Сауран ауданы әкімдігінің мәжіліс залында «Заң мен тәртіп – тұрақтылықтың негізі» тақырыбында жиын өтті. Басқосуда заң үстемдігін қамтамасыз ету, қоғамдық тәртіпті сақтау және құқық бұзушылықтың алдын алу мәселелері талқыланды.
Жиын аудан әкімдігі мен Түркістан облысы қоғамдық даму басқармасы «Қоғамдық келісім» КММ Сауран аудандық филиалының ұйымдастыруымен өтті.
Іс-шараға «Жаңару» сыбайлас жемқорлыққа қарсы жалпыұлттық қозғалысы» РҚБ Түркістан облысы бойынша төрағасы Ғани Рысбеков, аудандық ішкі саясат бөлімінің басшысы Марат Қалеке, «Қоғамдық келісім» КММ Сауран аудандық филиалының басшысы Арсылан Раматуллаев, прокуратура және полиция өкілдері, білім саласының қызметкерлері, қоғамдық ұйым мүшелері, медиаторлар, жастар және БАҚ өкілдері қатысты.
Жиын барысында азаматтардың құқықтары мен қауіпсіздігін қорғау, құқық бұзушылықтың алдын алу, этносаралық келісім мен қоғамдық тұрақтылықты нығайту бағытындағы жұмыстар сөз болды.
«Жаңару» сыбайлас жемқорлыққа қарсы жалпыұлттық қозғалысының Түркістан облысы бойынша төрағасы Ғани Рысбеков өңірдегі заңдылықты сақтау, сыбайлас жемқорлықтың алдын алу, қоғамда адалдық пен парасаттылық құндылықтарын қалыптастыру және азаматтық белсенділікті арттыру бағытында атқарылып жатқан жұмыстарға тоқталды.
Сондай-ақ семинарда «Қарнақ-Шекербұлақ» бауырлас ауылдары бойынша іс-шаралар жоспарының орындалуы туралы Жүйнек ауылдық округіндегі «Қазыбек би» атындағы мектеп директоры Жұман Досманов баяндама жасады.
Сауран ауданында заңдылықты қамтамасыз ету, қоғамдық тәртіпті сақтау және құқық бұзушылықтың алдын алу бойынша атқарылып жатқан жұмыстар жөнінде аудандық полиция бөлімі бастығының орынбасары Данияр Түймебаев ақпарат берді.
Басқосу барысында қатысушылар пікірлері мен ұсыныстарын ортаға салып, аудан аумағында заң мен тәртіпті нығайту, құқық бұзушылықтың алдын алу және қоғамдық келісімді одан әрі күшейту жолдарын талқылады.
Жиын соңында қатысушылар ел бірлігі мен ортақ Отанға деген сүйіспеншілікті дәріптейтін «Атамекен» әнін бірге орындады.
