алаңда 40 өндірістік нысанның құрылысы аяқталып, оның 16 цехы толық іске қосылды. Нәтижесінде 700-ге жуық жаңа тұрақты жұмыс орны ашылып, аудан тұрғындарын жұмыспен қамтуға елеулі үлес қосылды.
Іске қосылған кәсіпорындар өңдеу өнеркәсібінің түрлі бағыттарын қамтиды. Атап айтқанда, «BNK Group» жауапкершілігі шектеулі серіктестігі үш өндірістік ғимаратта жаңбырлатып және тамшылатып суару жүйелерін шығаруда. Бұл өнімдер ауыл шаруашылығында су үнемдеу технологияларын енгізуге мүмкіндік береді.
«Aqniyet Holding» жауапкершілігі шектеулі серіктестігі бес өндірістік ғимаратта жиһаз өндірісін жолға қойып, ішкі нарықты сапалы отандық өніммен қамтамасыз етуге үлес қосуда. Сонымен қатар «Daulet Holding» кәсіпорны ағаш есіктерін өндіруді жүзеге асырып, құрылыс саласына қажетті өнім шығаруда.
Өнеркәсіптік тоңазытқыш жабдықтарын өндіретін «Zhasyl suyuq» жауапкершілігі шектеулі серіктестігі бес өндірістік ғимаратта жұмысын жүргізсе, «Тұран Су» кәсіпорны су құбырларын өндіруді қолға алған. Ал «Тур Сапа» жауапкершілігі шектеулі серіктестігі қоқыс қалталарын шығару арқылы тұрмыстық қажеттілікке арналған өнімдер өндірісін дамытып келеді.
Жыл соңына дейін өндірістік алаңдағы қалған 24 ғимаратқа жаңа өндірістер орналастырылады. Олардың қатарында ауыл шаруашылығы дрондарын құрастыру, модульдік және капсулалық үйлер өндіру, ауыл шаруашылығы техникаларын жинақтау, кептірілген көкөніс өнімдерін өңдеу, сондай-ақ электроника және пластмасса бұйымдарын шығаратын кәсіпорындар іске қосылады. Бұл өндірістер аудан экономикасының құрылымын әртараптандырып, жоғары технологиялы өнім шығаруға мүмкіндік береді.
Өндірістік әлеуетті арттыру мақсатында ауданның басқа ауылдық округтерінде де жаңа индустриялық алаңдар құрылуда.
Қарашық ауылдық округінде 10 гектар аумақта жалпы инвестиция көлемі 4,8 миллиард теңгені құрайтын өндірістік аймақ қалыптасуда. Мұнда жиһаз, пластик өнімдері, құрылыс материалдары және тігін өндірісі бағытындағы кәсіпорындар орналасады. Жоба толық іске қосылғанда 170 жаңа жұмыс орны ашылады. Биылғы жылдың соңына дейін 10 цех пайдалануға беріледі.
Иассы ауылдық округінде 9 гектар аумақта инвестиция көлемі 6,3 миллиард теңгені құрайтын өндірістік кешеннің құрылысы қарқынды жүргізілуде. Онда жиһаз, пластик өнімдері, құрылыс материалдары және тігін өндірісі жолға қойылып, жалпы саны 430 жаңа жұмыс орны ашылады. Жыл соңына дейін 15 өндірістік цех іске қосылады деп жоспарланған.
Қосмезгіл ауылында жеке кәсіпкер Ықпал Әбішовтің бастамасымен 8 гектар аумақта өндірістік алаң құрылуда. Инвестиция көлемі 3 миллиард теңгені құрайтын жоба аясында 10 өндірістік ғимарат салу көзделген. Қазіргі уақытта үш нысанның құрылысы жүргізілуде.
Үшқайық ауылдық округінде 18 гектар жерге жиһаз өндірісіне маманданған 16 өндірістік ғимараттың құрылысы басталды. Жалпы инвестиция көлемі 8 миллиард теңгені құрайтын бұл жоба өңірдегі жиһаз кластерін қалыптастыруға бағытталған.
Жүйнек ауылында 30 гектар аумақта өндірістік аймақ құрылып, жоспарланған 16 цехтың 12-сінің құрылысы аяқталды. Мұнда жиһаз және құрылыс материалдарын өндіретін кәсіпорындар орналасып, 550 жаңа жұмыс орны ашылады. Жобаның жалпы инвестиция көлемі 16 миллиард теңгені құрайды.
Еңбекші Дихан елді мекенінде орналасқан «ДәмОрда» өндірістік алаңы азық-түлік өндірісін дамытуға бағытталған маңызды жобалардың бірі саналады. Жалпы инвестиция көлемі 3,8 миллиард теңгені құрайтын кешенде 18 өндірістік цехтың құрылысы жүргізілуде. Мұнда нан, кондитерлік, ет, сүт және кептірілген жеміс өнімдерін өндіретін кәсіпорындар іске қосылып, 280 жаңа жұмыс орны ашылады.
Алдағы кезеңде өндірістік инфрақұрылымды кеңейту жұмыстары жалғасады. Оранғай елді мекенінде жиһаз өндіруге маманданған сегіз өндірістік ғимарат салу, ал Шорнақ ауылдық округінде құрылыс материалдарын өндіретін жаңа өндірістік алаң қалыптастыру жоспарланып отыр. Бұл жобалар ауданның өндірістік қуатын еселеп, жаңа инвестиция тартуға және кәсіпкерлік белсенділікті арттыруға мүмкіндік береді.
Жалпы, Сауран ауданында жүзеге асырылып жатқан өндірістік жобалар экономиканы әртараптандырудың нақты көрінісі болып табылады. Ауыл шаруашылығымен қатар өңдеу өнеркәсібін, жиһаз өндірісін, құрылыс индустриясын, азық-түлік өндірісін және инновациялық технологияларға негізделген кәсіпорындарды дамыту арқылы ауданның экономикалық өзін-өзі қамтамасыз ету деңгейі артып келеді. Инвестициялық жобалардың көбеюі жаңа жұмыс орындарын ашып қана қоймай, жергілікті бюджет кірістерінің ұлғаюына, экспорттық әлеуеттің артуына және тұрғындардың әл-ауқатының жақсаруына негіз қалайды. Бұл бастамалар Сауран ауданын Түркістан облысындағы индустриялық және кәсіпкерлік дамудың жетекші орталықтарының біріне айналдыруға берік негіз қалыптастыруда.
