Сауран ауданында экономиканың орнықты дамуын қамтамасыз ету, өңірдің экономикалық өзін-өзі қамтамасыз ету деңгейін көтеру және экономиканы әртараптандыру бағытындағы жұмыстар агроөнеркәсіп кешенін жаңа деңгейге көтеруден бастау алуда. Табиғи ресурстарды тиімді пайдалану, ауыл шаруашылығына инвестиция тарту, өндірістік инфрақұрылымды дамыту және өнімді терең өңдеу арқылы ауданның экономикалық әлеуеті жылдан-жылға артып келеді.
Ауданның даму стратегиясында аграрлық сектор экономиканың негізгі тіректерінің бірі ретінде айқындалған. Сондықтан егіншілікпен қатар мал шаруашылығы, құс шаруашылығы, балық шаруашылығы және ауыл шаруашылығы өнімдерін қайта өңдеу бағыттары кешенді түрде дамытылып келеді. Бұл өз кезегінде аудан экономикасының тұрақтылығын нығайтып, ішкі нарықты сапалы азық-түлікпен қамтамасыз етуге және экспорттық әлеуетті арттыруға мүмкіндік беруде.
Бүгінде Сауран ауданының жалпы жер көлемі 646 мың гектарды құрайды. Оның 312 мың гектары ауыл шаруашылығы мақсатындағы жерлер болса, 56 мың гектары суармалы алқаптар. Сонымен қатар ауданда 257 мың гектар жайылым және тұрғындардың ортақ пайдалануындағы 55 мың гектар жайылым жері бар. Мұндай жер қоры ауыл шаруашылығы өндірісін кеңейтуге және жаңа инвестициялық жобаларды іске асыруға қолайлы жағдай қалыптастырады.
Ауыл шаруашылығы саласының тұрақты дамуы мал басының көбеюіне де оң әсер етуде. Қазіргі таңда ауданда 363,7 мың бас мал және 51 мың бас құс өсірілуде. 2025 жылдың қорытындысы бойынша мал шаруашылығы өнімдерінің көлемі 24,8 миллиард теңгеге жетіп, өткен жылдың сәйкес кезеңімен салыстырғанда 106,4 пайызға артты.
Нақты көрсеткіштер бойынша 13 мың тонна ет, 23,8 мың тонна сүт және 18,1 миллион дана жұмыртқа өндірілді. Бұл көрсеткіштер ауданның азық-түлік қауіпсіздігін қамтамасыз етудегі рөлін күшейтіп қана қоймай, өңірдің экономикалық белсенділігінің артып келе жатқанын көрсетеді.
Салаға инвестиция тарту жұмыстары да қарқын алып келеді. Биыл ауыл шаруашылығының негізгі капиталына 17,2 миллиард теңге инвестиция бағытталып, өткен жылдың сәйкес кезеңімен салыстырғанда 112,5 пайыз өсімге қол жеткізілді. Бұл қаржы жаңа өндірістер ашуға, техникалық жаңғыртуға және аграрлық инфрақұрылымды дамытуға жұмсалуда.
Экономиканы әртараптандыру аясында ауданда мал шаруашылығын өнеркәсіптік негізде дамытуға ерекше көңіл бөлінуде. Осы мақсатта 12 ауылдық округтен жалпы көлемі 200 гектар жер белгіленіп, 206 мал бордақылау алаңын салу жоспарланған. Қазіргі таңда оның 56-сының құрылыс жұмыстары жүргізілуде.
Ескі Иқан ауылдық округінде бұл бағыттағы ірі жобалардың бірі жүзеге асуда. Мұнда 40 гектар аумақ бөлініп, 53 шаруаға 50 сотықтан жер телімдері берілген. Жалпы қуаттылығы 25 мың басқа арналған кешенде бүгінде 27 бордақылау алаңының құрылысы жүріп жатыр. Әрбір алаңда 100-ден 500 басқа дейін ірі қара мал бордақыланады.
Жоба аясында тәулігіне 120 басқа дейін қызмет көрсететін орталықтандырылған мал сою кешені, етті қайта өңдеу өндірісі және 1000 тонна сыйымдылығы бар заманауи тоңазытқыш қоймасы салынады. Бұл ауыл шаруашылығы өнімдерін терең өңдеп, қосылған құны жоғары дайын өнім шығаруға мүмкіндік береді. Осындай өндірістік үлгілер алдағы уақытта ауданның басқа ауылдық округтерінде де кезең-кезеңімен енгізілмек.
Бабайқорған ауылдық округінде «Мырзахан» шаруа қожалығының бастамасымен 20 гектар аумақта 10 мың басқа арналған мал бордақылау кешені салынып жатыр. Инвестиция көлемі 8 миллиард теңгені құрайтын бұл жоба өңірдегі ет өндірісін ұлғайтуға және экспорттық әлеуетті арттыруға бағытталған.
Ал Оранғай ауылдық округінде «Жасыл аймақтар» ауыл шаруашылығы өндірістік кооперативі жүзеге асырған 5 мың басқа арналған мал бордақылау алаңы пайдалануға берілді. Құны 1 миллиард теңгені құрайтын бұл жоба ауыл тұрғындарын тұрақты жұмыспен қамтып, сапалы ет өндірісінің көлемін арттыруға мүмкіндік беруде.
Экономиканы әртараптандырудың тағы бір маңызды бағыты – балық шаруашылығын дамыту. Үшқайық ауылдық округінде 28 гектар аумақта осы сала бойынша 18 инвестициялық жоба жүзеге асырылуда. Қазіргі уақытта олардың 11-інің құрылыс жұмыстары жүргізіліп жатыр. Жалпы құны 1 миллиард теңгені құрайтын жобалар толық іске қосылғанда 40 жаңа тұрақты жұмыс орны ашылады.
Су ресурстарын тиімді пайдалану да ауданның аграрлық саясатының негізгі басымдықтарының бірі. Бүгінде Сауран ауданында 8 893 гектар жерге су үнемдеу технологиялары енгізіліп, бұл жалпы суармалы жер көлемінің 15,8 пайызын құрап отыр. 2025 жылы бұл көрсеткішті 2 677 гектарға жеткізу жоспарланғанымен, нақты нәтижесінде 3 150 гектар жерге жаңа технологиялар орнатылып, жоспар артығымен орындалды.
Тамшылатып және жаңбырлатып суару жүйелерінің кеңінен енгізілуі су ресурстарын үнемдеуге, өнімділікті арттыруға және климаттық өзгерістерге бейімделуге мүмкіндік береді. Сонымен қатар бұл технологиялар өндіріс шығындарын азайтып, ауыл шаруашылығы өнімдерінің өзіндік құнын төмендетуге ықпал етеді.
Алдағы кезеңде Сауран ауданында ауыл шаруашылығы өнімдерін қайта өңдеу кәсіпорындарының санын көбейту, заманауи қойма және логистикалық орталықтар салу, агроөнеркәсіптік кооперацияны кеңейту және цифрлық технологияларды өндіріске енгізу жоспарланып отыр. Бұл шаралар өнімнің сапасын арттыруға, ішкі нарықты отандық өніммен қамтамасыз етуге және экспорт көлемін ұлғайтуға мүмкіндік береді.
Жалпы, Сауран ауданында жүзеге асырылып жатқан аграрлық жобалар өңір экономикасының жаңа сапалы кезеңге өткенін көрсетеді. Инвестиция көлемінің ұлғаюы, өндірістік инфрақұрылымның дамуы, ауыл шаруашылығын технологиялық жаңғырту және қайта өңдеу өндірістерінің көбеюі ауданның экономикалық өзін-өзі қамтамасыз ету деңгейін нығайтып келеді. Экономиканы әртараптандыру арқылы Сауран ауданында жаңа өндіріс орындары ашылып, тұрақты жұмыс орындары көбейіп, өңірдің азық-түлік қауіпсіздігі күшейіп, ұзақ мерзімді әлеуметтік-экономикалық өсімге берік негіз қалануда.
