Түркістан облысының әкімі Нұралхан Көшеров Түркістан қаласындағы Т.Бокин көшесінде орналасқан көпқабатты үйлердің жағдайымен танысып, тұрғындармен кездесті. Аталған аумақта жүргізіліп жатқан жаңғырту, абаттандыру және көгалдандыру жұмыстары «Таза Қазақстан» бағдарламасының нақты нәтижесін көрсетіп отыр.
Облыс әкіміне тұрғын үйлердің қазіргі жай-күйі, инфрақұрылымы және абаттандырылуы жөнінде баяндалды. Кездесу барысында тұрғындардың ұсыныс-пікірлері мен өзекті мәселелері тыңдалды.
– Мемлекет тарапынан тұрғындарға қолайлы әрі қауіпсіз орта қалыптастыру үшін қажетті жағдайлар жасалып жатыр. Аулаларды абаттандыру, тұрғын үйлердің жағдайын жақсарту, инфрақұрылымын жаңарту және қауіпсіздікті қамтамасыз ету бағытындағы жұмыстар жалғасады. Ал осы жаңарған үйді ұқыпты пайдалану, ауланы таза ұстау – тұрғындардың ортақ міндеті. Әрқайсымыз өз ауламыздың тазалығына жауапкершілікпен қарасақ, «Таза Қазақстан» бағдарламасының мәні де осында. Әрбір шағынаудандағы тұрғындар өздеріңіз секілді ауланы көгалдандырып, жанашырлықпен қараса, сана да тазара түсетіні анық, – деді Нұралхан Көшеров.
Тұрғындар үйлердің жаңғыртылып, шатырлары ауысып, жөндеу жұмыстары жүргізілгенін, аумақта тазалық пен абаттандыру жұмыстарының қолға алынғанын атап өтіп, облыс басшысына ризашылықтарын білдірді.
Бұл аумақтың басты ерекшеліктерінің бірі – тұрғындардың өз ауласын таза ұстауға және көгалдандыруға белсенді атсалысуы. Үй ауласында жасыл желек жайқалып, тұрғындардың ортақ кеңістікке деген жанашырлығы анық байқалады. Бұл – экологиялық мәдениеттің қалыптасып келе жатқанының жақсы мысалы.
Т.Бокин көшесі Түркістан қаласының Яссы тұрғын үй алқабында орналасқан. Тұрғын үйлер 1950-1989 жылдар аралығында салынған. Мұнда екі қабатты 18 тұрғын үй бар. Жалпы 298 пәтердің ауданы 15 191 шаршы метрді құрайды. Аумақ қажетті инженерлік инфрақұрылым жүйелерімен толық қамтылған.
Көпқабатты тұрғын үйлер автономды газ жүйесіне көшірілген. Бұл тұрғындарды тұрақты әрі тиімді энергия көзімен қамтамасыз етуге мүмкіндік береді. Газ инфрақұрылымын пайдалану кезінде қауіпсіздік талаптарын сақтау және энергия ресурстарын үнемді тұтыну да маңызды. Заманауи инженерлік жүйелердің тиімді жұмыс істеуі тұрғындардың жайлылығымен қатар, ресурстарды ұтымды пайдалануға ықпал етеді.
Сонымен қатар аумақта спорт және балалар ойын алаңдары бар. Тұрғындардың өтініштері негізінде техникалық зерделеу жүргізіліп, анықталған ақауларды жою бойынша тиісті жұмыстар ұйымдастырылып келеді.
Қауіпсіздікті қамтамасыз ету мақсатында 2025 жылы аудан аумағына 8 бейнебақылау камерасы орнатылды. Қазіргі таңда аталған камералар Түркістан облысы полиция департаментінің теңгеріміне берілген.
Сондай-ақ 2025 жылы 15 тұрғын үйдің сыртқы қасбетін бірыңғай сәулеттік келбетке келтіру мақсатында ағымдағы жөндеу жұмыстары жүргізілді. Т.Бокин көшесіндегі №1, №3, №5, №7, №9, №11, №13, №15, №17, №19, №21, №41, №47А, №47/2 және С.Қожанов көшесіндегі №3 тұрғын үйдің қасбеттері жөнделді.
Жоба аясында қасбеттерді сырлау және әрлеу, қылталарды профнастилмен қаптау жұмыстары атқарылды. Бұдан бөлек, 2012-2017 жылдары модернизация жобасы аясында шатыр, кіреберіс және қасбеттерге жөндеу жұмыстары жүргізілген.
Бүгінде тұрғын үй аумағын жаңарту тек ғимараттарды жөндеумен шектелмейді. Қалалық ортаны абаттандыруда жасыл экономика қағидаттарын ескеру маңызды. Аулаларға ағаштар мен бұталар отырғызу, көгалдарды сақтау, суару кезінде суды үнемдеу, жарықтандыруда энергия тиімді технологияларды пайдалану – ресурстарды ұтымды пайдаланудың нақты көрінісі.
Әсіресе Түркістанның климаттық ерекшеліктерін ескерсек, көгалдандырудың маңызы зор. Жасыл желек шаң-тозаңды азайтып, ауаның сапасын жақсартуға, жазғы ыстықта ауланың микроклиматын реттеуге ықпал етеді. Сондықтан әрбір отырғызылған ағаш пен күтіп-бапталған гүлзар қаланың экологиялық тұрақтылығына қосылған үлес деуге болады.
Мұндай жұмыстар тұрғындардың экологиялық мәдениетін де қалыптастырады. Тазалықты сақтау, қоқысты белгіленген орынға тастау, ортақ мүлікке ұқыпты қарау, суды және энергияны ысырап етпеу – күнделікті әдетке айналуы тиіс қарапайым қағидалар.
«Таза Қазақстан» бағдарламасының түпкі мәні де осында. Мемлекет тарапынан жасалған жағдайды тұрғындардың жауапкершілігі толықтырғанда ғана тұрақты нәтиже қалыптасады. Жаңарған аула мен абаттандырылған орта оны күнделікті күтіп ұстау мәдениетімен үйлескенде ғана ұзақ уақыт бойы өз сапасын сақтайды.
Т.Бокин көшесіндегі тұрғындардың бастамасы осы тұрғыдан алғанда өзгелерге үлгі бола алады. Өз ауласын таза ұстап, жасыл желекті көбейтуге атсалысқан тұрғындар тазалықтың тек міндет емес, ортақ мәдениет екенін көрсетіп отыр.
Алдағы уақытта Түркістанда тұрғын үй аумақтарын жаңғырту жұмыстарын экологиялық талаптармен ұштастыру, көгалдандыруды кеңейту және ресурстарды тиімді пайдалану мәдениетін қалыптастыру қаланың тұрақты дамуына серпін береді. Таза аула, жасыл орта және ұқыпты тұтыну – жайлы қаланың ғана емес, жасыл экономикаға бет алған Түркістанның да маңызды белгілерінің бірі.
